قصة (( المحظوظ ))

[align=center]هلا بكم اعزائي القراء,,هذه القصة قصة شخص محظوظ جدا يعني مو انا لاني شخصيا ماعندي حظ في الدنيا بس هذا الانسان محظوظ جدا جدا ,لاتستعجلون بتشوفون كل شي بنفسكم.
اسمه خالد..عمره 22 سنة ابوه متوفي من اربع سنين له اختين وامه هو اكبر اخوانه ,عمانه سرقوا اللي قدروا يسرقونه من حلال ابوه وجحدوه بعدها,, بس مع ذالك هو محافظ على الاواصر العائليه ,,وخواله يعني على قد حالهم .. اصدقائه في الدنيا قليلين لان هالوقت والعياذ بالله مركزك ورصيدك ومستواك يحدد عدد اصدقائك ..خالد طالب مواظب ومجتهد في كلية الهندسة لكن حظه ماساعده هالمره حرم في 3 مواد مو لانه مايحضر بالعكس لانه الوحيد اللي يحضر ..ايه الدكاتره قرروا يعاقبون الشعبه كلها وبما ان المسكين واحد في الشعبه فبالتالي رسب رغم حضوره الا انه يحتسب الاجر وصابر وعنده امل في الحياة...في يوم السبت (طبعا انا اقصد احد ايام السبت مو تاريخ معين ) وبالتحديد في العصر راح يودي امه واخواته الى بيت خالته اللي على شارع التخصصي ..وتوه حاطهم ومبسوط وراجع على شارع التخصصي ويصادفه تفتيش مروري وقدامه بي ام دبليو مضلله بالكامل ولاعليها لوحات ..وقف راعي البي ام عند الشرطي بس الظاهر ماعبره نزل شوي من الدريشه وطلع وريقة (مايندرى وش مضمونها ) بعدين كمل مشواره جا دور صاحبنا خالد(سيارته كريسيدا) وقف عند الشرطي نزل الدريشه (النافذه ) قال له العسكري هات الرخصة و الاستماره طلعهم خالد له بكل ادب والاوراق على فكره سليمة ولا انتها منها شي وتو الشرطي بيناضرها الا وتجيه اشاره على اللاسلكي ويروح يرد عليها ..وفجاه يقول لواحد من زملائه غطوني,, في حادث قريب بروح اشوفه (وراح ومعه اوراق الضعيف خالد) المهم جا الشرطي الثاني وقال لخالد الرخصة والاستماره رد عليه خالد مامعي شي قال له الشرطي اجل وقف على جنب هذا اللي ناقص لارخصة ولا استماره قال له خالد الامعي استماره ورخصة قال له الشرطي اجل تستهبل علي انت ووجهك قال له خالد لاوالله مو كذا بس اوراقي مع زميلك اللي راح من شوي ..رد عليه الشرطي لاوالله تبيني اصدقك قال له خالد والله هذا اللي صار قال له الشرطي صف على جنب وقفل سيارتك وبلاكثرة حكي ولكاعه يالله قال خالد بس والله هذا اللي صار قال الشرطي يالله بس لاتعطلنا المهم وقف خالد على جنب وقفل سيارته ونزل وانتظر ساعه لين جات دورية وخذته للقسم وحققوا معه وقال لهم نفس القصة ..وصفقه الضابط (صفقه معناها حط يده عليه بشووووويش ) ولافاد خالد يحلف ان اوراقه مع ذاك الشرطي المهم في الاخير مرة دقوا باللاسلكي على ذاك الشرطي وسالوه في البدايه انكر بس لما طالع شاف انه حاطها في الكرسي اللي جنبه ..المهم على المغرب رجع الشرطي للقسم وسلم الاوراق لهم وتاكدوا منها بعدين قام الضابط وصفق خالد (لمعرفة معنى صفق انظر اعلاه) وقال له ثاني مره لاتخلي احد مهما كان ياخذ اوراقك فاهم..وطلع خالد من القسم وخده محمر من التحقيق معه واخذ ليموزين يوديه يم سيارته ..ولان خالد انسان مؤمن ويصبر احتسب الاجر عند الله ويوم وصل سيارته شغلها ولاكن صار له شي ولاحقق معه. وبعدين تذكر ان امه طلبت منه اغراض من السوبر ماركت ..وبالفعل راح للسوبر ماركت وخدوده حمر تقول سوري متسعود ..