مــــــــــــــــــــــــ ـــــــــــــــــــرثية

هذه المرثيه كتبها الشاعر/عبدالله ثامر الذيابي في وفاة الشيخ /مرزوق الذيابي والشيخ/فيحان الذيابي رحمهم الله
يالله عسالي عن جهنم محاريف
ياواحدن مارفع لغيره اكفوفي
يارافعن سبعن شدادن مراديف
وياباسطن سبعن عليها نطوفي
ربن عليم ابما تكن السراجيف
ومشكاي للي عالمن سرجوفي
انا ليا كثرت علي الصواديف
ماغير ادله خاطري بالحروفي
ركب المنايا مقبلات ومناكيف
وكم راس شيخن عقبته الكتوفي
والعين لو ادموعها في مغاريف
يمكنها تسقي اعراض الدفوفي
على حراران في علو المشاريف
ركن القبيله في الزمان العجوفي
من عقب ابوخالد ذرا الجار والضيف
وابو بدر فيحان لا واحسوفي
غاب القمر والليل مابه كشاشيف
وغاب الهلال وكيف عقبه نشوفي
مرزوق وان هبت هبوبن شواعيف
زحلن ذرا يرسي سوات الينوفي
دين كريم ومن رجالن عواريف
لين جناب ومدهلن للضيوف
مغلاق باب امولع النارفي الليف
بالعقل والحكمه وحلن نصوفي
وفيحان قرمن مايحسب التكاليف
راع الخصال النادرات معروفي
ماطب سوق اهل العلوم العجاريف
سوقن هله رديان مدري ضعوفي
عن مايعيبه يبعد الحوم ومعيف
حرن اقطامين قليل الوصوفي
هذا كلام الصدق مافيه تزييف
وعسى عزانا فاثنين امخلوفي
قفت بهم دنيا خطاها هذاريف
دايم على الطيب تسل السيوفي
يالله ارحمهم ياعظيم التواصيف
في ساعتن فيها يطول الوقوفي
عسى منازلهم علو المشاريف
فاعلى الجنان وقدم كل الصفوفي
وصلاة ربي عد ماذعذع الصيف
على نبي فوق الامه عطوفي