أهلي مو راضين يزوجوني!!!

السلام عليكم، شلونكم بنااات؟ مبارك عليكم الشهر...

مابي أطول عليكم بدخل بالموضوع، انا عمري 28 مو متزوجه. مره وحده بس تقدملي واحد من زمان واهلي رفضوه من غير ما يشاوروني. الحين في واحد يبي يتزوجني بس اهوا مو كويتي ولا خليجي من دوله عربيه واهوا واهله مسلمين ويخاف ربه عمره 34 واهما ناس على قد حالهم يعني مستواهم المعيشي أقل منا. المهم، أهلي مو راضيين يزوجوني منه يقولون لأنه (مو كويتي، مستواه أقل منا، عاداته غير عنا، ولأن اهوا يقول اذا تزوحني ياخذني معاه أعيش بديرته ومتى ما أبي أقدر أزور أهلي).
حاولت اقنعه انه يعيش اهني بالكويت بس يقول صعبه علي ما يدور شغل وسكن.. ولا تنسوون معاش المقيم اهني 370-400. فا يعني اهوا قال انه وحيد امه وابوه وما يقدر يخليهم ويقول بسكني مع اهله.

الحين اهلي ما يكلموني لأني عصبت عليهم قلتلهم الريال ما فيه شي بس عشان مو كويتي ما تبون أتزوجه! وانا الحين عمري 28 خنقول محد يلي عقبه خطبني..أظل عانس يعني!؟
انا صليت صلاة استخاره 3 أيام وقريت سورة البقره وايد وللحين مرتاحه للموضوع الحمدلله.

انا أكبر وحده بين اخواني وخواتي، ومجابلتهم اخدمهم 24 ساعه وعمري ما شكيت. لكن اهلي كله يفرقون بيني وبين خواتي. انا قبل لا كنت أقدر اطلع ولا اروح ولا اكمل دراستي ماجستير ولا اسوق ولا البس. بس الحين خواتي كل شي يسوون على كيفهم محد يقولهم شي، والحين انا يوم كبرت بهالعمر وشافوا الفرق اللي سووه.. الحين او تقريبا قبل 4 سنين بدوا يعطوني سياره ويقولولي روحي طلعي ولبسي و روحي كملي ماجستير بعد هالعمر كله!!! وانا قبل يوم كنت بعمرهم بخاطري اسوي هالاشياء.. بس الحين خلاص عافك الخاطر عقب شنو مت وانا احن عليهم وكرهت الأشياء اللي كان ودي اسويها.
الحين كل بنات خالاتي وبنات عماتي وعمامي وصديقاتي متزوجين وعندهم اعيال.. الا انا.. الله يوفقهم ويسعدهم ما قلت شي بس الحين بعد ياي الدور على خواتي 2 كل وحده خاطبها واحد وناطرها تخلص الجامعه.

بنات عفيه قولولي شسوي لأن انا قلتلهم راح اتزوجه حتى اذا ما رضيتوا (بس جذي ادري قلبي ما يطاوعني اسويها) بس قلت يمكن يحسون.. بس للأسف كل يوم يحاولون يقنعوني إني أنسى.
مادري شسوي والله حدي تعبانه وما عندي احد :(