ويدخل السوبر ماركت وهو يغني ياليل خبرني عن امر المعاناة بعدين يقلب على لوكلفتني المحبه ..وفي احد اسياب السوبر ماركت وبالتحديد قسم البراويز علشان بيجيب برواز لاخته اللي في الثانوي طالبينه منها في المدرسة . ..يشوف خالد بنت حليوة وجسمها حلو ومتلطمه (لطمة =حاطه طرحتها على خشمها كانها شامة ريحه) واثنين عبندي يعني كوور يضايقونها ويبون يرقمونها بالقوة البنت ماعطتهم وجه وهم ولاييئسون وكل شوي واحد منهم يقول ..الله الله وش هالدلال ارحم الخلق يازين واللي يقول خاف الله فينا والبنت يوم ملت قالت لهم:اوووف وبعدين معكم مانتم عاقلين ....رد عليه واحد منهم:لا لين تاخذين الرقم وش قلتي ....البنت عصبت مره وقالت لهم: لو تموتون انا اغازل ذاك الولد (وتؤشر على خالد) وارقمه ولا اعبركم انتم شوفوا ذاك الرجل وشلون محترم صدق هو اللي ينعطى وجه مو اشكالكم ,,طبعا خالد وقتها تشقق من الفرحه وابتسم وسوى نفسه ثقل ..المهم الاثنين العبندي طاحت وجيههم وقالوا هين اشبعي به اما انت يابن...... دواك بعدين .وراحوا وبقى في السيب البنت وخالد وخالد خنت حيلي ميت من الفرحة ينتظر البنت تجيه وتقول خذ الرقم بس البنت ماسووت شي وخالد ينتظر ومتصنم قدامها ..جته البنت وقالت له: ممكن توخر عن طريقي ودي امر ... على فكره لاتصدق الحكي بس بصراحة الولدين غثوني من جد ومالقيت لهم حل الا الكلام اللي قلته (>>>>طااااط طوووط خالد تحطم بقوة ) المهم خالد شوي ورجع شاور نفسه وعرف انه ماراح للسوبر ماركت علشان يغازل صح لو البنت عطته وجه كان بينبسط بس ماكتب الله ..وكمل شرى الاغراض وحاسب وطلع من السوبرماركت وهو يغني ..راحت وقالت تبي تجي عقب يومين ..ئئئئاااااا..وش يشوف الاثنين العبندي اللي كانوا يلاحقون البنت ويغازلونها عند الباب وكل واحد سيجارته بيده والباين انهم ينتظرونه وتوه يقترب من عندهم علشان يروح لسيارته الا يقومون وينصونه ويقول اولهم:شرفت يالمملوح يالثقل يالوسيم..والثاني يقول:اموت واعرف وش فيه ازين مننا بس ..خالد ساعتها قال لهم:خير يا شباب في شي ..قال اولهم:ايوة استعبط يعني ماتدري حضرتك نسيت اللي سويته في السوبرماركت جوا ...قال الثاني:هي كذا هالاشكال بسون الشي وينكرونه بعدين..قال خالد:تراكم فاهمين الموضوع غلط والله ماصار بيني وبينها شي بس هي حبت تغيظكم شوي لانكم بصراحة زودتوها معها حبتين يعني ماصارت كذا اذا البنت ماودها لاتضغطوون عليهاااااااا ...ويبتسم المسكين خالد ..ويقول الاول: ياحليله يبتسم خفيف دم الولد ...وطبوا الحلوين الاثنين على خالد وجلدوه جلد الله لا يوريكم ولولا الله ثم الهنود اللي يغسلون السيارات في المواقف كان فطس في ايديهم ..المهم طلع خالد من المعركه بعين زرقا وبراطم مشقوقه وثوب منشق كمه الى الصدر بس الحمدلله على السلامة انه مافطس بايديهم ..ركب خالد سيارته ونصا بيت خالته علشان ياخذ امه و اخواته ويرجعهم للبيت ..طبعا من يوم شافته امه ارتاعت بس هو فهمها القصة على ان معركة بين اثنين شباب صارت وانه تدخل بينهم علشان يفك بينهم ..المسكينه امه صدقت ..المهم وهم راجعين للبيت ..وفي الطريق اخته اشتهت شاورما ولزمت الا تتعشا شاورما ومن ماما نورة في طريق الامير عبدالله ..ولان خالد مايحب يضيق صدر اخواته راح بهم هناك ..