ذيبٍ عوا للذيب ياذيب الخلا رد القنيب=اهتزّت ضلوعه وجرّ عواه من شي اجزعه
السلام عليكم ورحمة الله وبركاته
موقف اثمر هذه الابيات
ذيبٍ عوا للذيب ياذيب الخلا رد القنيب
.......................اهتزّت ضلوعه وجرّ عواه من شي اجزعه
يندا جبين الحر من طاريه والعارض يشيب
..........................حتى قويّ الباس يلقى لو يشوفه مصرعه
كيف الصحيب انكر صحيبه والقريب انكر قريب
...................................شقٍ كبير ولا لقينا ياعرب مايرقعه
الطيب ماله بالمقابل غير فعلٍ فيه طيب
.............................هذا الصحيح اللي تخطّا مرتدين الاقنعه
مات الضمير وعقب موته يالوفا جرّ النحيب
................................هذي نتايج وقتنا هذي فعوله وسنعه
يفداك يابن العم من دسّ السّنا وسط الرويب
..............................يفداك عصبة مبغضينٍ للردى متجمّعه
ياذيب دام انك تجرعت المراره وانت ذيب
..........................حقٍ عليّه يابن عمّي دونك السم اجرعه
ماقد عشقت من الدروب الا العسيره والصعيب
.........................اصعب مشاوير الرجال اشوفها لي ممتعه
ياذيب دام انته وانا من قومٍ تضد الحريب
................................اطنخ وراسك للعلا مافيه شيٍ يمنعه
