لما اكتشفت كلامها عني حسبي الله عليها

اتمنى ماتدخلون تقروون وتطلعون حسوا فيني يا بنات وعطوني آرائكم
..
انا مشكلتي مع سلفتي( مرت حماي ) ساكنين بنفس البيت وانا ماعندي اولاد والحمدلله على كل حال ... صاربيني وبينها خلاف بسيط جدا وهي قطعت العلاقة وعطتني بلوك ... وعايلة زوجي كلهم يحبونها لان لسانها عسل وانا سبق وشفت انها تتكلم فيني عند اهل زوجي وتتقول علي اشياء وتفتري والكل مصدقها وحاسب لها حساب وخايف على زعلها ... بحكم اني الحمدلله جميلة وانيقة دايما من خوات زوجي الا بناتهم الى زوجات اخوانه انتقاد بان لبسي قديم او شفناه على فلانه .. وصار مرة خلاف بيني وبين بنت اخت زوجي غلطت علي وشبهتني بالقرد ورديت الشتيمة واعتزلتهم بعدها الكل مايكلمني زعلانين حاولت بشتى الطرق اكسبهم من هدايا كلمات طيبة وابتسامه لكن قلوبهم سودة من ناحيتي جدا سودة ... اللي حصل استخدمت اسلوب التطنيش والله العزيم اجي بالعيد اسلم محد يرد السلام الا كم وحدة وابارك بالعيد ومثل الشي ... بكيت واحترق قلبي ليش الكره هذا وبدون سبب ... لحد ماصار الخلاف مع سلفتي عرفت انها هي اللي تتكلم من ورا ظهري بس انا خلاص كرهتهم اكيد حاسين فيني يابنات لما تكونين منبوذة وانتي وحيدة ويتفرعنون عليك .. بعد الخلاف ادش الصالة اسلم ماترد السلام ( سلفتي ... اجلس بشرب قهوة وشاي تشتغل مع ام زوجي نقزات واذا تكلمت قاطعتني او كذبتني وانا مارد عليها اكمل كلامي او اسكت لان عقلها صغير تبي تهاوش معاي عشان طلعني غلطانه ... اللي حصل ام زوجي صارلها اسبوع نفسها خايسة علي ماتكلمني الا اذا انا كلمتها وبدون نفس بعد ... واذا حضرت سلفتي للصاله شوفوا انواع الكلام والضحك تدور رضاها .. مع العلم ام زوجي كانت تشتكي من سلفتي ومن لسانها الطويل ... انا تعبت من هالوضع .. قلت بطلع شقة اجار او بفتح باب خلفي قال زوجي ماكو ... عشان سلفتك تتركين البيت .. انا والله تعبت منها انسانه قوية متسلطة وخبيثة والحظ خادمها كاسبة الكل بصفها وانا بطبيعتي هادية ومسالمة ودمعتي اقرب شي لي ... حاولت اكسبهم مايحبوني اذا جلست على كنبة يقومون عنها كاني نجسة .. اذا تكلمت مع وحدة ترد بنفس خايسة .... قمت التزم الصمت مع هذا سلفتي مستمرة بصغر عقلها ونقزاتها وخالتي معاها .. انا ادري هم يبوني اجلس بغرفتي ماطلع والله هذا هدفهم عشان يقولون لزوجي هي انطوائية لان زوجي كان متزوج وقالوا عن طليقته هالكلام .. مع العلم طليقة زوجي كانت تتجنبهم وتجلس بغرفتها ماتحتك فيهم وماخلوا كلام ماقالوه عنها طفشوها ... والحين الدور علي والمصيبة قاموا يذكرون طليقة زوجي بكلام زين بعد ماكانوا يسبوها ... شوروا علي .. من امس ابكي حرقوا قلبي بتصرفاتهم باسلوبهم بنفورهم مني بكرههم لي بدون سبب والله انقهرت مع اني طيبة وقلبي مايشيل على احد


امس شفت بنت اخت زوجي بالبيت عندنا وكنت جالسة بالصاله ومرت من قدامي ولا سلمت وطلعت من الباب رايحة مشوار مع ام زوجي وامها بعدها جلست لحالي اشرب قهوة وطليت في غرفتي شوي الا على حسهم راجعين .. قلت لازم اكلمها ليش ماتسلم وش البي جاها مني هذي اول مرة اقوي قلبي واواجهم رحت الصاله لقيتها جالسة لحالها دشيت وسلمت ناظرتني بعدها بالغصب قامت وسلمت انا هنا ضحكت قلت ليه ماتسلمين وش اللي بيني وبينك وجلست جنبها وتقعد تقول كلام تافه واعذار اني متكبرة واني اشيش زوجي واني ضريت سلفاتي قلت بوش ضريتهم عشان احسن منهم قالت لا انتي اقل منهم انتي جديدة وهم من سنين معنا فكينا من شرج ولاتنقلين حكي قلت لمنو انقل اذا انا ماكلم احد من عايلتكم قالت انا لازم