ووقفوا يطلبون بالسياره ..وفيما هم ينتظرون الطلب جا صالون ووقف وراهم ونزل وقفل سيارته يعني بيتعشا في المطعم ..ويوصل طلب خالد واهله وتوه بيرجع ريوص (ريوص يعني يرجع للخلف) علشان يمشون الا يلقا الصالون واقف وراه وينتظر ويدق بواري بس مافي فايده ماحد جا ..اخر شي قرر خالد انه ينزل للمطعم ويدور راعي الصالون ..وفعلا نزل وصار يسئل من راعي الصالون ياحماعة الربع الصالون الذهبي وين راعيه ..ياشباب الصالون الذهبي لمن ولاحد معبره ...بعد ساعه قام واحد دب بيغسل يدينه ..وطلع من المطعم ونصا الصالون .. خالد لحقه ..قال لك الحين بيهاوشه ..وفعلا لحق عليه قبل لايشغل صالونه ويمشي ..وقال له ياخي موب عليك كذا تسد على الناس وتمشي للمطعم ويوم اروح داخل انادي عليك ماتعبرني هااه ليه مو قلة ادب هذي ويقول له الدب ..عفوا الدب دزه (أي دفع خالد) على سيارته وقال وخر عن طريقي بس ..خالد طبعا كانه تهزء شوي قدام امه واخواته بس على طول تدارك الوضع وقال له رح ياقليل الادب الله يعاقبك بكره انشالله...وركب السياره وقالت له اخته افا ياخالد ليه ماسطرته وادبته قدام الناس (بعض البنات ماخذات مقالب في اخوانهن) فيما كانت امه اكثر حكمه وقالت لبنتها مو يكفي انه اليوم فاك مطاقة بين شباب اليوم العصر الله يعافيه وليدي...
المهم رجعوا للبيت وتوهم داخلين الا ويدق عليه عمه بالتليفون..وقال له يجي ضروري علشان يشتري كم راس غنم لعرس بنته اللي بيكون يوم الاربعا طبعا خالد فك خشته توه ياخذ خبر بعرس بنت عمه لاهو ولا امه ولا اخواته بس لانه بار (مو بار اللي ينشرب فيه المخزي بار يعني مايقطع صلة الرحم) ومايحب قطع الرحم وافق وقال لعمه ابشر تم الحين اجيك انشالله ..وهو يستعد بيروح لببت عمه الا وامه تهاوشه وتقول له :ياوليدي لاتروح وشوله عمك لاهو معبرك ولا شي,, غير كذا عنده سواقين وخمس عيال وراهم هم مايشترون له الغنم مو كفايه عيال اخوه مايدرون عن عرس بنته ويرد عليها يا يمه مهما كان هذا عمي مكان ابوي ولازم اخدمه واكيد عياله والسواقين مشغولين علشان العرس ... ويطمر خالد ولاكل عشاه وينصا قصر عمه ويطق الجرس وينلطع نص ساعه عند الباب على مافتح له السواق الاندونيسي ويقول له :ايس فيه انتا في رنج رنج رنج ليس كده ...قال له خالد: عمي ابو مساعد موجود ..قال له السواق :مين انتا قال له خالد: انا ابن اخو هوا خالد ..السواق: انتي استني هنا مافي يزي جوا لين انا في قول انتا ..ويتاخر شوي ويرجع السواق ويخلي خالد يدخل للمجلس ويدخل خالد للمجلس الكبير ويجلس ينتظر عمه ولاحد معبره ولاببيالة شاهي ..المهم دخل عليه عمه وقام خالد يحبب في راسة وكتفه وشلونك طال عمرك وعساك بخير ..لين عمه نزره وقال اجلس تراك ذبحتني وجلس خالد ..وقال له عمه :شف وانا عمك هذي 3000 ريال اشتر بها 10 روس غنم نجديات من الطيبات وتوص فيهم قال خالد بس 3000 ريال ياعمي قاله عمه اجل كم تبي ولاناوي تنهب قال له خالد لا ابشر طال عمرك بس اذا ممكن تعطيني الصالون الصحن اللي عندكم علشان احط الخرفان فيه لانك عارف ان سيارتي كريسيدا قال له استاجر سياره ولادبر عمرك سيارتنا نبيها,, ثانيا انت تعرف تسوق امريكي علشان تاخذها ولاانت ناوي تصدم بها ..قال له خالد طيب على امرك ياعمي..