و علمتني كيف بنجح و انتصر و ابقى ضحيه..**..وعلمتني كيف قلبي لو غلبها ما غلبها
و علمتني يوم صدت عنفوان الاجودية..**..ما تلوح للمقفي لو سلبها ما سلبها
رابية بين القبايل و العرب و اهل الحمية..**..عاقله ماتبذر إلا نخلة تعرف رطبها
إن تهادت ذكرتني في خفوق العامريه..**..و إن تمادت تركب ابليس الرجيم و ماركبها
جفنها لا سلهمت به ما يطيق السامرية..**..تسحبه برضاه عينه و ان سهت عينه سحبها
و ان حكت تعطي مكانه للحروف الابجدية..**..كن كلمتها تلفت للكلام اللي عقبها
و الحروف اليا تعدت بالشفاه النرجسية..**..كنها صارت قصيدة بس ربي ما كتبها
وش بوصف من حلاها وش بخلي للبرية..**..ما بها بالحسن عيب و اكشفته الا حجبها
شعرها فيه الخوي اللي تبرى من خويه..**..و الشفا لو تشرب الما و اختلط فيها شربها
كن في ضمة شفاها جمرتين بنار حيه..**..كل من حس بدفاها و أحترق صد و قربها
شفتها مثل الجريمه و ابتليت ابها بليه..**..غلطة ٍجيت اتحاشى ظلمها قلت ارتكبها
كل شي شفت فيها فيه نبره جاذبيه..**..موهبة من فضل ربي و اشهد ان الله وهبها
كلها لله بلله فاتنه ها لآدميه..**..عاجبتني من بداية راسها لا سفل كعبها
لو تبادلني شعوري و الهدية بالهدية..**..ما وفت لي لو تبيع ثيابها و اغلى ذهبها
هملتني و القلوب الجرهدية جرهدية..**..و أحرقتني و المحبه نارها تاكل حطبها
و لا انا ما كنت اكابر و الليالي السرمدية..**..يمكن ان اللي غصبني للولع فيها غصبها
يا خفوقي و ادري انك منت في حاجة وصية..**..شف مكاني و انت تدري وين هي يمة عربها
رح لها و ان كان فيها قلب يطمح في مجيه..**..شف طلبها في عروقه و ان حصل تمم طلبها
و انشده و ان قال عنها من هدر دمي بريه..**..قله ان اللي حصلي بالمحبة من سببها
و لو يقول اني تعمدت الخطا لجل الأذية..**..قله اني ما تحمل بالعتب قله ادبها
و لو يقول اني انا اللي كنت بادي بالخطية..**..قل هي اللي تعدت حدها لحظة غضبها
\
\
حامد زيد : الـجريـمه
هنا بالصوت
تحميل الملف من هنا
<embed src="http://www.m5zn.com/uploads/2010/9/2...qi76ovlsps.ram" width="420" height="250" allowfullscreen="true" ********************************************************************="always"></embed>
