صار معاي شيء كنت اقرأ عنه بالقصص

هلاا بنات

((طبعاً بقول السالفة مثل ماصارت
لكن الأسماء مستعاره للشخصيات))

بداية السالفة
بعيد الاضحى 1424هـ
تجمعنا بالديوانيه
فتعرفت على بنت من عائلتنا
اسمها شهد .. ماكنت اعرفها من قبل
جدتي قامت تقولي (إنها بتروح معاهم للمدينه) لزيارة الرسول الأعظم
صلى الله عليه وآله وسلم, بعد يومين

لمن شفت شهد .. في تجمع العيــد
اعجبتني هل بنت .. في حيائها واخلاقهاااا وعفتها ..
ولابسه عباة راس وملتزمه بحجابهـا

لمن سألتها شنو تتابعين من مسلسلات بالتلفزيون
قامت تقول انا ما اتابع .. بس قنوات دينيه

سمعت من جدتي إن اخووها ماخلاها تدخل الجامعه
من خوفه عليها ..
هنا قلت فخاطري حرام يحرمها من إكمال العلم
بس قلت ماينلام .. بلاوي الدنيا كثرت وله حق يخاف
لكن ولوو حرام عليه كذا

المهم البنت مو مزوجه...
قلت بداخلي ياحظه من بياخذها..
ملتزمه ومؤمنه .. جوهره هاذي البنت
((تمنيت اكون مثلهـاااا))
دخلت قلبي وحبيتها في الله

وفعلاً صارت رحلة المدينه
شهد مع اختها ليلى راحوا مع جدتي بالرحله

~~~~~~~~~~~~~~

السالفة ومافيها
بشهر ربيع الأول,, بالويك أند
كنا متجمعين (مثل العاده)
كل ليلة جمعه عماتي يتجمعون ببيت جدي ..
جدتي وعماتي وبناتهم .. جلسة نسوان
بس عمتي أم كمال قالت تعالوا تجمعوا ببيتي هل أسبوع

أثناء ماكنا جالسين ...
وكل وحده تفتح موضوع تسولف فيه
وكلنا مبسوطين
سمعت جدتي تقول بروح عرس شهد
انا على طول تحرك قلبي ..قلت شهد؟؟
الله لو تكون اهي العروسه .. فرررحت
بس بغيت اتأكد منو شهد ,, لأن الأسماء تتكرر
وبدون ما اسأل قالت جدتي للحاضرين
شهد إلي راحت معانا للمدينه بتتزوج
دعينا لها عند الرسول الله يوفقها ونشوفها عروسه
وربي أستجاب لنا

فرحت من كل قلبي للبنيه.
كأني انا الي بتزوج ,, قلت هنيئاً للي بياخذها

(محلاظه ترى أنا مطلقه, تطلقت قبل العرس..
يعني مالبست الفستان الأبيض .. ولا جربت يكون عندي بيت
وأعيش مع رجال أشاركه تفاصيـله)

المهم أكمل لكم السالفه
فرحت ,, يااااي شهد صارت عروسه روووعه

جلست افكر اروح العرس ولالا
بس مو مستعده ..
لابسه جينز وبلوزه .. وشعري منفوش شوي
وبلا مكياج !!

بس ماعليه ابي اروح اسلم عليها
واشوفها بفستانها الابيض وابارك لهاا


ولمن سمعت جدتي تقول ((حسن بيوصلني))
قلت إذا أبوي بيوصلها .. بروح معاها

عااد قربت من جدتي وسألتها المعرس من أي عائله؟
قالت (.......)
يعني المعرس من نفس عائلتنا
قلت اهااا ...

ومرت عمي أم سيف وعمتي أم مجتبى
قالوا بيروحون العرس, يسلمون على العروسه ويباركون لها

عمي وصلهم

وركبت انا وجدتي وخواتي زينه وفاطمة وزهره مع ابوي
دخلنا قاعة العرس وسبقوني جدتي وعمتي ومرت عمي للسلام عالعروسه
شفتهم على المسرح .. رحت لحقتهم .. وسلمت على العروسه وباركت لها

وانظاري متوجهه على العروس وأنا مبتسسمه وأدعيلها بالسعاده
وكنت لسه مابعد أنزل من الكوشه

وهنا كانت المفاجأه .. والصدمه !!
شفت ام طليقي عالمسرح...

وعلى طول رحت نزلت وهربت ,,
وأنا أقول (يارب ماشافتني)

يمكن تسألون نفسكم شالسالفه وليش أنا خايفه منها
مو مسألة خوف .. بس أم طليقي كرهتني .. مع إني ماضريتها بشيء
الخلاف كان بيني وبين ولدها ..
لكن هي بعد ما أنفصلنا .. قالت إلي بينا وبينكم انتهى
لانعرفكم ولا تعرفونا (مع إن احنا عايله وحده)

فهذا سبب خوفي وربكتي لمن شفتها
انا لو علي (صفيت النيه وقلبي أبيض)
لو هي مو ماخذه موقف تجاهي .. كان سلمت عليها وماخفت
بس هي صارت ماتحبني

لأن بعد ماتطلقنا رسلت لها
قلت لها أسألك براءة الذمه والعفو

قامت تقولي: ((لاتراسليني .. إلي بينا وبينكم انتهى))

