خاطرة عن وجود اسم محمد نور في اللجنة الرباعية اذا كان صحيحاً

السلام عليكم ورحمة الله وبركاته وشهر مبارك على الجميع وكل عام وانتم بخير
يا سادة يا كرام .. بغض النظر انت مؤيد والا معارض القرار إذا كان صحيحاً

للمؤيد >> انت بتشوف انه محمد نور خبير آسيا وما ينقصه شي ليكون في اللجنة .. والتاريخ يشهد له والخبرة تشفع له .. وهو لاعب كبير وعاشق للكيان لا يختلف عليه اثنين في ذلك .. وطبعاً انت تثق انه مستحيل يجامل نفسه او غيره على حساب الكيان

وللمعارض >> انت بتشوف انه اللاعب هذا اخذ اكبر من حجمه ويتدخل فيما لا يعنيه .. وكيف تجي دي (وهو لسه يلعب انه يقيم نفسه بصفته عضو في اللجنة) ؟؟ .. وانه رجوع للوراء وعودة للشللية وتحكمه في النادي

واعتقد انه المؤيد والمعارض كل واحد عنده ادلته ليثبت كلامه .. واعتقد انه المؤيد والمعارض لا يمكن انك تشكك لمحبتهم للكيان .. ولو كان عتريسي والا من المطانيخ المفروض نكون اخوة في هذا النادي اخوة في محبة العميد .. على الرغم من كل الاختلافات .. على الرغم من كل الاتهامات اللي نسمعها من جميع الاطراف
المفروض ما نصدق وما نزحلق الا الامور اللي توحد الكيان وبس .. واي خبر يفرق الاتحاد ما نصدقه ونكذبه مباشرة

انتم مسلمين المفروض تكونوا كالبنيان يشد بعضه بعضاً .. غير كده جمعكم هذا الكيان العظيم .. ليش كل واحد يهد اللي يبنيه الثاني .. ليه ما تكون كلمتنا واحدة زي اسم فريقنا .. ليش كل واحد يبغى الفضل لنفسه .. فين انا اتحادي والكيان فوق كل شي والا هذه بس شعارات

هذه المهاترات اللي تحصل احترم كل الأراء اللي فيها الا اذا وصلت للطعن في الطرف الآخر او السب او الشتم وقلة الأدب .. نحن في منتدى يمثل نادي الوطن الاتي .. يرضيكم العواذل يتشمتوا علينا وعلى مواضيعنا وعلى ردودنا .. وترى ما يهمني انك تكون مؤيد أو معارض لأنه هذا قرارك لوحدك .. لا يجب ان يؤثر عليك احد في اتخاذه

انا مع كل واحد يقول رأيه ولكن بادب واحترام .. انا احب الاختلاف في الأراء بس بشرط تظل الأخوة .. انا مع كل اللي حاصل من الاتهامات والاختلافات والنزاعات والشغل اللي من تحت لتحت اللي بيحصل في النادي ما يهمني الا انه يظل الاتحاد اسم على مسمى

والنتائج هي البرهان .. ولو تكلمنا للصبح .. ما راح يخلص الكلام .. فقولوا أرائكم لانها قد تكشف بعداً لم يخطر على البال .. ولكن لا تجبروا احداً على الاقتناع بها .. زي ما انت تشوف نفسك صح ومعاك كل الادلة والبراهين .. غيرك برضه يشوف نفسه صح ومعاه كل الادلة والبراهين

وفي النهاية اختم بقول الشافعي ( ألا يستقيم أن نكون إخوانا وإن اختلفنا في مسألة؟! )