الحلقه الاخيره من سالفتي سالفه
نصيحه لوجه الله علشان تفهم مسلسلي المسكسيكي اقرا الاجزاء السابقه ولاتدربي راسك وانت مو فاهم شئ
والان الى الحلقة الاخيره :-
الشرطة : سلم نفسك يا إرهابي منك له لا تسوون شي بعدين تندمون عليه
أنا : طال عمرك هو واحد إرهابي يعني إن اعتبرناه واحد ولا هو تقدر تقول بزر أنا مالي شغل أنا رهينة .. أنا صحافي
الشرطة : وش مطالبكم ممكن نعرفها يمكن نقدر نسوي شي
ابو صيته : أبى أروح لمجمع البطريق الكستنائي علشان أفجروه
أنا : خبل أنت ما ودك بعد يحشرونه أجانب لك مرة واحدة ..وش رأيك تفكني وبعدين تعطيني خمس دقائق انحاش فيها بعدين منك لهم .وش قلت
الشرطة : يعني أنتم إرهابيين هاه ..معترفين بهالشي
أنا : لا تجمع هو واحد أنا مالي دخل أنا مربط بالسلاسل ..ثانيا صباح الخير .أجل وشوا له متجمعين مشبهين علينا طالعين مقناص انتم شرطه والا لاعبين بلاي ستيشن
ابو صيته : شوفوا أن ما خليتوني أروح المجمع والله لا أفجر هنا قلت لكم
الشرطة : وغير هالطلب وش تبي انتم عارفين إن هالطلب مستحيل نقدر نضمن لكم أنكم تعتبرون كناس تابوا وتتسامح معكم الحكومة لو استسلمتوا
ابو صيته : قول لللي بعثك ماحنا مستسلمين ولازم يعرف إن الجهاد مستمر إلى قيام الساعة
أنا : يا أخوي تكلم عن نفسك وش ما حنا انا وش دخلني فيك << نذل ..ثانيا طع شوري استسلم واشرط عليهم شقة في مكة ولا جناح في فندق دار التوحيد ولا تطلع من مكة أبد واضمن لك قصر في الجنة بس فكنا واللي يرحم والديك
ابو صيته : اسكت أنت هذا جهاد ما يعادله شي ما تسمع بمرتبة المجاهد
أنا : يا حبيبي وش جهاده أحد يقتل أهله وناسه ويروعهم ويصير جهاد ليت ابوك ذيك الليله مستلم خفاره ابرك لي وللناس وافتكينا منك وكان صار مجاهد على كذا .يا ابو صيته اشرط عليهم اللي تبي لو تبي يزوجونك أميرة بيوافقون بس لا تضيع هالفرصة
الشرطة : شوف لكم 3 دقائق إن ما نزلتوا من السيارة وتركتوا مكافحة المتفجرات يوقفون المتفجرات ترى بنتخذ إجراءاتنا .. انتم توحون او لا ..
أنا : ودي أنزل بس ما اقدر مربط والله العظيم أني مربط ما تفهمون
الشرطة : أنت الحين معك متفجرات ولا معك رهائن هاه
أنا : تكلمني .. أنا مو معاه هو اللي معي قصدي هو البزر ايه أنا رهينة اختطفوني ويقولون لي فجر غصب
ابو صيته : يا عدو الله اسكت الحين تستنصر بهم على بالك بينقذونك ترى ما راح يفيدونك لا دنيا ولا آخره
أنا : بشويش عاد ربعك اللي فادوني حتى نانسي عجرم فديت خشمها ما جابوها لي ما قالوا الولد مقطوع لو صورة توسع صدره يستانس عليها آخر الليل ..و تجي أنت وتكملها وتعلقنا في عمود نور
الشرطة : وش قلتم بتستلمون ولا نتخذ أجرائنا المناسب فاهمين ولا لا
ابو صيته : ما راح نستسلم ومكملين لين نوصل لهدفنا فاهمين ولا لا والله لو يقرب واحد أني لا افجر المنطقة كلها
الشرطة : يا رهينة أنت يا رهينة ممكن تعطينا نبذة عن الوضع عندك
أنا : ابد عندنا فشار وفصفص وببسي ابو نص وجالسين نشوف فيلم دي في دي لبروك شيلدز ما نقصنا إلا انك تشرفنا والله من زين السؤال أقول لك مربط مربط ما تفهم وفوق هذا كله حسران مثانتي وصلت قلبي من كثر ما هي منتفخه
الشرطة : قصدي عندك خبر إذا في مساندة للإرهابي ولا لا ما اتصل على ناس من التنظيم معه يساعدونه
أنا : أقول لك بزر وتقول اتصل حتى بطاقة سوا ما عطوه هو بروحه يا شيخ أغروه قولوا له إذا سلمت روحك بنعطيك شريط العب حتى تتعب في أي ملاهي تختارها دلهووه ولا غنوا له أحسن
الشرطة : يا إرهابي ممكن نعرف وش مطالبك وش تبي بالضبط يعني إذا نقدر نوصل لحل معين
ابو صيته : أبى افجر المجمع وبس أبى اقتل كل الكفار اللي في بلاد الحرمين
الشرطة : مستعدين نجيب لك شيخ يقنعك إن هذا غلط بس تقدر تنتظر لين يوصل وتتفاهم معه
ابو صيته : لا ما أبى من مشايخة السلاطين اللي عندكم هذولي مثلكم كلهم في جهنم كلهم أنا أبى افجر وبس
أنا : طيب لو جابوا لك دستتين شروخة وصواريخ وقنابل ابو فراشه وتفجرها على كيفك تنبسط ..
