نقاط من مباراة الامس "من مشاهدات زوجي واطفالي "

السلام عليكم ورحمة الله وبركاته

الف مبروووووووووك يا ملوك النقاط الثلاث

طبعا راح اكتب لكم من مشاهدات زوجي واطفالي للمباراة البارح

_ امس حضر زوجي واطفالي للمباراة طبعا راحوا بعد صلاة العصر
واثناء شراء التذاكر طلبوا الحساب 90 ريال عن ثلاثه اشخاص
لما جاء زوجي بيدفع الا واحد اهلاوي قال كيف تأخذون على هذا الصغير يقصد ولدي "عمره 6 سنوات"
الا الرجال قال خلاص انا مالي شغل لو وقفوك الامن جوا وما دخلوه
يقول زوجي عادي دخلونا وما قالوا شيئ .

_بعدها ولدي سنه سادس ابتدائي دخل بالشعار والعلم الا اثناء التفتيش اخذوا العلم وسحبوا العصا منه ولدي وقتها عصب وحاول يأخذ العصا حقت العلم الا رفض رجل الامن يقول ممنوع وان الانظمه كذا :eek:
يعني ما ادري هالانظمه ما اشوفها تتطبق الا على الاهلاويه.

_طبعا الملعب مره كان حلو ومنظم وكل شيئ متوفر يقول زوجي اول ما جينا جلسنا في واجهة الملعب مكان التيفو وبعدها راح صلى هو والعيال واخذوا خفايف ولما رجعوا الا مكانهم صار فيه ناس واضطروا يجلسون خلف المرمى "المفروض تكون الكراسي مرقمه وكل واحد يلتزم بمقعده "

_الجمهور كان كثيييييييييير وكان متفاعل لدرجة ان ولدي جاء فاطس ضحك على ابوه
يقول الظاهر ان ابوي نسي انه هلالي كان متفاعل مع اهازيج الرابطه ومع الاقوال ويقول والله اخذ الشعار مني لما جاء هدف السومه وكان متحمس :icon10:
ولما سألت زوجي قعد يضحك "مع انه هلالي صميم وما يطيق الاهلي "وقال والله المباراه حماااااس وجمهور الاهلي كان متفاعل وقال كلمة انصدمت منها
يقول الجمهور اكثر من 30 الف الملعب كان مليان ومابقي الا ربع الملعب ما تغطى
قلت كم تتوقع الحضور
قال 40 الف حتى اهلاويه كثير لما انعرض عدد الحضور انصدموا لانه اكثر من المعلن عنه .

وفيه بعض الجمهور اللي جالسين فوق رموا قوارير مويه على اللي جالسين تحت زوجي يقول استغربنا من اللي يرمي وليش يرمون اصلا
قلت يمكن من جمهور العروبة قال ما فيه ولا واحد الا جمهور الاهلي قلت اجل شكلهم من جمهور الفرق الثانيه عشان يتعاقب الاهلي والا لو اهلاوية مستحيل يضرون الفريق
قال والله ما ادري بس شكلها كذا ..



المهم :


زوجي يقول والله يالبصاص البارح حصل سب وكلام تحطيم قوي على الفرص اللي ضاعت
يقول والله كسر خاطري لما تكلموا عليه

وشفت البارح بعض المواضيع اللي تنتقد اللاعب
صحيح مستوى البصاص نازل لكن بالله كيف يرتفع وهو في كل مباراة يسمع كلام جارح
يعني بالله فيه احد يتمنى انه يضيع الفرص بعدين هي تراكمات اذا هذا بس في هالمباراة اجل المباريات اللي فاتت اكيد سمع انتقادات اكثر من كذا
اتمنى تخفون من الانتقاد واننا نوقف مع اللعيبه لانه كل انسان يمر بظروف وينزل مستواه
خاصه ان الفريق الان قاعد يفوز وفي المراكز المتقدمه والمستوى مايهم بقدر النتيجه

والله افكر فيكم يا الاهلاويه فايزين تنتقدون وخسرانين تنتقدون

صحيح اننا نتمنى الافضل لكن بالصبر ان شاء الله نحصل على المراد ...


وسلامتكم ....