على مسؤليتي الشخصية

عبارة تتردد ونسمعها باستمرار عند كل رغبة في التعاقد مع لاعبين اجانب للفريق الاهلاوي وهذه العبارة هي ( ساحضر اللاعب على مسؤليتي الشخصية ) وصاحب العبارة هو مدرب الفريق وطبعا الادارة تبغى تكون احترافية وتسلم المدرب زمام امور التعاقدات ويبدأ شغل السمسرة ولنا في بيريرا اكبر مثال سمسر على النادي باشباه لاعبين وترك النادي آخر الموسم بكل بساطة (بالرغم من اقتناعي فيه كمدرب صاحب فكر لا يتناسب مع لاعبينا ابدا ) .أية احترافية اللي تخلي الادارة تثق في المدرب ثقه عمياء في جلب الاجانب وماهي خطة جروس اللي جعلته يتعاقد مع اسحاق ويقضى بسببه على اهم خانة في الفريق. واللي نفسي ومنى عيني افهمه ايش هي مسؤلية المدرب الشخصية اللي راح يتحملها في حالة فشل اي تعاقد أصر عليه هل بيتم تحميل المدرب تكاليف عقد اللاعب الفاشل اللي احضره والا بيخصمون عالمدرب من رواتبه والا ايش بيسوون له علشان مسؤليته الشخصية الفذة. أها ممكن يلغون عقد المدرب وطبعا يعطونه الشرط الجزائي ( أحلى عقاب عالمسؤلية الشخصية للمدرب ) . طبعا نادر ونادر جدا ينجح اي لاعب يحضره المدرب بنفسه ومعظم اللاعبين الناجحين هم اللي تحضرهم الادارة ولنا في نادي النصر خير دليل الادارة احضرت الاجانب وطلبت من المدرب توظيفم وكمان الهلال كل لاعبيه اللي احضرتهم الادارة ديقاو والكوري ونيفيز شايلين الفريق ويبقى بنتلي اللي اشوفه لاعب عادي وغير مؤثر وطبعا هذا سلمكم الله احضره المدرب على مسؤليته الشخصية.
تكفون يا ادارتنا الموقرة فكونا من ادعاء الاحترافية وفكونا من مسؤلية المدرب الشخصية وتحملوا انتم المسؤلية في احضار لاعب صانع لعب يشيل الفريق واقنعوا المدرب باي طريقة لان شغل السمسرة واضح علية واسألوا بالمينيو اللي مجلسه جنبه في دكة الاحتياط .
على مسؤليتي الشخصية ان الفريق بيصير باذن الله مرعب للخصوم في وجود صانع لعب مميز وعلى مسؤلية المدرب الشخصية اللي قاهرة الجماهير ان اصرار المدرب على اسحاق راح يخسر الفريق نص قوته ونخسر الدوري وانتم لكم الخيار.