ابو صيته : اسكت أنت اسكت أنت مثلهم مرتد لعنة الله عليك ما صدقت انهم يوصلون على بالك بينقذونك
أنا : شف دامها وصلت للحلقوم خلك إرهابي قصدي استشهادي محترم فكني و أنا والله أمدحك و مستعد أقول للناس انك بلغت ومستعد للزواج قبل ما تفجر وش تبي زود
ابو صيته : اسكت أنا رجال قبلا منك فاهم ولا لا أنا لي الجنة والحور العين
أنا : الحور العين للكبار .مو لك لاعبين عليك والله
الشرطة : يعني ما في أمل انك تسلم نفسك نهائيا
ابو صيته : ما في أمل قلت لكم ما تفهمون إلا أسوى اللي قلت لكم
الشرطة :ترى بنهجم فاهم ولا لا
ابو صيته : و أنا بافجر هاه لا تقولوا ما قلت لكم ..أنت يا مرتد وين الريموت حق التفجير
أنا : وش ريموته ما معي شي أنا ربطوني كاني خروف العيد ..مو معك
ابو صيته : إن كنت حاطه على الطبلون يعني علشان ما أضيعه.. هاه أنت قول ما أخذته قول قسما بالله ما أخذته
أنا :شكله طار من الحادث يوم نخش في العمود يا شرطة يا شرطة ما معه ريموت .البزر ضيع الريموت كاااك كااااك نياهاهاهااهاهاهاهاهاهاهاه هاهاهاها البزر ضيع الريموت يا فضيحته وش بيقولون عليه الناس اهجموا اهجموا ما عليكم منه
ابو صيته : اسكت اسكت لا تقول لهم ..بلا نذالة عااااااااااد اش بهم قاموا يتحركون جهتنا .. هي انتم ترى معي مسدس والله أطخكم كلكم ....
وتوه بيطلع رأسه من دريشة سيارته إلا اسمع طلق نار والدم ( ابو صيته ) تتناثر على وجهي و أنا جلست أتتشهد من الروعة وما وعيت بعمري إلا واحد فاتح الباب علي
أنا : أنت تبع مين هاه وش أنت من رجال إذا لك نية معينة تبي تفجر شي بعدين خلني هنا أحسن
العسكري : لا تخاف إحنا من قوة الأمن الخاص ما عليك باس إن شاء الله ..بس ليه ثوبك اصفر كله ورطب
أنا : رجع اللون اصفر موضة الثياب والرطوبة من الجو ..بس الحين وين أروح وبعدين لاتدقق يالدب << يدلع العسكري ..
العسكري : ما شاء الله اجل الاصفر رجع موضة المهم بسرعة انزل علشان حقين المتفجرات يجون يشوفون شغلهم وأنت بتروح معنا شوي نحقق معك وبعدين ترجع لبيتك سالم إن شاء الله
ونزلت من السيارة ..و أشوف جثة ابو صيته اللي ما عرفت وش اسمه الحقيقي إلى الآن ..شاب صغير ..لعبوا عليه كبروه فهموا شي غلط حشوا رأسه بشي لا هو له ولا يقدر يستوعبه ..علموه يكره أهله ويكفرهم ...الله يرحمه على كل حال ..مات بعيد عن أهله ولا أمه ولا أبوه يدرون وينه الآن بأي أرض ولا أي نهاية وصل لها ومنشغلين عليه
ابو صيته وغيره مالهم ذنب ولا الذنب ذنب اللي ضللهم لأن اللي ضللهم له غرضه وهدفه الذنب ذنب مجتمع وبيت متفكك الأب يلحق الريال والأم ورى المناسبات والأخوان كلا له حياته ...فصاروا شبابنا صيد سهل لأي واحد يغرس فيهم أفكاره على مزاجه فطلع لنا الشاب اللي يكفر اللي حوله ويتهم مشايخ مشهود لهم بالدين بانهم كفار وجهلاء ..وبنت تطلع وتجي بروحها وعلى كيفها بدون حسيب رقيب وتسوي اللي تبي من ورى أهلها .والطفل من أعلاه إلى أسفله مظهره غربي ويتكلم و غربي ويلبس ملابس هو نفسه ما يدري وش مكتوب فيها ..وصرنا كل يوم نخسر من شبابنا وشاباتنا ...وشكرا ..وتقبلوا تحياتي ... الحانوتي المنصحاتي
والان :- نياهاهاهااهاهاهاهاهاهاهاا هاهاههااهاهاهاهاهاهاه
والى سالفه جديده في المستقبل .وارجو انكم استمتعوا بالسوالف والاجزاء الماضيه والى لقاء قادم مع مضارب الباديه <<< وده يحط موسيقى تصويريه حزينه بس مايبي يخرب الجو عليكم ولاتزعلون علينا يااعضاء المنتطى
الحانوتي المخرجاتي