~~~~~~~~~~
المهم جلست على الطاوله وانا افكر بكلام (أم طليقي)
وقلت بخاطري اكيد يقرب لها المعرس أو تقرب لها العروسه
(لأن عائلتنا كبيره .. وماعرف كل الناس فيها)

دقايق إلا أشوف ام طليقي جالسه جنب العروسه وتكلمها

قلت لحظه .. فاطمه .. ههه
تخيلي أنتي جايه برجلج لعرس طليقج أحمد
الله لووو هذا صدق عرسه شهل صدفه ..
كيف المقادير جابتني لهنـا
وأنا ما أدري عن شيء

وصرت شاكه بالموضوع ...
ودي أسأل الحاضرات شسم المعرس .. منو أهو المعرس

سمعت عمتي أم مجتبى تسأل مرت عمي أم سيف منو بتتزوج شهد ..
منو العريس؟
قالت مرت عمي ((احمد ولد فلانه)) ..
شكيت بسمعي؟؟؟ سمعت عدل ولا اتخيل !!
يالله اكيد امه بتتضايق لمن تعرف اني جيت للعرس

لانه لمن كان زوجي وعرسنا قريب (بـ 15 جمادى ثاني حسب مامحددين له)
كانت أمه تبغى الدخول يكون للزواج ببطاقه .

لأنه مو ولد (مطلق)
وقالت لي إنها تبي يكون الدخول للعرس ببطايق
(بدعوه يعني)
لأن ماتبي طليقته الأولى واهلها يحضرون العرس .. لانهم ضروا ولدها

~~~~
تذكرت كلام أمه معاي
فقلت في نفسي يالله ماكنت ابي اغث احد
هي ماكانت تبي طليقة ولدها الأولى تحضر لعرسي
والآن انا صرت طليقته الثانيه !!
واجي احضر لعرسه ...

شووي إلا أشوف أختي زينه على المسرح ترقص
صغيره عمرها 8 سنوات
قلت يالله أمه شنو بتقول إذا تذكرت إن هاذي اختي
بتقول متعمدين يسوون هل حركات عشان يقهرونا

لمن نزلت زينه قلت لها ماترقصين مره ثانيه
مايرضون

وبسرعه شفت عمتي ومرت عمي بيرجعون للبيت
قبل مايدخل العريس ..
فرجعت معاهم للبيت

وانا بعدي محتااره
لمن وصلت للبيت
أمي قالت لي أكيد أنصدمتي إن عرس طليقج
قلت لها يعني عرسه صحيح؟؟..
كنت شاكه وأبي أسأل

قالت لي أمي المفروض أبوك يقولك إن عرسه
ويقولك لاتروحين .. بس هو كان يظن إنك تعرفين

قلت الحمد لله .. ربي عوضه بوحده طيبه ومؤمنه
واناا دعيت له الله يوفقه ,,والحمد لله رب العالمين

لمن دخلت للبيت
كلمت وحده من قريباتي عن السالفه..
قلت لها شفتي الصدفه
وإلي صـــار .. إني أروح عرس طليقي وانا ما أدري

فقالت لي (إنه الولد مريض) ومو طبيعي
فيه شيء نفسي

وإن شهد (البنت إلي تزوجها).. عندها ضروف خاصة
هذا إلي خلاها تقبل فيه

وانه انتي بعد ما انفصلتي عنه
ظلت امه تخطب له بنات من عدة عوائل
وكلهم يرفضونه

فتذكرت كلام أم جاسم لمن قالت لأمي
(الحمد لله إن بنتك انفصلت عنه .. استغربت كيف رضيتوا تزوجونها من واحد مريض !!)


طبعاً بالنظره الشرعيه
لمن جلست معاه .. وكلمته .. كان يقطع بالكلام

أضرب لكم مثال . لمن سألته بأي مسجد تصلي
قال أ .. أ .. أأصلي بب بمسجد الل ال ..
أنا تبسمت وضحك بسري (ظنيت إنه مستحي ومرتبك)
قلت من حياءه وإيمانه مو عارف يتكلم (وصحيح هو مؤمن وطيب)

لكن لمن عقدنا وكتبنا كتابنا
عرفت إنه عنده مشكله بالنطق إنه يتأتأ

قلت أهو زوجي وبقبل فيه بكل عيووبه ...
وماحد كامل والكامل الله سبحانه

والمسأله ط مو متوقفه على النطق بالكلام
كلنا فينا عيوب ونقص

~~~~~~~~~~~~~~~
ويابنات حيل شكرت ربي
الحمد لله يااارب .. صحيييح الله مايسوي الا الخير
زواجي منه وانفصالي عنه .. كله فيه خير لي ..والحمد لله

~~~~~~~~~~~~~~~~~~

ياارب انااا أستغفرك

لوو مرت علي لحظه بالماضي سخطت فيها على قضائك او اعترضت
وقلت ليش ....

~~~~~~~~~~~~~~~~~~~~~~~~~~~~~~~

عاد أقولكم شيء بنات
لمن تطلقت منه قلت (وعسى أن تكرهوا شيئاً وهو خير لكم)

يمكن ربي يبي يحقق لي حلمي (إني أرتبط برجال نسبه يرجع لرسول الله
صلى الله عليه وآله وسلم)

لأن كنت أتمنى أتزوج سيد,,
والحمد لله ربي حقق لـــي وعطاني إلي أتمناه

وانخطبت .. بس خطيبي مو سعودي
ولازم إجراءات من الحكومه يوافقون على الزواج

أدعولي الله يسهل أموري