بسم الله الرحمن الرحيم
أسعد الله أوقاتكم بكل خير
قصيدة بسيطة للتواصل مع قلوبكم النقية ... بعد غياب ،،،
1070
[poem=font=",6,darkblue,bold,normal" bkcolor="transparent" bkimage="" border="none,4," type=1 line=0 align=center use=ex num="0,black""]
الله على هاك العيون الظليلة = والله ورب البيت مامثلها عين
ماقد رأت عيني مثل هالكحيله = بالرحله اللي رقمها ألف وسبعين
من جدة اقلعنا بخطوة ثقيله = للعاصمة يانايف اليوم ناوين
من يوم وداني مضيف الدليله = للمقعد اللي فيه مسك ورياحين
اثره خذا من ريح هاك الاصيلة = اللي جلست خلفي وقامت تحاكين
اذا سمحت ارجوك شف لي وسيله = مكان حفظ الامتعه ممتلي زين
صعبة احط العفش عندي واشيله = تقدر تخلي شنطتي جنبك الحين
المعذرة على الحروف الذليله = المعذرة يالأخ مرة وثنتين
يحتال منهو يملك اليوم حيله = تربعت في وسط مخي شياطين
عفشك بدالك ياهلا بالبديله = احطك بجنبي أبد لا تخافين
انا فدا كلك حروفي قليله = تدللي كل الذي تبغين تلقين
كذاب انا لو قلت عنك جميله = لأنك -مع الاجحاف-جملة جميلين
عينك بعد عيني تهز القبيله = ورمشك لو اهجم فيه اجرح كثيرين
والشفه لاتعليق خل وخليله = سلة فواكه ، تجمع التوت والتين
جبينك أول صبح والشعر ليله = هذا وانا ماجيت للخد للحين
أجزم سواة اللي يراهن بخيله = انك بنظرة تقلبين الموازين
وش عاد لاناظرتي نظرة طويلة = حولتي كل الصلب يابنت للـلين
يوم اعلن الكابتن وناظر سبيله = جاني حماس وقلت ياربي تعين
فجأة غدت اتلا عظامي هزيلة = كني اشيل الطايرة فوق كتفين
تكفين صبرك قلبي ازداد ويله = تكفين أبي نظره قبل لا تروحين
والله ما أنسى العيون الظليلة = بالرحلة اللي رقمها ألف وسبعين[/poem]
وسلامتكم ,,
.
.
.
صالح المرزوق
