تجربتي مع عملية شد البطن وشفط الظهر والخواصر بالليزر

حبيت أفيدكم وأشارككم تجربتي مع عملية شد البطن وشفط الظهر والخواصر
بعد بحث طويل في الانترنت وزيارة عدة عيادات تجميليه استقر القرار الأخير باجراء العمليه بعيادة الزهير عند الدكتور أحمد المسلم
في الموعد الأول شرح لي الدكتور العمليه كامله بتفاصيلها وتم تحديد موعد العمليه بعد شهر
عملت كل التحاليل اللازمه
يوم العمليه وصلت العياده وكنت صايمه لمدة 8 ساعات
حضر الدكتور وخطط جسمي وعلى طول على غرفة التخدير
اتذكر لما وعيت من البنج كنت اتألم وأرجف من البرد.. كان فيه اصوات وناس منهم أهلي وزوجي بس ما أتذكر عدل
قعدت من النوم المغرب .. اتألم ألم شديد.. كحه مرعبه من اثر البنج.. بربيشين متعلقين من كل جهة من جسمي وكورسيه ضاغط جسمي لحد الاختناق
ايدي اليمنى تورمت من المغذي فبدلوها باليسرى
كان من الصعب انهم يلاقون وريد.. الا بعد عناء والم
زارني الطبيب المساعد وطمني وعطاني بعض التعليمات اللي ما اتذكرها من اثر البنج والتخدير
حاولت امشي بس مو اكثر من 3 او 4 خطوات طبعا كنت عطشانه ويوعانه بس كانو يعطوني قطرات من الماء تحسبا اني ممكن ارجع فكان كل شي تدريجي
في اليوم الثاني احضروا لي شاي و كوكيز
ايدي اليسرى صارت مثل البالونه ... غيروا مكانها ثانيه
بعدها عطوني الدوا مضاد حيوي وحبوب ضد التورم وحبوب مادري حق شنو وحبوب مسكنه
وطبعا ابرة لسيولة الدم... انا فيني فوبيا من الابر وكانت الابرة فلفل نااار تحت الجلد ولازم اخذ كل يوم وحده لمدة 5 ايام
مشيت اكثر اشوي وكان الالم يروح ويرجع بس الحركه وايد صعبه
زارني الدكتور مره ثانيه يذكرني بالارشادات اللي انا ما اذكرها ابدا
العنايه كانت روعه من ممرضات ودكاتره والعياده وايد هاديه
في اليوم الثالث شافني الدكتور المناوب وكتب لي خروج
اهني بدت رحلة الرعب هههه ترا ما عليكم انا جبانه
سميتها رعب لاني في البيت ما عندي ممرضه احس معاها بالامان
زوجي واهلي ما قصروا وطبعا على راسهم زوجي اللي ما تركني ولا لحظه والحمدلله بس الممرضه غير .. متدربه ومتمرسه عالرعايه فأحس بالأمان اكثر
كنت احس كل من يقرب مني او يحاول بساعدني انه بيمسكني بالخطأ ويعورني
موعدي بعد 3 ايام والحمدلله اليومين في البيت عدةا على خير الى ان أتى موعد الشاور
لازم اشيل الكورسيه .. عذاب وألم ... شلته واخذت الشاور
وانتظرنا لي المسا علشان موعدي مع الطبيب
جسمي بعد ما شلت الكورسيه ارتاح اشوي بس بدا الم ظهري لا يحتمل ... ما اقدر اوقف ولا اقعد ولا انسدح من الالم
رحت موعدي وغيروا على جرح عملية بطني .. الحمدلله ما حسيت بالألم لانه مكانه متخدر ... بس ظهري وخواصري ألمهم شديييد وجلدي مسود ورضوض بكل مكان
شافني دكتوري وكمل على تغيير جرحي مع طبيبي المساعد والممرضه
سألني عن مقياس كمية الدم في كل بربيش وقال لي تمام... راح نسيل واحد والثاني الاسبوع اللي بعده علشان نضمن نظافة الجرح (الشد)
طبعا كنت مرعوبه .. قام الدكتور يلهيني ويسحب البرببش... ألم البربيش ما صار ولا استوى... اكثر من طلق الولاده .. يا ربي .. بكيت مثل الطفله واستغرقت شيلة البربيش دقيقه .. بس دقيقه عن ساعه
لمجرد خلص الدكتور انتهى الألم.. بس كنت لا زلت أبكي .. هههههه أحاتي وأفكر بالثاني
المهم رجعت البيت مع الم ظهري ولبست الكورسيه مره ثانيه واكتشفت انه فعلا الكورسيه يضغط ويكتم النفس... بس بنفس الوقت يشد ويخفف ألم الظهر والخواصر.. فيهون الضغط بالنسبه للألم
أنا حاليا في اليوم الثامن من العمليه .. والقادم اجمل بإذن الله.
وان شاءالله أكون أفدتكم :eh_s(9):