معاناتي من الوسواس القهري....ارجوكم ابي علاج تعبت

بسم الله الرحمن الرحيم
السلام عليكم ورحمة الله وبركاته

انا يا بنات ولله الحمد والمنه من يوم ما بلغت لبست العبايه والشيله
والتزمت بالصلاه
وهذا الكلام صار لما صار عمري خمستعش سنه
المهم
لما وصلت مرحلة الثانويه
ما اذكر اي مرحله هل ثاني ثنوي ول....ما اذكر
المهم وانا اصلي جاني الشيطان الخناس وقالي
انتي ليش اتصلين بره(كنت اصلي في الصاله الي بره حجرتي) صلي داخل الحجره أحسن
ودخلت الحجره يوم فرشت سجادتي وييت ابي اصلي جان يقولي انتي ليش اتصلين اتركي الصلاه

مادري ليش حسيت بشعور داخلي وتركته للأسف

وبعدين ما اذكر اي يوم بعد ياني الشيطان وكان يقولي ترا فيه حد ورا الستاره
انا بكامل قوياي العقليه اقول محد وينه وهو يرد عليه يقول اكو
ومن يومها وانا موسوسه
طبعا بتقولون اشلون
لما قالي اكو تخيلت كأن ريال قاعد على كرسي يمب الستار
وكان ساكت شفتو الي بوضعيه المنصت لج ومايتحجه يسمع كل حجيج

المهم

صرت اتكلم مع هالريال مو حبا فيه لا لان ماكان حد في البيت يسمعني
او احد اشكيله همي
فكنت اشتكي له واتكلم واتكلم وما احس بنفسي واطالع بالساعه واكتشف ان مر
على كلامي وياه ثلاث ساعات او اكثر احيانا وأحيانا اقعد اتكلم معاه الين الفجر
ومرت الايام والسنوات وانا على هالحال طبعا هالريال انا ارتحت له لانه يحسن الانصات
على شان جذي استمر معاي فتره من الزمن

وكبرت معاي المشكله صرت اتكلم معاه...وانا قاعده في اي مكان او اتخيله حتى لو قاعده معاي اختي
واهلي وخواتي مايدرون عن السالفه

ومره من المرات وانا قاعده على مائدة الطعام واتكلم مع هالريال جان تمر اختي وتشوفني
قالتلي مينونه انا انحرجت

ومرت الايام وفي نفس المكان على المائده امي تشوفني ما اذكر حزته ايش صار
بس الي اذكره اني بيني وبين نفسي قلت الحين جدامهم يقولون مينونه انا لازم اتكلم من وراهم

وفعلا رحت حجرة المكتبه الي في بيتنا وسكرت على نفسي الباب وتخيلت الريال وقمت احاجي
ومرت الايام وانا على هالحال
وفي يوم امي بطلت الباب بعنف ودشت وتلفت يمين ويسار وشافتني واهي تقولي
مع مين تتكلمين وانا قلبي وقف من طريقة دخولها علي لأنها فجائيه وارتعبت وايد
واول ما امي اطلعت جنها ماخرعتني وقمت اكلم الريال

وبعديها بكم يوم

وفي نفس المكان حجرة المكتبه وانا متأكده اني سكرت الباب
وبعد فتره من الحجي ماحسيت الا الباب مبطل وابوي واقف مايطالعني يطالع تحت
ورفع راسه فديته احبه موت المهم رفع راسه وشاف الكتب وراح سحبله كتاب واحد وطلع
وسكر الباب وراه

والله العظيم يابنات اول ماسكر الباب التفت ابي اشوف الي اتخيله ولا مالاقيه يمكن ربع ساعه
وانا كنت فاتحه لابتوبي وكملت بحث في لابتوبي ولا كأني فيني شي
وبعدين يا الخيال

والله العظيم يابنات امي تصرفها كان غلط خلى المرض يرجع بسرعه بينما ابوي فديته
تميت ربع ساعه ما فيني الا العافيه

ترا والله ردة الفعل وايد اتأثر على المريض

وامي انا مسامحتها لأنها ساعتها ماتدري اني موسوسه ولا حتى انا ادري

المهم ويزيد عندي المرض بسبب رد فعل امي وصار الريال الي اتخيله
بدال مايسمع عدل ومايتكلم صار يتكلم ويقولي اووووووه كأنه متلعوز مني

وصرت اتخيل خواتي او معازيم ياو بيتنا اذا فيه كلمه ماقلتها حق وحده من المعازيم
او خواتي او اي احد اقوله في الخيال يعني اتخيله واتكلم معاه

وسرت لما اتخيل خواتي كنت كل ما ابي افهم وحده موضوع يقاطعوني ومايخلوني اكمل
وهكذا

وبعدين تطور الموضوع وصار مثل صوت يقولي شفتي هذي ايش سوت فيه وانتي صغيره (يقصد اختي)
وبعد يقولي امج مامنها فايده مابتغير معاج شفتي تعاملها وياج ويكبر الامور وووالخ

وبعد فتره لما يات سنه 2011 صار يقولي امج مامنها فايده اقتليها
أنا ها انا اقتل امي لا مستحيل وبعدين فتشت عن عقوبة القاتل
مذكوره في القرآن ان الله بيجهز له عذاب في جهنم وبيكون ملعون ومحروم من رحمة الله وبيخلد في جهنم والله بيكون غضبان عليه اهني قلت لو قتلتها بيسير فيني جذي وانا ما استحق

