[frame="10 80"]البارحه فـي طرقـةً تفتـح النفـس
ساقتنـي الأفكـار ليـن أفردتـنـي
أستفردت فيني وانا خاطـري عمـس
حتى مـن ازحـام العـرب جردتنـي
في معزلاً خالي من الصوت والحـس
لو بحذف الأبره فـالأرض أزعجتنـي
صمت وسكون يريح البال والهجـس
صفيت ذهني مـن علـوم أشغلتنـي
وراجعت صفحات الليالي على العكس
ليـن العلـوم الخافيـه واجهتـنـي
نسج الخيال وكل فكره على اللمـس
فكره ملـت عينـي وفكـره ملتنـي
وامسيت اركبها على المنطق السلس
واهلتهـا ليـن صعـدت واهلتـنـي
في مدرسة سود الليالي بدا الـدرس
وفي كل ليل وشنطتي فـوق متنـي
من يذّن المغرب ليا طلعـت الشمـس
ياكثـر ماتطـري علـي واسهرتنـي
اللي غلاها منغرس داخلـي غـرس
وانـا الوحيـد بقلبهـا واغرستنـي
باقي سنه واكمـل سنينـي الخمـس
خمسة سنين من الفـراق احرقتنـي
لامبصرًا زولـه ولا سامعـاً همـس
وغير البصـر والسمـع مافارقتنـي
يافتنـة المشتـاق لعيونـك النعـس
لاتلومنـي لاصـرت للعيـن فتنـي
يامـورّد الخديـن ياناعـم اللمـس
انعـم كفوفـاً فالبشـر لامستـنـي
جعل العذارى فدوة كفوفـك الملـس
وانـا فداهـا جعلـهـا مافدتـنـي
ياأحلى بنات الارض واحلى من الدبس
زاد الحـلا فـي دبسهـا ودبستنـي
نظراتها جيشاً من الـروم والفـرس
رزت بعيـدات المـدى وقصفتـنـي
والرايه البيضا علامة كفـا {بـس}!!
وانـا رفعـت ورايتـي مانفعتـنـي
لانتي بعالـم انـس ياعالـم الانـس
ولانتـي بعالـم جـن يامجننتـنـي
مالك شبيهـه فالبسيطـه ولا جنـس
قصـة جمالـك يالغضـي شتتـنـي
مير الفراق احراق واشواقنـا حبـس
ياقاضـي الاشـواق ليـه احبستنـي
شوقتني يارونـق الهـرج واللبـس
وين ارضـك وماطـاك ياواحشتنـي
لو الديـار تقـدر الشـوق وتحـس
يمدي جميع الارض عنـك اخبرتنـي
[/frame]