ورجع لبيتهم وقص القصة لامه ..قالت له ماقلت لك ياوليدي عمانك مايجي من وراهم خير ..قال لها :بس يمه ماودي بكره اذا كبرت ينقال عني انا واخواتي مالنا اهل ولاعزوة ..قالت له امه اجل سو اللي يجوز لك ..بس لاتطلب مني قروش انا عارفه 3000 ماتجيب خمس روس غنم قال براحتك يمه بس انا عندي 600 ريال وباعتبرها مني لعرس بنت عمي ..وانشالله بالقى شي رخيص ...ومن صباحية اليوم الثاني طمر خالد لسوق الغنم (وشكله زي ماقلنا عين زرقا من معركة السوبرماركت ومتلطم علشان يخفي اثارها ) ويلف ويدور في السوق عل وعسى يلقى شي رخيص بس ماش اقل شي الراس ب500 ريال يعني يالله سبع رووس غنم وهو يبي 10 ولف على سوق الغنم مرتين ...وبينما هو كان يدور لمحه باكستاني ..وجا له وبدا يحاكيه ..الباكستاني : بابا انتا ايس يبقا ...خالد:انا ادور غنم طيبات ورخيصه .. الباكستاني : انا في غنم كويس ورخيص بس انتا يبقا كم هبه ..خالد :ابي عشر والله ان اعجبوني صرت ما اشتري الا منك ..الباكستاني :وازد زين انتا يزي مئايا انا علسان قنم مال انا في حوش مال انا مافي هنا سي...خالد :اوكيه مشينا ..وتوهم واصلين الحوش وخالد بدى يتفحص الغنم ويقول بكم ياصديق ...الا وي وي وي وي وي شرطة مكافحة المخدرات مداهمة المكان وكل واحد يوقف مكانه ولاحركة ...خالد:وش القصة ..الباكستاني :الله كريم ليس كده ..مكافحة المخدرات : بعدين تفهمون يامجرمين ..وجروهم على مركز مكافحة المخدرات وبعد التحقيق الاولي اتضح ان الباكستاني يستخدم الخرفان علشان يهرب حبوب في بطونها ..وبعدين يبييعها بعد مايطلع الحبوب من بطونها بس المشكله انه يروج للحبوب في الحوش حق بيع الغنم بس علشان يداري على نفسه. المهم بدوا التحقيق الباكستاني من اول صفقه خق وقال واعترف بكل شي وانه يهرب مخدرات وحشيش في بطون الخرفان ..وانه جاب خالد للحوش علشان يبيع له حبوب ...المشكله في هالضعيف واليتيم خالد مع اول صفقه صاح مع ثاني صفقه بلل نفسه وهو يحلف ويصيح بانه والله ووالله مايعرف أي شي عن المخدرات وكل مافي الامر بانه راح مع الباكستاني علشان يشتري غنم بناءا على كلامه انه عنده غنم ..بس على مين على رجال مكافحة المخدرات ابدا نازلين فيه تصفيق ..اخر شي قال لهم ياجماعة الربع والله اني ما اكذب واني رحت علشان باشتري عشر روس غنم لعمي علشان عرس بنته ..قال له الشرطي عشر روس غنم بس 3600 ريال وين احنا تبينا نصدقك قل الصدق انك تبي عشر حبات يمكن تنبلع ..قال لهم خالد لاوالله العظيم ان بغيتوا تتاكدون هذا رقم عمي دقوا عليه واسالوه ..وبالفعل جابوا عمه علشان يحققون معه... الضابط:انت عم المدعو خالد ,وهل انت اعطيته 3000 ريال لكي يشتري لك عشر رؤوس من الاغنام ..عم خالد: اولا ياحضرة الضابط اشهد الله اني قد تبريت منه ..الحمدلله ان اخوي مات قبل مايشوفه بفعلته الله يخزيه ..ولا امس ياحضرة الضابط من يوم دخل علي امس في الليل في المجلس وعيونه زرق (من اثر الطقاق ذاك ماغيره ) وانا شاك فييه انه يتعاطى شي ..بس ماهقيت انها توصل لحبوب كنت احسبه يشرب ..يعني ماهقيته كذا ...الضابط: يعني انت تشك في اخلاق ولد اخوك ..عم خالد:ايه سجل عندك دايما ياحضرة الضابط يجي لي في البيت ويتحببني يبيني اعطيه قروش ولاني رحيم وهو يكسر خاطري لانه يتيم وانا اعطيه قروش كنت احسبه ياخذها لامه واخواته موب يجيب بها منكر ...