ابيات لشاعر عتيبه عبدالله مرزوق المرشدي بعنوان مشها بشويش اتمنى ان تنال اعجابكم
مشها بشويش مع جنب الرصيف
لين تدرج بك شوي وتلها
وان تردى حيلها قل يالطيف
طالبك يالله تسهل حلها
ماتبى الدعوى لطيف ولا عنيف
ولاتبي منهو يصايد ظلها
لاومرها الله تبى تلقى وليف
انت والا اللي صبر ماملها
لاتعجل بالثقيل مع الخفيف
كل حاجه خلها في حلها
من بغى المرباع يحسب للمصيف
مايقدم دقها مع جلها
من ربيع العمر لحلول الخريف
لحظة تفرق مع اللي فلها
وخدمة الجندي تحت رتبة عريف
ما ترفع زلته لازلها
والقوي لو ياكل حقوق الضعيف
مايناظر حرمها من حلها
لكن الدعوى بها حلف وحليف
لاتحاول بالحيل تحبلها
مانت بالاول والانته بالوصي
واجد اللي تشتكي من غلها
كل عوجا طبعها ماهو عسيف
من ركبها هقوتي يفطن لها
وان بغيت العلم تاليها مخيف
احسن الله خاتمتنا كلها
خط مكة مايودي للقطيف
شف طريقك وينها وتدلها
من رغيف اليوم قدم لك رغيف
كان ودك بالعلا تاصلها
اذكر الله واعبده كمٍ وكيف
وركعتين الفجر وض وصلها
الشاعر /عبدالله مرزوق المرشدي