قلت بس يكفي لازم اعلم امي انروح انا وهي مستشفى الأمراض النفسيه

كلمة حق....ترا دكاتره النفسيين مايعالجون المرض لا بس يعطونج طريقة تعامل مع المرض فقط وللأسف

المهم

رحت انا وامي وابوي للرياض عند الدكتور طارق الحبيب
وانا كنت ابي اقول حق الدكتور اني فيني انفصام في الشخصيه(كنت ظانه جذي)
وكنت مييييييييييييته بجي لانه وانا عند الدكتور ابي اقوله عن حالتي
جان امي اتكلم واتقوله عن اهلها اتقوله امي جذييييي وابوي جيييي وخواتي جييييي وخواني جييييي
امي عدد افراد اسرتها وايد وتمت فتره طويله تتكلم معاه وانا داخلي نار لأني ماصدقت اني اكون عند دكتور اقوله عن الحاله الي كنت فيها اطالع ابوي وراي ابيه يسكت امي مافي فايده

والدكتور يطالعني بنظرة شفقه ويطالع امي ويسمعها ويرد يطالعني بنظرة شفقه وبعدين يطالع امي وهكذا الييييييين امي خلصت الدكتور عباله عندي اكتئاب وكتب لي دوا للاكتئاب وانا والله مافيني اكتئاب بس كان فيني مثل الحررررره
ابي اقول مشكلتي تقوم امي ترغي ذاك الرغي اليييييييين ماقالت بس

اي نسيت اقولكم ان قبل لاندش على الدكتور كنا عند وحده اهي الي تكتب التشخيص وبعدين اتحولنا على الدكتور

وبعد ما صارت اللويه الي قلتلكم اياها الدكتور قرى الورقه الي هي حالتي وقالي انتي الحمدلله ماعندج انفصام انتي الي عندج وسواس قهري قلت الحمد لله
وكتبلي علاج اسمه زايبريكسا

وردينا الدوحه الحمدلله

والزايبريكسا كانت خمسه ملي غرام

بس امي قالت مانقدر كل مره انروح الرياض خل نروح دكتور في الدوحه احسن
ورحنا عند دكتور سوداني وكلمناه اننا نبي نستمر معاك وقلناله عن الدوا الي عطانا اياه هذاك الدكتور
وقال خلاص استمري على الدوا وانتي لازم ماتسترسلين في الكلام مع الوسواس وحقريه
بمعنى إني أقول إنت صوت حقير إنت حقير وهكذا
ومرت الشهور ومادري كم المهم ان الريال الي كنت اتخيله راح ولله الحمد والمنه
بس الي تم معاي اني ساعات اتخيل خواتي واحاجيهم او اتخيل خوالي وخالاتي وامي
ومعاي هالشي لين يومكم هذا اعاني منه

احقر اي يروح شوي بس ارجع اسوس وهكذا

ونسيت اقولكم حاولت ارجع للصلاه ما كنت اقدر لان الوسواس يشتد علي

اي نسيت اقولكم ان الدكتور طارق الحبيب قالي اني ما التفت للوسواس بس ماقالي ايش اسوي بالظبط
بينما الدكتور السوداني قالي بالظبط شاقول(فيها حكمه عند الله ما اعرفها)

وبعد فتره لما لقيت ان الدوا الي خمسه ملي غرام مافاد معاي وصرت امتن منه
قلت للوالده ورحنا الدكتور وقلناله وقال بزيد لج وزاده خلاه عشره ملي غرام

الحين صارت الهلاوس السمعيه والبصريه اقل من قبل كانت وايد عندي بس شي بسيط لا يذكر
بس لسه فيه يعني ساعات كأني المح حد بس انا ماخاف لأني تعودت اعرف انها خيال مو صج

وتميت فتره لا طويله ولا قصيره من يوم ما خذت الي بو عشره مليغرام

بس بعد الوسواس ماراح
ودي يا بنات ارتاح منه واكون انسانه طبيعيه حتى نومي مب عدل
أول كنت انام الساعه تسع واقوم الساعه ثلاث الفجر اصلي واروح المدرسه على ايام الثانويه

بس الحين عشان رمضان والسحور وصلاة الفجر سرت اسهر
انا ماكنت جذي كنت بني آدمه طبيعيه جدا
وكنت اقرى قرآن ويوم ما هديت الصلاه هديت معاه القرآن والسبه الشيطان الخناس

المهم يا بنات ابي علاج أكيد وفعال وأنا أدري إني بلقاه في القرآن الكريم
بنات أبي رقيه شرعيه حق الوسواس القهري والله تعبت منه ابي شي يخليه يروح

أول شي في شوال آخر شوال التزمت صرت أقرأ قرآن وأصلي الصلاوات الخمس
لو عندكم شي زياده اسويه يا ريت تقولونه لي
الحين ابتعدت عن الموسيقى والمسلسلات والأفلام بأنواعها
أدري بتقولون شغلي وقتج انا حتى لو اشغل بعد أوسوس
ودي أذوق طعم الإنتصار إن شاء الله ثم اتكونون أسباب لشفائي
وايد ادعي ان الله يشفيني صج احس بالراحه والإطمئنان وارجع اوسوس
اشلون يروح بس علموني ايش اسوي
هل فيه دوا ثاني غير الزايبريكسا اقدر آخذه
اي ترا بعد الدكتور السوداني كاتبلي فيتامين دال
بس بعد مايروح
أملي في الله ثم فيكم يا كويتيات انكم اتساعدوني لوجه الله

أنتظركم بفااااااااااااااااااااااا ااااااااااااااااااااااااا ااااااااارغ الصبر:eh_s(11)::eh_s(2)::eh_s(2)::eh_s(2):