خالد: والله ياحضرة الضابط اني ماعمري رحت له ولاقد طلبت منه قروش..الضابط :انت انثبر وخل عمك يقول فضايحك ...عم خالد:وسجل عندك ياحضرة الضابط انه دايما عصبي وعاق ولاحنا نشوفه الا اذا بغى فلوس ..الحين تبون مني شي ..الضابط : لا ومشكور على شهادتك ....وانت يالداشر دواك عندي والله لاوريك النجوم في عز الظهر ...وشوي الا يقول العسكري للضابط ان في واحد وده يدلي بشهادة بشان قضية خالد...الضابط:خله يدخل .. الشاهد: السلام عليكم ..الضابط:وعليكم السلام اسمك ومهنتك ووش تعرف عن القضيه....الشاهد :انا اسمي محمد يمني الجنسيه بياع في سوق الغنم اما شهادتي فهي ان هالولد أي خالد جلس ساعه ونص يدور على غنم رخيص وانه كاسرني لاني ابيع الراس ب450 ريال ويبيني ابيعها 350 وانا ماقبلت ثاني حاجه هالباكستاني دايما يجلس في السوق ولاعنده غنم ولا شي بس اذا شاف شباب صغار ولاناس تعبانه يروح ينلم عليها بس خالد شكله كان كانه متعارك مع احد هو بس فهمه غلط بس الناس ذيك تروح له على طول مو تجلس تلف السوق وتسوم وتحرج على الغنم ... الظابط:يعني تبي تقول ان اللي صار سوء فهم من الاثنين ...الشاهد:والله ماعرف وش تقول بس الظاهر كذا .. .وبعد شوي فكر الضابط وقرر انه يروح يسطر خالد كم سطره عل وعسى بس الولد طلع صادق وافرجوا عنه بدون كفاله وبلغوا خالد ان الراعي محمد هو السبب بعد الله في انهم افرجوا عنه ..طبعا خالد قام يحبب في هالراعي من زود الفرحه ..المسكين بغى يروح في شربة ملح على قضية مخدرات ...المهم خالد وصل الراعي الى بيته بعدين راح هو لبيتهم ...توه واصل وامه تطمئن عليه وتسمي عليه الا ويورح لبيت عمه علشان يرجع له فلوسه...وفعلا راح خالد مثل ماكان ناوي يرمي الفلوس في وجه عمه.
المهم يوم وصل بيت عمه ويقابله عمه...العم:هاه افرجوا عنك ياراعي الحبوب ..خالد:ياعمي ماني راعي حبوب الله يعلم اني مظلوم بس كله منك معطيني 3000 وتبي عشر رووس غنم ..العم :كان رجعت لي وقلت ياعمي الدراهم ماتكفي مو تعوم ورى راعين الحبوب وانا عمك هذي سمعة حموله وش تبيني اقول لمكافحة المخدرات لاوالله ولد اخوي مايسويها انا وش يدريني عنك الله العالم انك تتعاطى شي الواحد مايشيل في ذمته وانا عمك بس مهما كان الظفر مايطلع من اللحم على العموم وانا عمك خذ هذي الف ريال زياده هاااه صار معك 4000 ريال يالله اشتر الغنم ترى العرس قرب واذا جبتها لاتجيبها لبيتنا توصخه ودها على طول لقصر العروس و لا حطها في بيتكم ...(كان خالد خق ووافق على كلام عمه )وخذ الفلوس وثاني يوم الصباح نصا سوق الغنم وبدون لايروح يمين ولا يسار نصا الراعي محمد اللي شهد له ..وسلم عليه وقال باشتري منك الغنم والواحده زي ماقلت ب 450 وش بعد..الراعي: الله مير يسلمك بس طلبتك ياخوي يا خالد..خالد: انت تامر ..الراعي:زي مانت شايف ماعندي الا هالعشر رووس وهالتيس ..ويعني اذا انت بتشتري هالرووس كلها فانا باعمل لك تخفيض وخذ التيس معهم كلهم ب4500 ريال وش قلت ... خالد: بس انا مابي التيس والله..الراعي:يعني يرضيك انتظر في السوق لين يجيه رزقه ولا تبيني اشيله واستاجر سياره علشان ارجع له طلبتك الله يرحم والديك في الجنه ابي ارجع اليوم لبيتي خفيف ...