السلام عليكم زوار واعضاء هذا الصرح الادبي الشامخ
متواضعه راجيا لها القبول
[poem=font=",5,darkblue,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
ياشينها دنيا التعب والعذاريب=مجتهده الدنيا بتفريق الاحباب
ام الفلس واخت العنا وعمّة العيب=والحظ فيها بين نابٍ ومخلاب
اما سطت به سطوة الليث والذيب=ولا غدا صيده هوى فوقها عقاب
وان اصدفت واخطاه بطش المخاليب=مايسلم المسكين من بطش الانياب
واللي يدور من وراها مكاسيب= كنّه يبي من نافخ الكير الاطياب
والبعد يغلي بالضلوع المحاديب=واهون أموره طعنة القلب بحراب
وبالجوف تسمع للتجافي تقانيب=وكن المعاليق امتطوي بها الداب
واسهر ليال وتطلع الشمس واتغيب=والعين جمره تحرق جفون واهداب
مل الصبر حتى كسى راسه الشيب=والشوق قبل الصبر من صدتك شاب
ليتك تلقّى خافقي بالمواجيب=واتمد كف الوصل واتزيح الاتعاب
وعقب الهماج اتسوق عذب المشاريب=واتزف يمي ديم بالود صباب
خابرْك وافي وامتربي على الطيب=وللين في قلبك من الطيبه ابواب
في ظمتك تشفى ضلوعٍ معاطيب=وينزاح همٍ دق في صدري اطناب
وان قالوا ان البعد يعصف لواهيب=اقول انا هذا بلا ابوك ياعقاب
[/poem]بدر ناصر المورقي
