أشكي إلى الله دمعةٍ وسط عيني
عيت تحدر وقفت بين الاهداب
منها اتصدد والخجل يعتريني
اخاف قدام المخاليق تنساب
وانا اكابر والاسى محتويني
اضحك وفي قلبي ثمانين منساب
اضحك واسولف والبلا في كنيني
واصد عنهم لايقولون منصاب
وانا اتصبر والصبر ضاق فيني
تقطعت من كثرة الشد الاطناب
يادمعتي تكفين لاتفضحيني
الناس ماتعرف خفيات الاسباب
لولا الآمل في مابقى من سنيني
لصيح صيحة غافلٍ عضه الداب