خالد:طيب على كيفك يالله حطه في السياره معهم....(ولك ان تتخيل عزيزي القارىء سيارة كريسيدا فيها سائق وعشر روؤس غنم وتيس يرقص سامري) المهم ودى خالد الغنم لقصر الافراح وساعه علشان يقنعهم يدخلونه وقرر انه يحتفظ بالتيس لروحه وبالفعل رجع لبيتهم وطول ماهو في الطريق والتيس يرقص بس هالامر ماشغل باله المهم توه واصل بييتهم ويشوف ابو حمد جارهم (شايب عمره سبعيين ) وتو خالد ينزل من سيارته ولا التيس اللي يرقص سامري ينطلق من السياره باقصى سرعته وينصا ابو حمد وينطحه ويطيحه على بعد 10 امتار ..وخالد راح يبي ينقذ العم ابو حمد ويشوف التيس ينطلق باقصى سرعه يبي ينحاش وقتها خالد احتار وش يسوي يبقى مع العم ابو حمد ولا يلحق التيس وبعد تفكير سريع قرر انه يلحق التيس على الاقل العم ابو حمد مو قادر ينحاش اما التيس يقدر ,, فقرر انه يلحق التيس والتيس يركض وخالد يركض وراه ويصرخ امسكوا التيس امسكوا التيس وكل واحد يحاول يفزع للتيس ينطحه التيس ويرميه على بعد كذا متر لين تصدى اثنين صعايده للتيس هو صدق نطحهم بس هو اللي داخ وطاح على الارض. اعني التيس ..المهم تم استدعاء 6 سيارات اسعاف لانقاذ المصابين و3 سيارات قوات امن خاصه للسيطره على التيس وفعلا اقتيد خالد والتيس هالمره لقيادة الامن الجنائي لان العم ابو حمد الله يغفر له ويرحمه توفي من اثر نطحة التيس وورثة العم ابو حمد راسهم والف سيف الا يطالبون بالقصاص ..سواءا من التيس ولا من خالد ...وخالد اصبح في موقف صعب من ناحيه حزنان على ابو حمد ومن ناحية ثانيه صارت بينه وبين التيس عشره بسبب الايام اللي جلسها في التوقيف مع التيس ...وراحوا للمباحث الجنائية للتحقيق في جريمة قتل العم ابو حمد ...الضابط: انت ياولد ماودك تعقل كل يوم في مشكله وقضيه جديده ..وش اقوالك في التهمة اللي وجهها ابناء العم ابو حمد لك انك قمت بعملية تخطيط وتدبير قتل والدهم مستخدما بذالك التيس...خالد: ياحضرة الضابط والله العظيم مظلوم وحتى التيس مظلوم ..والله اعلم ان التيس يوم ينطلق على ابو حمد الله يغفر له ويرحمه انه كان محسور( حسر يحسر حسرا محسورا =يعني مثانته البوليه ممتلئه ) ولا انه والله يشهد انه اصيل وذرب ...محامي ابناء ابو حمد: ياحضرة الضابط سجل عندك ان المتهم يحاول ان يستهتر بالمرحوم وقضية قتله .. خالد: ياحضرة الضابط والله ما استهترت بس التيس كائن حي له ظروفه واحاسيسه يعني يمكن مشبه على العم ابو حمد واخطا في التعبير بس والله ان التيس ماعنده نية قتل ...محامي ابناء ابو حمد..ياحضرة الضابط لاتنسى ان التيس حيوان ذو قرون أي حيوان ناطح أي حيوان مفترس ياليت ماتنسى ...خالد : والله العظيم انه تيس ودود ولطيف بالماريه انه كان يرقص جنبي في السيارة على اغنية اصالة نصري يا مجنون قسما بالله العظيم يا حضرة الضابط.....الضابط:شف انت واياه انا ماعندي خبره في التيوس بس باحول التيس الى لجنة طبيه تابعة لوزارة الزراعه والمياه ووزارة الصحة وهي تقرر اذا التيس واعي ومدرك لتصرفاته فوقتها انت ياخالد والتيس راح نقاضيكم بتهمة القتل العمد اما اذا التيس طلع تحت ضغوط نفسيه او بهيمه ..فراح نعتبره قتل خطا وتصوم شهرين ياخالد واهلك يدفعون فدية للعم ابو حمد. ....زين .
