قضيه اجتماعيه | ضروري كل الأبلات يقرونه

حواء - الفراشة - لك

السلام عليكم ورحمة الله وبركاته

اول شي انا مو مدرسه، خريجه وناطره الوظيفه ان شاء الله وعمري 22
بهالموضوع بقول قصتي ويمكن قصة وايد ناس بمجتمعنا، قضية عنف الاستاذه على الطلبه والطالبات

،

بنات، انا لي يومكم هذا اكره شي اسمه ابله ودم ضروسي .. مع احترامي للمحترمات منهم
انا ايام مادشيت الابتدائيه "اولى ابتدائي" بلشت معاي هالازمه، كنت من اشطر البنات
وكله قاعده اول سطر .. والله العظيم لي الحين اذكر الاحداث بتفاصيلها وجنها شريط فيديو يمشي بذاكرتي

اول عنف شفته جدامي، عنف جسدي وتهريب نفسي .. من احدى المدرسات الوافده العربيه والله لايوفقها لا دنيا ولا اخره، بسبتها اكسرت طموحي وخربت مستقبلي ..

بحصتها مادة العربي نسيت اكتب بدفتري "باسم الله الرحمن الرحيم" .. وحليت كل شي كان باللوح وكانت مستعمله المكينه اللي تحط فيها شفاف ومكتوب عليه وتعكسه عاللوح، عطيتها دفتري عشان تصححه لي

و وقتها كانت معصبه .. انا كنت اشوف جدامي وكانت تطالعني بنظرات خوفتني وانا كنت ياهل شي طبيعي راح اخاف!! والله العظيم احذفت الدفتر على ويهي وطرف الدفتر حاش عيني اليمين قمت ادمع وايد

وحسبي الله ونعم الوكيل فيها شكلها ماخلصت من متعتها، اسحبت مسطرتها وقامت اطقني على راسي و ويهي بدون اي سبب!! كنت خاشه بجيتي، ومن يومها حاشني الخوف وقمت اكره المدرسه

يوميا باولى ابتدائي انا المعروفه عني اهدى بنت .. كنت يوميا انطق انا والطالبات من الابلات
ابوي الله يحفظه كبير بالعمر ومو حيل بالكتابه، فاخوي العود اهوا المسؤول عني كان وكان يوقع لي لو المدرسه اطلبت توقيع .. ابلة الانجليزي هم من الوافده العربيه قالت هذا توقيع منو؟ قلت لها اخوي .. بحسن نية وبكل براءه! جان تمسكني واطقني وانا قمت ابجي .. ابلة الرياضيات من احدى الدول العربيه، شبعت "تــعــذيـب" منها! يوميا طق! انا ادري بتقولون لي هذاك زمن قبل، بس للاسف قمت اشوف هالنمومه بهالزمن بعد!! كانو يخلون الصف كله يبجي! مايستانسون الا ويمر عليهم يوم واهما امبجين الصف!
انا شفت الطق من ابتدائي لي متوسطه، الثنويه قمت اخذ قوتي وقمت افهم و وعيت ، ومن وقتها وقفو الطق
حسبي الله ونعم الوكيل فيهم .. اهدموا طموحنا، خلو الخوف يعيش بقلوبنا، كرهونا بالمدرسه والدراسه


انا بس ابي انصحكم نصيحه وبقول لكم شغله .. بهالعمر، اللي يكون فيها الطفل بالابتدائيه
اهني الطفل "يكتسب وتنمو شخصيته معاه" بهالسن بالذات! الطفل يكون شخصيته!

انا عندي اخت صغيره بثالثه ابتدائي، ويوميا اخاف عليها وحتى امي وابوي ملاحظين مدى اهتمامي فيها وبدراستها وخوفي عليها، ما ابيها تعيش اللي عشته انا! ما ابيها تشوف اللي انا شفته! ما ابيها تصير خوافه وتكره المدرسه! ابي شخصيتها قويه وتكبر معاها! انا كتبت هالموضوع عشانها اهيه، شفتها يوم من الايام مو مرتاحه بالمدرسه، سالتها شفيج؟ قالت ماكو شي .. جان اسالها عن الدراسه والمدرسات والابلات شلونهم وياج .. لما وقفت صوب مادة الرياضيات، جان تقول لا ما احبها! قلت لها ليش؟ قالت الابله كله اطقني بالكتاب على راسي وعصبيه وكله تزفنا .. فجاه واهيه تقول هالحجي شفت شريطي الفيديو مع ابلتي الرياضيات! وتذكرت كل شي مريت انا فيه وياها! لان محد حببني بمادة الرياضيات الا ابلة الرياضيات بالثنويه الله يذكرها بالخير! وكانت كويتيه، حست بحالتي ويوميا كانت وياي وساعدتني ما انسا فضلها علي. انا عصبت وقلت حق امي انا خليني اروح لها واكلم الابله بنفسي! بتعلمين علمي بادب! مو بطق!!!!!!!!!

انا ما ابي اختي او اي طفل يعيش اللي عشناه احنا قبل، واعتقد اكثر من بنت مرت بتجربتي
هالسن بالذات سن تكوين شخصيته، اذا خربتوها بايدكم حطوا ابالكم انكم هدمتو مستقبل "انسان"!
حطو ابالكم انه الله راح يجمعكم باجر بيوم الحساب ولا انسان راح يحلل او يسامح "معلم عذبه نفسياً"

اقتدوا بمقولة الرسول "كاد المعلم ان يكون رسولاً" مو ان يكون معذبا!
ناس اطفال تطلع من بيوتها بس عشان تتعلم، اهلهم معتمدين عليكم وحاطين ثقتهم فيكم
البعض يعاملهم بقسوه؟! انزين ليش؟! شنو ذنبهم؟! باي ذنب؟! اذا عندكم مشاكل خاصه
وتحطون حرتكم بالطلبه سواء كان طفل او مراهق ليييش!!!! والله حرام الله مايرضا!!!!



انتوا المسؤولين والمفروض تتحملون، انتوا اخترتوا هالشغله وانتوا تدرون شنو مسؤولياتها
وتدرون شنو لازم يصير .. شوفوا الفرق بين المعلميين بامريكا، وبين اللي اهني
والله العظيم اهناك يستعملون العقل، والتعليم الاخلاقي عكس الطق!! ياخذ من وقته عشان مستقبل انسان!


اسفه على انفعالي، وعلى الاطاله
بس شي لازم الكل يعرف عنه .. لان ماقدرت اسكت على اللي صار حق اختي
وانا عشت التجربه، وراح احارب عنف الاساتذه للطلبه، وراح اكمل دراستي بتخصص الانجليزي بما اني احبه
وراح اكون مدرسه باذن الله .. وراح اعامل طلبتي احسن معامله انا ماشفتها، ابي اعوض اللي فقدته انا

اسفه عالاطاله مره ثانيه، وهم اقول اكو مدرسات يضربون فيهم المثل وينحطون عالعين وعالراس
بس حبيت اوجه هالرساله لاي مدرسه تستخدم العنف .. ترا الله حق