مصافحه أولى وأتمنى ان تلامس أحاسيسكم ..
.
.
.
ياملّ قلبٍ .. كـل ماجـاب .. طريـاه
ساق المشاعر .. كلها لـه ووجّـه
من كثر مـاذاق الغبينـه .. بفرقـاه !
لوكان بيده .. كان معهـا .. توجّـه
ولولا الضلوع .. اللي تحده وترعاه .!
من كثر شوقه .. كان صدري يفجّه
كنه كسير الطير .. لااخطيـت مرمـاه
من حالته .. يامنجّي الطيـر نجّـه .!
ولامن عجز لاياصله .. عاد ذكراه
وأدوى معاه الفكر .. وأبطى بسجّه
واتخيله .. واحكي معه واسمع حكاه
ويحجب خياله .. دمع عينٍ تزجّـه
واعاتبه .. من دون لاابيّـح خفـاه
خوفٍ على طيفه .. عتابـي يهجّـه
وأنشده من غيبته .. وشلـون دنيـاه
وعساه في راحه .. ولااحـدٍ يصجّـه
ومن السبب في غيبته ليه وش جـاه
ولا اعذره .. لوجاب لي .. ألف حجّه
وذي حالتي .. من غايبٍ نار فرقـاه ..
اقفت على المحصول .. في يوم عجّه
خلٍ .. قطع عهده معي .. كيف بنسـاه
رج الخفوق ... الله مثلي يرجّـه .. !
.
.
سعيد المري
(عسـ طرقي ـااس)