وظل خالد لمدة اسبوع يطارد ويراجع في اللجنه الطبيه المكلفه بالحكم على صحة التيس العقليه والنفسيه ..وخالد في كل اختبار يحلف ان التيس بهيمة ومتوتر نفسيا وبعد سجال طويل قررت اللجنة الطبية ان التيس مصاب بعشى ليلي,اضافة الى اختلال عقلي وان التيس مصاب بحمى الوادي القلاعيه ..ولذا قررت اللجنة الطبيه ان تتخلص من التيس ..ساعتها خالد مسكين خنقته العبره مو من الفرحه ...الا من الحزن على مستقبل التيس وراح من جديد يراجع اللجنه لاعادة النظر في قرارها ضد التيس وتقرر ارسال خالد والتيس الى منظمة الصحة العالمية للبت في الحكم على صحة التيس العقليه والنفسيه وبالفعل وبعد مشاورات ومباحثات ورشاوي طلع التقرير ان التيس كان يعاني من ضغوط نفسيه قاهره ..ويلزم له العلاج ...ورجع خالد برفقة التيس الى الرياض وهنا فوجئوا بمحاكمة القتل الخطا ويحكم عليه بالصوم لمدة شهرين ويلزم اقاربه دفع الديه الى ابناء ابو حمد ,,, ساعتها ..ومن زود حظ خالد ان اقاربه يعني اعمامة ..رفعوا قضيه ضد خالد والتيس يثبتون فيها ان التيس بكامل قواه العقليه (علشان يسقطون القتل الخطا ويثبتون القتل العمد وساعتها يكون القصاص وتسقط الفديه ) ....وبالفعل في المحكمة.....خالد: ياحضرة القاضي معاي تقارير طبية رسميه تاكد ان راموي ( خالد من زود العشره دلع تيسه باسم رامي ويناديه راموي ) وقت الجريمة كان تحت ضغوط نفسيه شديده وبالفعل خضع لعلاج مكثف والحمدلله تشافى تماما فانا ائكد لك ياحضرة القاضي انه بدا يتعافا ... وفجاة ينط عم خالد: ابدا ياحضرة القاضي ترى خالد هذا لعاب وراعي حبوب وكذا مرة مسكته مكافحة المخدرات وهو يشتري حبوب .وخذ عندك ياحضرة القاضي الله يسلمك ان التيس هذا من طينة خالد والله اعلم وش بينهم ..زاد يقول لي حارس قصر الافراح يوم خالد يوصل الغنم للقصر وهو يقول ان التيس الله يدفع عنا البلا يكحكح ويتحرش بالغنم ياشيخ ترى خويلد والتيس بينهم شي والله العالم ....خالد:ياشيخ الله يطول عمرك هذا تقرير يثبت ان التيس كان متعرض لضغوط نفسيه هائلة وقت الجريمة...وفعلا اخذ القاضي الاوراق والشهادات ...وبعد نص ساعه مشاورات قرر القاضي براءة التيس من الاستئناف اللذي تقدم به اقارب خالد ..وتوهم يفرجون عن التيس الا وتجيه الحاله ..أي التيس وينطلق باسرع ماعنده صوب القاضي وينطحه باقوى ماعنده خمسطعشر (15 مرة) نطحة ..اودت بالقاضي الى المستشفى للعلاج من كسور ورضوض ..وحول خالد والتيس الى المحكمة بس هذه المره المحكمة المستعجله .. اللتي اسفرت عن اعدام التيس بتهمة القتل العمد للعم ابو حمد ..والتعدي على سلطات المحكمة ..وسجن خالد 5 سنين مع الاشغال الشاقه لثبوت ضلوعه في الجريمتين المدان بهما التيس ولتقديمه مستندات مزورة وملفقه عن سلامة وصحة التيس العقليه ...ولان خالد مثل ماهو واضح من القصة انسان محظوظ فقد قرر اقاربه اللذين وقفوا ضده من اجل اثبات ان قتل العم ابو حمد كان بالعمد ان يقفوا معه هذه المره في اثبات ان التيس حيوان سفاح وان خالد لاضلع له في عملية القتل والاعتداء على العم ابو حمد والقاضي ...