مرت سنه .. زفرة بالصدر طلعت
اغنام - ابل - دواجن - طيور
السلام عليكم ورحمة الله وبركاته
اسعد الله اوقاتكم بكل خير
قصيدة لها كم شهر .. لكنها زفرة كانت بصدري و طلعت
مرت سنه و اللي على البال فالبال
.. تحبس و اذا هلت تهل بغزاره
مرت سنه تسقى مراديم و ثقال
.. تاره على بالي و فالعين تاره
مرت سنه و حبال تحناني طوال
.. متخالطه حزن و ضياع و حراره
مرت سنه عديتها هلال بهلال
.. مرن تقل فالعين جمرة زقاره
الموجع هلالين و هلال شوال
.. و التسع اهله بعدهن قاع قاره
مرت سنه و سهالي الجرهد سهال
.. مامرها نبت الربيع و خضاره
متقطع متني من ثقال الاحمال
.. و كن نحري لاهل البواريد شاره
ناطحت وجه الرامي مناطح رجال
..اسمع وحي رميه و اشوف الشراره
متنشق ملح الفوارغ تحت لال
.. و النافذ بصدري و خلفي غباره
له فتق مظهاره وله فتق مدخال
.. مع كل مضرب طلقه انزف غضاره
واليا تمثنى صدري النافذ انهال
.. و اقف بعدها وقفة جبال واره
كني جمل من بعد ما كنت جمال
.. عيني على السكين و اهل الجزاره
ياما غدا لي ماتحسفت في مال
.. ياما خسرت و لا اجزعتني خساره
لكن وجع هالمره يزلزل جبال
.. يقطع رجا راع الرجا من دياره
يالعين هلي دمعك دقاق و جلال
. هليه من فوق النحر بانحداره
خلي غزير دموعي الزرق تنهال
.. متحدره مثل انحدار الهياره
يا عين لو مرتني احزان واهوال
.. ما مرني حزن كذا له مرارة
ابكي ولا يبكي من البعد رجال
.. و لا يبكي المخفور ضيم الخفاره
ابكي على قطع العراوي والامال
.. متعلقه نفسي معك يا الحواره
كني دفنتك في حناياي ما زال
.. قبرك ندي و مواصله بالزياره
و اللي خلقك اني تجرعت سلال
.. و اللي قبضك اني كرهت البشاره
و اللي جمعنا عشرة شهور ما زال
.. حلم اليتيم اللي غفا بانتظاره
انتي بنيتي في حناياي تمثال
.. و عقبك قطع حيك عشانك زراره
يا وجد عيني وجد الايتام الاطفال
.. اليائسين اطفال حرب الحجارة
لا عم لا والد و لا ام لا خال
.. لا احلام لا مستقبل و لا نضاره
لا ظل لا تعليم لا طب لا اشغال
.. لا ري لا شبعه و لا اية حضاره
كانو و لا زالو يعانون الاهمال
.. و الذل و الحاجه و طعم الخساره
من حزنهم طغيان الاحزان يغتال
.. اية امل في اي باب استجاره
هذاك انا يصفقني الوقت بالجال
.. و اصفق على الكف اليمين بيساره
منا غديتي خطف قصاف الاجال
.. و منا انكسر عظم عصي الجباره
يا وجد عيني وجد من ماله عيال
.. و الا وجود اللي فقدهم بغاره
وا وجد عيني وجد من غاربه مال
.. ما مال ساجد مال رهن الاشاره
و الا وجود مشرد عاش رحال
.. تستقبله حاره و تنفيه حاره
متقطعه ماله على الثابته حال
.. يكويه طاري ربعته واسم داره
و الا وجود مقيد قيده حبال
.. ينهان من عقب السطا والجساره
باعوه بيع العبد فالسوق بريال
.. عقب الصداره كن فوقه وثاره
يا قبرها بشويش لا قمت تنهال
.. من حضني لحضنك قفلت الستاره
مرت سنه في كبدي يفوحن دلال
.. جمر قفص صدري تحضن وجاره
لها هدير و فوحه و صفق و اخلال
.. و تطبخ مثل طبخة حديد الصهاره
في كل يوم يزيدها الوقت مكيال
.. ماهيب سو الكيف و اوزن بهاره
واشرب فناجيل العزا كل فنجال
.. مره مثل مر انفجار المراره
اشرب و هو سم يتعزل تعزال
.. و امحق شقار اليا نظرته شقاره
مومن و لكن صعب ذكراك تنزال
.. و اصعب من النسيان شرب المكاره
و سلامتكم
lvj ski >> .tvm fhgw]v 'guj
