تصاريح لاعبي الاتحاد في المطار أمس

بسم الله الرحمن الرحيم
يا شعب الاتحاد أرجو منكم نسيان المباراة الفائتة ومؤازرة عميدنا بكل ما تملكون وتتفائلوا
أمس لاعبي الاتحاد وصلو للمطار وكانت نفسياتهم جدا تعبانة وتكلمت مع كل واحد منهم وراح أذكر اللي قالوه بالتفصيل:

محمد نور : اول ما وصل محمد نور مسكنا فيه لدرجة انو طيحنا شنطتو من يدو وقال يا شباب ما يصير كدا قلنالو يا نور نبغاها في الجوهرة وما ردعلينا ، قلتلو يا نور انت دائما توعدنا بس اوعدنا في هاذي المباراة طل فيني وما تكلم. طلع محمد نور للبوابة الخارجية وما اخذنا منه لا حق ولا باطل.

طلال العبسي: طبعا طلال العبسي اهملوه الجمهور اول ما خرج وانا رحت لو وكلمتو. قلتلو يا كابتن طلال انت لاعب على عيننا وراسنا لكن مستواك اليوم كان هزيل. قالي ما الله وفقنا لكن نتمنى المباراة القادمة التوفيق وانا مالي دخل بالخسارة اليوم السبب تكتيك المدرب. قلتلو الله الله بالروح المباارة الجاية. قالي احنا ونور شي وخالد القروني شي ثاني.

عبدالفتاح عسيري: ما رضي حتى يسلم علينا وكان متعالي ومتكبر جدا لدرجة انو قال لواحد من الجمهور مين انته عشان تحكم على عبدالفتاح.

عبدالرحمن الغامدي: لم يتلقى اي تحية من الجماهير بل اشارت بعض الجماهير عليه بالفاشل ( الله يهديهم المفروض نرفع المعنويات )

فواز القرني : اول ما طلع كان في رجال شايب قالو يا فواز اضبط حالك ترا الاتحاد مو لعبة بيدك. ( اذن من طين واذن من عجين )

محمد الدميري: كلمته وقلتله يا كابتن شد حيلك قالي والله العظيم كل همي اني ارضي الجمهور لكن اليوم كان علي ضغط كبير خصوصا من الجهة اللي لعبت فيها الشوط الثاني لكن اوعدكم في الاياب انو ما احد يعدي من محمد الدميري ( هذا المطلوب يا كابتن أناشهد انك انتحاري )

محمد ابو سبعان : قلتلو يا كابتن الفريق امانة برقبتكم قالي الفريق امانة برقبة القروني روح كلمو انا مالي دخل لا تجي تكلمني.


خالد القروني : قلتلو يا كابتن الفريق امانة برقبتك قالي ان شاء الله الوعد الحوهرة وطالبتو بمحمد نور وتقدرو تشوفوني على اكشن يا دوري وانا اطالبو وفي مقطع لأخ منزلو هنا بالمنتدى بعنوان الجمهور يحاصر القروني في المطار انا ظهرت فيه لابس تيشيرت محمد نور واقولو نور أساسي.( القروني وضح عليه الخوف )


أسامة المولد ومحمد قاسم لم يحضرو مع البعثة
ماركينهو ذهب للرياض لملاقاة زوجته ليوم واحد وسيعود للتدريبات



دمتم بود،،،،،،

:::flag::::::flag::::::flag::::::flag::::::flag::: :::flag::::::flag::::::flag::::::flag:::