اسجل كلامك انا ماثق بيك انتي راعية مشاكل وانا مابي اكلمك قامت تبي تلبس عباتها ضغطت ع نفسي ولحقتها اكمل كلامي قلت اذا بتسلمين من ارحين قولي اذا يوم تسلمين وعشرة لا الافضل ماتسلمين قالت مومهم وراحت ... جلست مع ام زوجي وكلمتها بهدوء قلت انا بفهم انتوا ليه شايشين علي اللي فاجأني ام زوجي قامت تصيح وتعلي صوتها وتنادي زوجي انا هنا خفت وجلست زوجي بينا وقعدت تقول عني مافهم واني اتمشكل مع سلفتي واني كذابه .. هنا انا استمحت من زوجي اتكلم ورديت عليها قلت انتي وش عرفك بالخلاف اللي بيني وبين سلفتي قالت هي قالت لي قلت يعني اغتابتني قالت لا ماقالت شي ( والله العظيم نقلت لها الخلاف بطريقة كذب ) قلت كل هالكلام موصحيح انا اقولك الخلاف قامت تصيح بوجهي وتقول هي عندها كلامك بتلفونها وقلت وانا بعد عندي الكلام ماراح تخوفني .. انتي سمعتيها يوم اغتابتني ولما بدافع عن حقي تصيحين علي تراك ظلمتيني قامت تقول تهبين ويهبيج الله المهم زوجي سكتني ودخلني غرفتي وقال كلمة زيادة طلاقك الليلة وهي اسمعها تصيح من ورا الباب تقول عني كذابه وراعية مشاكل ... انا جلست ابكي لانها مارضت تسمعني وسمعت سلفتي اللي هي سبب كره العايلة كلها لي وخلافاتهم معي منها ... سكت شوي ثم خرجت عند ام زوجي لانه طلب مني اعتذر قلت انا ماغلطت امك اللي ماتبي تسمع اللي عندي تصدق الكلام .. قال انتي متربية .. خرجت عندها وسلمت وكلمتها قامت تصايح باعلى صوتها وطلبت منها توطي صوتها الموضوع مومستاهل وقلت انتي شفتيني لما سبيتها قالت لا قلت سمعتيني قالت لا قلت تعرفين الكلام المكتوب قالت لا قلت وش له تصدقين قامت تقط علي تهايم اني ماروح عازيمهم واني مغيرة زوجي .. قلتلها انا ماجيت العزايم من المشاكل ومحد يسلم قالت هذا طبعهم مانقدر نغيره قلت انا محد يهمني انتي غالية عندي وحسبة امي وحقج علي لو اخطيت .. واذا احد تكلم عني عندج قولي مالي شغل فيكم لاتسمعينه .. قلتلها عمري سبيت احد منهم عندج قالت لا قلت عمري اغتبتهم قالت لا قلت جاك مني شر قالت لا قلت خلاص انا البي عندي قلته وانتي وضميرك .. دشيت غرفتي بكيت من القهر والظلم بكيت من قوة سلفتي وحظها البي خدمها بكيت من خبثها وجلوسها مع خالتي وتتكلم عن خلافي معاها مع العلم ماقلت لاحد عن الخلاف وهي مشت على العايلة اللي مثل شاكلتها واغتابوني واتهموني بابشع تهمة اني انقل حكي لو فكروا بعقلهم شوي لمن بنقل الحكي اذا هم كلهم صاحبات ... بكيت وبكيت طول الليل وثاني يوم خرجت عن ام زوجي وماكلمتني ولا كلمتها جلسنا بالصاله بعدها جهزت شنطة زوجي بيسافر علاج الله يشافيه واستودعته الله ورحت بيت اهلي بجلس عندهم فترة علاج زوجي ... اللي انظلمت راح تحس بكل كلمة قلتها والله اكتب وانا ابكي من ضعفي امامهم وقلة حيلتي وافترائهم علي حتى لو تحاشيت عزايمهم وتجمعاتهم ... فرحانين انهم انتصروا علي يعتقدون انهم بحرب .. والله العظيم سبب هذا الكره وهذي الامور الغيرة والله لاني كنت احسن منهم والكل منبهر من سنعي بالعزايم ويمدحوني والكل يسأل عن لبسي وعن كل شي .... احس اني بدون كرامة احس خفت من خالتي ودي ابكي احس خسرت حبي لنفسي .. الكل ينفر مني والسبب كلام من خلفي وانا يزيد كرهي لذاتي .. اللي حست بمعاناتي تجاوبني تنورني شنو الخطوة الجديدة اللي اسويها مابي مشاكل و خايفة منهم والله اقوا مني لانهم مجموعة وانا بروحي ... على فكرة هدف سلفتي اني انحبس في غرفتي لان عملت كذا مع طليقة زوجي لحد ماانحاشت من البيت ورفضت ترجع من الظلم اللي شافته منهم والحين الدور علي .. ارجو منكم افتحوا قلوبكم وقولولي ..