قصتي مع سرطان الغدد الليمفاويه

رحلتي مع المرض



ها أنا اكتب رحلتي مع المرض ومعاناتي
بدت من ...

......:مريم اليوم بوديج المستوصف تسوين تحاليل
مريم: يوه يبا خلها بعدين مالي خلق
ابوي: بتروحين وانتهى الموضوع

اعرفكم بنفسي
مريم بسن الزهور عمري 17 مواليد 1997

اصبت بالمرض بسن صغير

رحت المستوصف عشان اسوي التحاليل
كنت وقتها اكح الدكتوره قالت تبي تسوي لي فحس سريري
بعد الفحص قالت تسمع صوت ولازم اسوي اشعة اكس
رحت سويت اشعه وتحاليل قعدنا انا وابوي ننطر الاشعه

ابوي: قومي روحي عند الدكتوره وانا اذا طلعت الاشعه باخذها وبجي

قمت ورحت عند الدكتوره ، اشوي وجاء ابوي
اول ماشافت الدكتوره الاشعه ع طول قالت تنويم

من اهني بدت معناتي مع المرض
الاعراض اللي كانت فيني
حراره دايم كانت مرتفعه
عرق شديد بالليل
كحه
حكه كانت بجسمي

تنومت بالمستشفى سوو لي اشعه بعدين قالو احتمال فيني درن "السل"
عيشوني بازمه اسبوع كامل بعزل خذو عينه من الرئه
بعدها قال الدكتور طلع خراج سببه حيوان "قطو ، جلب ، ارنب ، فأر"
سالني اذا بيتنا في احد من هالحيوانات قلت له لا مافي
طلعوني من العزل بديت اخذ مضاد حيوي اسبوع ولا نفع قال الدكتور الخراج كبير ومايطيب الا بعمليه
انا كنت مستشفى خاص قال الدكتور راح يحلوني ع مستشفى حكومي عشان ماعندهم دكتور جراح
كنلت اسبوعين و نقلوني مستشفى الحكومي دخلوني العنايه الدكتور اللي راح يسوي لي عمليه جاني الفجر
وقال لي راح يسوي لي العمليه المغرب وقال لي لازم اصوم ، صمت مثل ماقال

المغرب فالو لي اجلو العمليه وماسويتها الا السبت استئصال الخراج و ظليت اسبوعين بالمستشفى وانا كل يوم اسال متى بطلع وانا مليت وسويت عمليه منظار بالقصبه الهوائيه

يوم الاربعاء امي و ابوي زايريني من شفت شكل امي وانا ناقزني انه في شيء مو طبيعي
قبل لا ادخل المستشفى كان عندي انتفاخ برقبتي بدون عوار
الا ابوي يقول لي تدرين شنو هذا الانتفاخ اللي برقبتج قلت لا من شنو
جان يقول لي من البطاطس اللي تاكلينه و يضحك
سكت سكت بعدين قال ترا راح تقعدين بالمستشفى عشر ايام زياده
قمت اصيح قلت لالا مابي اقعد بعد خلاص انا مليت كملت شهر بالمستشفى
قال ابوي اللي تحمل شهر يقدر يتحمل عشر ايام ولا تبين تموتين انتي
قلت اي اي ابي اموت بس مابي اظل بالمستشفى اكثر من جذي
سكت سكت بعدين قال لي العلاج "كيماوي"
كانت صدمه بالنسبه لي ماتوقعت كلش
قلت كيماوي يعني انا فيني السرطان
قمت اصيح ، امي تهدي فيني
كان براسي الف سؤال
قال لي ابوي فيني سرطان بالغدد الليمفاويه سألت اذا حميد ولا خبيث
اي مرحله واصل جم نسبه الشفاء و شلون باخذ العلاج الكيماوي يعور ولا مايعور
قال لي ابوي الدكتور الاورام راح يجي لي باحر ويجاوب على كل اسالتي

ياني سالته جم نسبه الشفاء قال لي 90٪
السرطان بالمرحله الرابعه لانه تكمن على الرئه كلها
العلاج ماراح يعورني راح يعطوني اياه بالوريد
قال خبيث قال لي راح تطلعين يوم الاحد راح نعطيج الجلسه
قال لي راح يطيح شعري بس مو كله
اتصلت على ابوي قلت له تعال اخذني
طلعت من المستشفى و الاحد رجعت تنومت و الاثنين عطوني الكيماوي
تعبت اشوي وصرت اخذ الكيماوي كل ااسبوعين
الخطه العلاج اخذ ثلاث جلسات واسوي اشعه على الرئه
خذيت ثلاث جلسات وسويت اشعه و الجلسه الرابعه اجلوها عشان صار عندي نقص بالمناعه
يوم رحت للجلسه الرابعه سالت عن الاشعه قال الدكتور الحمدالله في تحسن بالرئه و الغده انزلت
اول جلسه كيماوي خذتها ياتني حكه بجسمي مو طبيعيه ثاني جلسه رفيجت امي قالت لها بعد الجلسه ع طول اشرب ماي ست غراش ماي صرت اسوي اللي قالت و صارت امي تسوي لي عصير زبيب و شمندر عشان يرفع الدم عندي طبعا قبل لا اسوي العلميه حطو لي دم بعد الدكتور ماعرف انهم حطو لي دم الدكتور قال انا مضطر انزل نسبه الشفاء من 90٪ لين 80 ٪ لي 85٪
خذيت لحد الحين اربع جلسات باقي جلستين ويسوي لي اشعه على الرئه بعدها يقرر يوقف علاج ولا يكمل علاج جلستين زياده ولا ست جلسات
قال لي الدكتور النفسيه كل ماكانت زينه كل ماسرعت في العلاج ولازم تكون نفسيتي عاليه و احط البالي اني راح اتشافى واخلي املي بالله كبير
ادعو لي بالشفاء التام و العاجل