يالي عندج طفل عمره شهر, سويتي له سونار الحوض؟

السلام عليكم
موضوعي هذا بودي اني افتح عين الامهات على شغلة ممكن يكونون غافلين عنها
انا قلبي محترق على بنتي و كان بودي ان احد نصحني قبل ما وصلت حالة بنتي لهذي المواصيل
الحمدلله و الشكر الله رزفني ببنتي من بعد نطرة ست سنين
ملت علي و على ابوها البيت و الكل يحبها من اهلي و اهل ابوها
ولدتها بمستشفى السيف عاشر يوم من شهر رمضان الي فات
قبل ما نطلع من المستشفى عطونا المستشفى ورقة عشان نسوي لها سونار الحوض لما يصير عمره شهر
لما صار عمرها شهر وديتها و سويت لها السونار و للاسف وصلنا الخبر ان معاها رخاوة في عظمة الفخذ اليسار لها
و العلاج الي عطانا اياه دكتورها من بعد استشارة دكاترة العظام بالمستشفى انه نلبسها حفاظتين عشان يساعدون ان ريلها تكون مفتوحة نوعا ما عشان العظمة تدخل بتجويف الحوض
و استمر بهالشي لين يصير عمرها اربع شهور
لما صار عمرها اربع شهور طرنا انا و ابوها لي السيف عشان نعيد السونار و نسوي لها اشعة
للاسف ما تعالجت بس حمدت ربي و ما اعترضت على حكمه
عطانا دكتورها تحويل حق مستشفى الرازي عشان نكمل علاجها هناك
عموما يوم الاربعا الي فات اخذتها ووديتها المستشفى و هني كانت الصدمة
الرخاوة الي كانت معاها تطورت الى خلع بفخذها اليسار
و دكتور مستشفى الرازي انصدم لما درا انها طول فترة ثلاث شهور تلبس بس حفاظتين
قال لي المفروض انه السيف يعطوني تحويل للرازي من بينت الرخاوة معاها و انها تلبس جهاز من عمرها شهر
حاول الدكتور يرجع العظمة بالحوض ما قدر
فكتب لها علاج على انها تلبس الجهاز الي يفتح ريلها اجباري على طول على امل انها تتعالج
و يت اطامة الكبرى لما قال لي انها الاسبوع الياي لازم تسوي اشعة و اهي لابسة الجهاز
انا كان الجهاز يساعد على ان العظمة ترد للحوض خلاص نستمر عليه 3 شهور
اما اذا كان الجهار مو ضابط عليها لازم تسوي عملية
مت و حييت لما سمعت هالخبر و غضب مسكت عمري لين وصلت سيارتي و قمت ابجي بحرقة على بنتي
بس قويت قلبي و رحت حق مستشفى العظام قسم الاطراف الصناعية عشان البسها الجهاز
آآآآآآآآآه على بنت شصار فيها لما لبست الجهاز بجت بجي ردت بجتني انا و امي عليها
و الفنية الي لبستها الجهاز يزاها الله الف خير تهون علينا و تقول لنا ان مشكلتها بسيطة
عموما شكل الجهاز مو بالفضاعة الي كنت متخيلتها عادي بلاستيكتين يرفعون فخوذها و حبل برفع الريول مثبت حوالين رقبتها شكله من فوق كأنه اوفر اول
الحين وقت تبديل حفاظتها ما بتعدى الخمس دقايق و ملابسها نفس الشي و سبحتها عشر دقايق
و الجهاز ما تفصخه الا للضرورة القسوى مثلا التطعيم
اسودت الدنيا بعيني و انقهرت على الثلاث شهور الي راحوا على الفاضي
حسبي الله على دكاترة العظام الي بالسيف عسى حوبة بنتي ما تتعداهم
لو بنتي لابسة الجهاز من عمرها شهر جان يمكن الحين تكون متعالجة
مو الحين لما بلشت البنت توقف بحضني و ترفس و تتحرك و تقعد و اهي فاردة ظهرها
حركتها تقيدت بعد عمري و حيل تأذت من الجهاز
اول يوم لبسته ما نامت كل شوي تتفزز حياتي اشوفها تحاول تحوس و اهي نايمة لما ما تقدر تحرك ريلها تبجي و تحرق قلبي عليها
الحمدلله انا متقبلة الوضع الي اهي فيه و حتى لو لا سمح الله الاسبوع الياي قالوا لي انها لازم تسوي عملية بحمد ربي ستين مرة على الاقل بتتعالج من حالتها
بس هذا ما يمنع اني بس ابجي عليها و على الشهور الي راحت
ضايق خلقي عليها بتتأخر بقعدتها و ماراح تحبي مسرعة و لا راح تقلب و لا تمشي بسرعة
السيف حرموني من اني افرح ببنتي حالي حال غيري بس الله لهم بالمرصاد و لي يوم الدين بتحسب على الي سووه ببنتي
المشكلة للحين ما دري شنو سب لها الرخاوة
ممكن بالولادة انسحبت غلط و لا المهاد
نصيحتي لكل ام انها تسوي سونار الحوض بمستشفى الرازي و لا تقتنع بكلام الدكاترة بلبس حفاظتين قبل ما تستشير دكاترة الرازي
لو اني ماخذة رايهم جان ما صار جال بنتي جذي بس الحمدلله على كل حال
و كل ام المفروض بالمهاد تركز على الايد و ترخي المهاد صوب الريل لانه المهاد يسبب الخلع بالحوض
آسفة على الطوالة بس اذا ساعدت وحدة غيري انها ما تتمشكل مع طفلها بكون بخير