وبالفعل بعد الواسطات والتدخلات تم اسقاط التهمه عن خالد وتم الاكتفاء باعدام التيس وتعزيره لبقية التيوس ممن تسول له نفسه الصرمحه والاعتداء على ارواح الابرياء ....وبعدها خرج التيس عفوا خالد من السجن متوجها الى منزله والحزن يملا قلبه وخاطره متلطما بشماغه ..وراجعا الى منزله وبينما هو كذالك ..واذا به يقف عند اشاره وعلى يمينه سياره فيها اثنين شباب لاصقين بسيارة ليموزين فيها بنات (يعني الا بالقوة بنرقمكم ) المهم بنات الليموزين ماعبروهم وطنشوهم وكشت واحده منهم في وجه الشابين اللي في السياره ..يعنيي باختصار طيحوا وجههم .وفي تلك الاثناء كانت الشماغ تنسل قليلا قليلا عن وجه ابو خلود وتظهر ملامح وجهه ويلتفت واحد من الشباب الاثنين عليه ويقول لخويه : شف شف ابن الكلب جالس يضحك علينا ...يقول الثاني: لا لا هذا اللي جلدناه ذاك اليوم في السوبر ماركت والبنت ترى ماتكش علينا لالا تاشر عليه يعني تقول اخذ رقم ذاك ولا اخذ رقمكم ..الاول: انت رايك كذا الله يلعنه ابن اللذينا وذا ورانا ورانا ..الثاني :يعني بنخليه قوه بننا ننزل عليه ونجلده.....وبينما المحظوظ خالد في سيارته يبكي ويرثي التيس الا وباب سيارته ينفتح وقدامه اثنين كور اسود من عتمة الليل ويطيحون فيه جلد وتكسر عند الاشاره وقدام الناس .....المهم ولان حظ خالد مايخذله فطلع منها سليمة بس 46 كسر في العظام مختلف الاماكن منها كسور في الفقرات...وفي الجمجمة وفي الرقبه وفي اصبع رجله الصغير (رجله اليسرى) ..وراح ونوم في مستشفى الرياض المركزي لمدة 6 اشهر بعدها لما طال مدة العلاج ولاطاع يقوم بالسلامة ..قرروا يصبون خرسانه ويشبكونه فيها يعني على وعسى زي الشجر اذا حطوا معه خشب...وبعد كذا قرروا ارساله الى مستشفى الملك فيصل التخصصي لاجراء عمليات تجميليه له خصوصا عنده 16 شق في البراطم ..جرحيين قطعيين في الانف ..وحاجب منزوع تماما واصبع مدخل لجوا ...ولكن الاطباء في مستشفى الملك فيصل التخصصي انذاك ادركوا عدم مقدرتهم على علاجه واجراء أي شي مفيد له فقرروا ارساله الى الولايات المتحده الامريكية في ولاية واشنجطن (موب لاعاصمة ذي ولايه فوق) لان هناك جراح تجميل شاطر وداهية وفعلا استلم الجراح خالد لمدة شهرين وسوا له 21 عمليه في كل مكان في جلده من زراعة وترقيع وجلد وزراعة وصبغ شعر وحواجب ..نزع براطم واستبدالها بشفايف ....وطلع خالد من كل هالعمليات وهو ملفوف بالشاش من اوله لاخره ولان الموسم كان شتا ..وخالد ماكان عليه الا الشاش وتحته زلط ملط فكان دايما يصارخ براااد براااد البيت برااااد لييين جا موعد فك الشاش عن جسمه ولما كشفوا عنه طلع لهم هذا الشكل
بعدما كان لديهم هذا الشكل (بعد المراحل الاولية من العلاج )
وهكذا تحوّل خالد من غول قبيح الى حلو ووسيم وتحول خالد طالب الهندسة الى نجم اعلاني وسينمائي وحولوا اسمه في هوليود من خالد صالح الى براد بيت ( نتيجة لصراخه في المستشفى براااد البيييت برااااد) ..عرفتوا ان براد بيت الان اصله سعودي ..اتمنى ان هالقصة تعجبكم وعلى فكره فيها جزء كبير من الحقيقة

اخووووكم البرنس[/align]