نفسي أفهم قبل أموت

[align=center]

مواطن ما نام الليل

يهذي والعالم اسكوت

ودي أفهم قبل أموت

كلمة مواطن وش تعني؟

حاولت أفهما بالظاهر

لكن ماشيءٍ لي ظاهر!!!

حاولت أفوتها براسي

لكن عيا الرأس التفوت

هنا شيء غير مفهوم

هو اللّي طير لي النوم

أحدًا عنده يخت ف نيس

وأحدًا عنده برج بلندن

وأحدًا في مربيا مصيف

وأحد يعمر في بيروت

وأحدَا مثلي كل أملاكه

ثوبٍ أبيض وثوب صوف

وزبيرية فيها نجوم

ودسوس ونظارة شوف

وبطانية لونٍ نمري

ووساده وبشار وكوت

وفي الآخر الكل مواطن !!!

نفسي أفهم قبل أموت

كلمة مواطن وش تعني؟

هل تعني قول مستهلك؟

الله يعين المستهلك

ماكنت أعرف هاذي الكلمة

من قبل اعرف بالتضخم

اللّي خذنا بالجبروت

خذني وخذ ناصر ومحمد

وخذ علي وعمه مبخوت

لكن خلاّ ناس واجد

أحدًا قرش وأحدًا حوت

ليه التضخم ؟ ماجاهم!!!

ولاّ ماسمعوا له صوت!!!

ولاّ فيها ناس وناس !!!

ناس تشقىَ لأجل اللقمة

وناس تشقى لأجل الصحة

وناس تشقى لأجل المسكن

وناس ما يعنيهم هذا

أحد يثبّت وأحد يشوت

وفي الآخر الكل مواطن

حسب الجنسية والمولد

حسب الدم وحسب الهية

وحسب الجريدة والرادو

لكن إذا جا التضخم

تبين كل المكبوت

أحدًا هاجر صوب أملاكه

وأحدًا يشحذ لقمة قوت

وفي الآخر الكل مواطن!!!

يارب أفهم قبل أموت

منهو مواطن بالدمغة

ومنهو مواطن مغشوش

أحدًا يركض في القوايل

ويدقدق كل الأبواب

يحمل شهادة مؤهل

لا تقبل بدون أسباب

وأحدًا وضعه غير وغير

تقضىَ له كل المشاغل

في أول جلسة بيلوت

إذا أخطأ حسب العادة

قيلت هاذي غلطة شاطر

والثاني لوّ أنه صايب

تحسب له لعبة سربوت

طيب طيب إذا واحد فيهم مات

أحد يعطل كل الديرة

ويعطل كل المصالح

وكل العالم تدري عنه

وكل الصحافة تدعي له

والمحارب له قنوت

وأحدًا ماحدًا يدري عنه

إلا أطفاله وأم عياله

وراعي الغاز وراعي الخضرة

وراعي البقالة لأنه

يشري لأطفاله بسكوت

والله أنه شيء يحير

تميّز حتى في الموت ! [/align]

\
\
\



الله الله الله


عليك يا شاعرنا الكريم



كلمات ولا أروع


لو وضعت على الجرح لطاب ..




أخي القدير



صح قلبك وكلك


وأرق تحية لقلبك ، ولجمال حرفك





تقديري

الغالي محمد السالم


مبدع في تفعيلاتك مثل ما انت مبدع في قوافيك

شاعر صاحب حس مرهف وكلمه صادقه

سعيد بوجودك في غرابيل الشعر


وصح الله قلبك من عروس البحر الين قطر الفخر



اخوك