اثر الصدمه سيستمر

الكل منصدم من ماحدث من احداث غريبه داخل البيت الازق
1 اقالة المدرب سامي

2 الاعلام الاصفر القذر ومعرفته بأخبار الهلال قبل الهلاليين انفسهم

3 بيانات غريبه وكلام سخيف عن الاحداث هذي

4 تغريدات مزعجه من مصادر بعيده مثل تغريدات المدرب الروماني

اعرف ان اقالة سامي صدمه مدوية بالنسبة لي وﻷغلب المشجعين للهلال واستغرب من اللي يطلع ويقول انتم مشجعين لسامي وليس النادي .
طيب الحين اقالة سامي هل كانت فنيه ام تصفية لحسابات شخصية لاتجاوب هنا جاوب بينك وبين نفسك لانك اكيد بتكون صريح مع نفسك بدون مااحد يدري غير رب العباد سامي ابن النادي وقبل كذا ابن البلد والوقوف مع ابن البلد شي اكيد
مثال بسيط مدرب النصر السابق اول موسم معاهم ماسوا شي لادوري ولا كاس ولا اسيا ومع ذلك وقفوا معاه وهو اجنبي وجاب لهم بطولتين وحده منهم من امامك لاتجي وتقول لانها من امامنا اخذها لان الهلال اخذ نفس البطوله من امامهم العام الماضي ومع ذلك صبروا
السؤال دام مثل مايقولون انها مسأله فنية ليش ماصبرتوا عليه ؟
الرساله اللي وجهها بندر بن محمد للجمهور مع احترامي للجمهور هي لاتنقسموا عشان النادي ولازم نتحد من اجل مصلحة النادي لو ياسيدي في انقسام بين الجماهير كان مالقيتهم متحدين مع بعض ضد قرار الاقاله هذا والغريب انك ماتطرقت لعمل سامي فيه وابنك على طول تغريدات تهكمية على سامي وكأنه احد اعداء الدوله ولاكأنه سعودي وفعلا الفئات السنيه انت موفاضي لها لمرضك شفاك الله والمسلمين ولا كذا كان لقينا اظهرة وقلوب دفاع ممتازين مارحنا جبنا الحافظ ولا عطيف من الخارج العمر له احكام لك افضال محد ينكرها لكن آن الاوان للراحة .

المركز الاعلامي اللي يعطي الاخبار متأخره بعد ماتنتشر بسرعة الحريق على تويتر من متى والاعلام الاصفر يطقطق مع احترامي للتعبير ويتحدى وبلغة الواثق ان قرارات الهلال كلها عنده بتال جاب موضوع المدرب الروماني ولسه ماوقعوا معاه وكان متأكد والمريسل يتحدى اذا سامي عدم استمرار سامي وانه اذا استمر بيقفل حسابه واذا غادر ماراح يكتب 3 ايام بتويتر وصار الهلال ومحبيه مسخره عنده ومركزنا الاعلامي طلع امس واعلن الاخبار اللي الناس عرفتها من اسبوع على امل انها تكون مجرد اشاعات عشان تغطي صفقه مدويه للهلال تفاجئ بها الجمهور لكن حدث العكس وتم تأكيد اخبار الاعلام القذر الاصفر

عبدالرحمن بن مساعد ان اللي صاير بعهدك ماصار بعهد اخوك اللي كان اسوأ فتره للهلال لاانت اللي طلعت تدافع عن الهلال ولا الجماهير ولا انت اللي حضرت لمباريات الهلال الهامه وكل الوقت بره البلاد عشان الرعايه مجهود تشكرعليه بس تخيل اب بعيد عن عياله طول الوقت والاب بس يعطي فلوس كل شوي لعيال بيته ويسأل عنهم بالجوال بس ها وش سويتوا اليوم ايش تتوقع من عياله اكيد بعضهم بيضيع ويستهتر والبعض راح يحاول يصلح من اخوانه بس مو مثل اﻷب احضر حتى لو بالمنصه مو لازم جنب اللاعبين في الدكة حسسهم بأهميتك لانك انت اللي بوجه المدفع قدام الكل

الزبده يااداره واعضاء شرف وخصوصا بندر بن محمد احنا جمهور لم ولن يتفكك ودائما على الحلوة والمرة مع الكيان واقالة سامي ومشاكل الاعلام الحاصله هي جزء ممايحصل للكيان الهلالي وعمرنا ماكنا مع شخص على حساب النادي لكن ماحصل سيظل في ذاكرة الشارع الرياضي وخصوصا الهلالي لان اقالة سامي امر مدروس مسبقا وليست فنيه با شخصية ﻷن سامي لو مشكلته فنية بحته كان هو اول واحد اقال نفسه واعتذر لانه شجاع وشفناه لما كان يخسر يخرج للناس ويتحمل المسؤلية لوحده ولاقد قال اللاعبين خذلوني.

اللهم وفق الهلال يارب