معلمة.. موظفة.. أم .. زوجة .. انسانة .. شلون نوفق بينهم ؟!

معروف بكل الوظايف العمل مع انتهاء الدوام .. وبعض الوزارات من 12 ما يستقبلون مراجعيــن .. و اذا ماخلصت المعاملات مو مشكلة تكملهم اليوم الثاني .
إلا المعلمة المسكينه شغلها يلحقها للبيــت و ممكن يعكر عليها حتى بأحلامها ..
(( أذكر مرة بدورة الموجهة تقول أيام ماكانت مدرسة دشت عليها الناظرة و عطتها الدفتر و كانت تشرح بالتفصيل و متمكنه من الدرس بس المشكلة بالاخير الناظرة تسألها وين التحضير و قالت لها مكتوب بالدفتر و اهو مو موجود قامت تدوره اهني و هناك يمكن بالدفتر الثاني و اهي تقول انا متأكدة انها كاتبته و بالأخير طلعت محضرة بالحلم )) ..

اللي خلاني أكتب الموضوع أن أنا وايد عانيت السنه اللي طافت كل يوم معاي شغل ووصلت لدرجة اني اييب كتب الصبيان و اصلحها بالبيت و الصراحة عمري ما سويتها من قبل .. لايمكن أرد البيت من غير شغل .. 24 ساعة مجابله اللابتوب .. بيتي صار مكب أوراق .. حتى و انا رايحه زوارة حق اهلي ماخذه اللابتوب معاي .. باختصار فقدت حياتي تفكيري كله محصور بالشغل .. لا تقولون المشكلة بعدم تنظيم الوقت بالعكس كنت كل يوم اخطط حق يومي و شراح اسوي بس لازم يخترب الجدول بالطلبات المفاجئة . أو اكون مقررة أنجز شغل بالمدرسة لازم يفاجئني شغل من احتياط او مناوبة او ولية أمر أو أو .. و المشكلة ان مادتي تتطلب شغل و تحضير ووسائل وايد ..

حالياً أنا بإجازة و ان شاءالله راح ارد الشغل ع الكورس الياي .. وودي أبدي بداية غير أني أقدر أوفق بين بيتي و بين شغلي .. أنا أحب أكون متميزة بشغلي و مابي أقصر بحق عائلتي و بيتي و صحتي .. أبي اعيش شبابي صح .. أبي أرد أقرا و أثقف نفسي أبي اطور من نفسي بشخصيتي باسلوبي ما تعودت اكون بهالسلبية و الرتابة و الكآبه اللي معيشه نفسي فيه ..
بنات خلونا نسوي تجمع إيجابي بعيـــد عن كل السلبيات اللي نواجها بخلال يومنــا ..خلونا نتعلم نوفق بين كل جوانب ..