خنبقـــــــــــــــات اليوم في سطور
السلام عليكم ورحمة الله وبركاته
فالحديقة شفت البراقع وقمت اقلب وادور بالمراجع
قلت لازم اكتب لكم خنبقه بسيطه بعد انقطاع دام مدري كم ......المهم
كل واحد منكم يقنفل ويغنقل جهازه عشان ماتجيب فيه شركه الاتصالات العيد والجمعه
وتفتح شبكه جديده على حسابه
اليوم كان حافل بالنسبه لي بالمقالب والمواجع وشوف اشباه الضفادع
تعرفون اليوم جمعه واللي عنده قرابه حول الحي اللي هو فيه لابد من سالفه
ابك ترى الغدا عندنا بالاستراحه <<< وواحد من الربع يوم شافني انا وابوي طالعين من المسجد
:o
المهم وكعادة الشيبان ومفردها شيبوب :
شيبوب : فويلح رح شغل السياره بسرعه بنروح لاستراحه ابو فلان
فلان كلمه دارجه بين العرب واصول هذه الكلمه ترجع الى ( اقول فويلح بدينا بالحركات اللي مالها داعي؟)
طيب خلاص نرجع لسالفتنا :mad:
المهم قلت زين امري لله تعرفون الشيبان الله يخليهم لنا اذا عزمهم شايب يتسابقون وهم رايحين له
عشان السوالف وسعه الصدر وبالذات مواضيع الزواج من البنات الكتاكيت :confused:
المهم ( ياكثر كلمه المهم عندك بتخلص ولا شلون ؟؟؟؟ )
طلعت انا وابوي وماني رايق للشيبان اللي بواجههم
دخلنا وسلمنا عليهم
ولقيت التلفزيون شغال قلت ياولد تمام اقرب يمه بس وتفرج ابرك لك :confused:
ويقوم شايب يجرني.... الى اجلس جمبه .....يانهار مش فايت :o
شوي بعد كيف الحال .....طيبين........بخير...... إلخ
بدت سوالف الشيبان وخمبقتهم اللي يستانسون عليها :confused:
ابو منيف = شايب زاحف على بطنه ماعنده وقت
إيجابياته = مافي أمل يزعل ابد ابد ويخلي الجو ضحك وخبال شيبان
سلبياته = دايم يحب يبربر مافي أمل يسكت وماعنده وقت يحب المصادم مع الشيبان (درايفر ) يعني مايجامل
القوه = 40
المسمى = بيكمون قوي
سلاحه = حركة الفراشة
الظربه القاضيه = سبلكس خلفي
<<<<<<<<<<< ( فالح رجعنا على طير ياللي )
لا خلاص توبه
بكمل
المهم بعد ماعرفت لكم ابو منيف في سطور
ابو منيف : ابو فالح عندي لك مديره مدرسه ماتزوجت وتبي بس عريس ماتبي فلوسه تبي رجال وبس .
( أبوي فق خشته وكنه مبسوط ومخرخر مع الموضوع )
ابو فالح : على يدك يابو منيف نبي نرجع ايام الشباب 0
ابو منيف : بس انت نشيط وفيك حيل على العرس .....ولا بس بتاخذها وتفضحنا .؟
ابو فالح : افا عليك ....وش رايك تسابق وتشوف ... خاخاخاخاخاخاخا ( كنها خرفشه قراطيس مو ضحكه )
<<<<<< يقول بخاطره( هين الوعد بالبيت اذا مانكبتك انت وسوالفك ذي ماكون فويلح )
ابوي كنه حس باللي بقلبي
ابو فالح : فويلح وش رايك بسوالف ابو منيف ياحبه للمزح وسوالف الزوج والحريم خاخاخاخخاخاخا (......)
فالح : هههههه ايه صح بس خله ينبسط هو شباب توه .......... ( بتمتمه )
قمزت انا وقلت الشيبان خربوها بهالسوالف خل اروح عند التلفزيون ابرك
واجلس عند التلفزيون شوي الى صوت ابو منيف ينادي ( يالليل ماطولك هذا وش يبي )
سم يابو منيف آآآآآمر
ابو منيف : انتبه من سلك التلفزيون تراه مجروح
فالح : لا ماعليك اشوفه
اخذنا يمكن حوالي نص ساعه والشيبان يخنبقون وراي وانا مفهي بالتلفزيون
قاموا الشيبان للغداء يوم جيت بقوم وانا امسك السلك بيدي وانا مدري ............... :o
وهو ينفضني ذيك النفضه اللي خلتني ارقص واقول وش رايك الليله نسهر سهر ثاني :confused:
بس اشوى محد انتبه
******************************
المشهد الثاني :-
بعد ماوصلنا البيت اتصل فيني واحد من الشباب عازمنا على صاله بلياردوا وكافي
مريت واحد من الشباب ورحنا للصاله اللي أول مره اسمع فيها وماعمري جيتها
والثانين بالصاله ينتظرونا .........
طبعا انا نقطة ضعفي بحياتي كلها الاصنصير ( اللفت ) في روايه اخرى (المصعد )
هذا لو تنطبق الارض ماركبته اطلع لو للدور السبع طعش على رجولي بس ماطلع بالاصنصير
يمكن احد يضحك من هالشي وبالذات البنات ( ياخووووواف )
طبعا مايهمني كلامهم لان صار لي موقف بن ..... بالاصنصير
قفل علي مره من المراريت بين الجدران وطفى الكهرب والمروحه اللي تجيب الهو ى وحنا بوقت رطوبه
يعني زنقه مابعدها زنقه وجلست فيه حوالي 30 دقيقه كنها 30 يوم
ومن بعدها حرمت اطلعه
المهم يوم جينا عند الصاله اتصلنا بالشباب هاه وينكم قالوا بالدور الرابع ( يعني بدينا بشغله الاحراج )
انا اقول لخويي الرياضه تقوي البدن ...............وهو يقول اعصابك يالرياضي اطلع معي بس
وانا ماودي اقوله اني ماداني الاصنصير عشان مايمسكها علي
المهم طلعت مع الدرج واللي معي استحى يطلع ويخليني بالدرج قال بطلع معك
وطلعنا يوم وصلنا الدور الرابع وكل واحد يجر لسانه وهو يقول بقلبه ( الله ياخذك يافويلح )
لقينا الباب مسكر يعني ماتقدر تطلع للدور الرابع الى ........باصنصير وهينا المشكله برمتها
وانا وياه هواش وطلايب انا اقول خلاص هونا بنمشي وهو يقول والله لتطلع معي كلها دور واحد
قلت طيب خلني اشوف الاصنصير بالاول اشوف وسيع الواحد يقدر يمد فيه رجله ولا لا
والله واناظر والقى الاصنصير متر في متر قلت ياسلام سلم اقول فارق بس لو سكر علي بنهبل :mad:
المهم كبرت السالفه وخويي اتصل بالشباب اللي فوق وقال حنا بالدور الثالث وفالح مسوي زحمه يقول بنمشي عشان مايطلع بالاصنصير اخينا في الله
ونزلوا لنا بالدور الثالث
ولقيت مع خوينا اثنين معرفهم وعشان الاحراج قلت بصبر واطلع لا ياخذون عني فكره شينه
وطلعنا باللفت وانا معهم وعيوني طايره بالباب واقول بقلبي استر يارب وفكنا من الفضايح
وصلنا فوق يوم فك الباب احس ان ودي اركض واخذ لفه بالدور كله على رجولي تعبير عن نجاح المهمه :confused:
هذا وسلامتكم خنبقت عندكم عسى جازت لكم خنبقتي
عذوووب
