المشاركة الأصلية كتبت بواسطة نايف بركه
[frame="7 60"][align=center]لا خانك الوقت , وبانت لك عذاريبك
إغنم زمانك .. وخلّ الوقت يبرالك
سو مابدالك وحاذر شخص يدري بك
تر لو درابك يعفّ الناس بأفعالك
واحذر تجامل على حسابك ومن جيبك
ترى الردي لو تطيح اليوم ماشالك
الناس ماتستحي بس اتّهذري بك
ماهمّها غير تتبع كامل أقوالك
ولا تامن الناس لو كثرت مناديبك
واحذر صديقك وحطّه دوووووم في بالك
رافق صديقٍ بذلّك مايضحّي بك
لا تقول هذا ولد عمّك , وذا خالك
ترى القرايب بعض الأحيان تقفي بك
حتى تموت مغبون بظيم غربالك
حاسب .. بكل الخطاوي قبل تودي بك
في معمع الغي وانته دوم في فالك
واحذر من الكذب يفضح لك آلاعيبك
مايسترك ثوبك المخيوط وعقالك
والظلم ,, إذا والفك , ثم صار من عيبك
بكره تشوف العقوبه تاكل عيالك
خلّك وفي مع جميع الناس تعلي بك
فدافد البيد تستحيي من نعالك
وراع الكبر .,. لو لفيته مايهلّي بك
لانّه يشوفك وهم في ليله الحالك
ناقص يحسب الجهل من ضمن ترتيبك
مايدري إن الحياة دروسها أحوالك
ولا قلّت أوراق بوكك ؟ قلّ ترحيبك
ويزيد حبّك ليامن زادت أموالك !
هذا يودّيك وهذا ودّه يجيبك ؟
ماهو غلا فيك !! كلٍّ يطرد ريالك
والعفن لا تقربه يعديك ويصيبك
ولو تطلبه ذنب قام يهادن أعمالك
ويزيد غلّك وإحباطك وتعذيبك
لا جاك ابن عم مايسأل على حالك
وإن كنت سالم من اللي قلت ياطيبك
تحبّك الناس بدبارك وبقبالك
الوقت هذا يبي له قلب يرسي بك
في موج الأقدار لامن صك في جالك
نايف بركه[/align][/frame]
