ياحلو صبحٍ فيه وافقت خلي
اللي يعايدني بعيد الضحيه
اقبل وانا ارحب بزوله واهلي
وهيضت له من جزل قافي تحيه
والى عنا لي صاحبي جيت كلي
هذي سلوم اهل القلوب الوفيه
المترف اللي منه مانيب املي
لوهو مقابلني صباح وعشيه
خلٍ غلاه بخافقي مستقلي
ومشاعري له بالغلا دوم حيه
وبالروح له بستان وردٍ وفلي
مهديه له من طيب خاطر هديه
منورٍ قلبي ونور محلي
وماهوب محتاجٍ لوصلي وصيه
ومخلّيٍ هرج العواذل يولي
وانا عزومي بالموده قويه
