بعد زواج دام سنتين بدون حمل.. انا حامل

السلام عليكم ورحمة الله وبركاته ...

حبيت اشاركم بقصتي اللي ادري كلكم تشتكون منها (تكيس المبايض) او التأخير بالحمل بشكل عام .. ابي اشجعكم واقويكم .. يعلم الله الموضوع هذا كان حساس جدا بالنسبه لي بس اول ما خطر على بالي انتوا.. لان بيوم من الايام كنت يائسه نفسكم و فاقده الأمل .. ادري قصتي بتكون طويله بس تحملوا ابيكم تستفيدون منها عشان نشوف الكل حمل يارب :eh_s(17):

بداية قصتي قبل الزواج .. سنة 2007 او 2008 لما اكتشفت ان فيني تكيس بالمبايض + خمول في الغدة الدرقية + لخطبة في الهرمونات يعني الذكورية كانت مرتفعه عندي وكنت اشتكي من غزارة الشعر في ويههي .. طبعا عدم انتظام الدوره. راجعت عن د. لطيفة الدويسان .. مشتني على الاثروكسين حق الغده و دافاستون لتنظيم الدوره + جلوكوفاج لتنظيم السكر في الدم وايضا يساعد في شفاء حالات التكيس. وقالت لي اراجع عند دكتوره تغذيه ولله الحمد نزلت بصعوبه 9 كيلوات وقطعت عنها ورديتهم وجنه العيد :eh_s(16):

المهم طول هالمده وانا مستمره عالأدوية اللي ذكرتهم ...

لين سنة 2011 .. تزوجت ولله الحمد ما حاولنا في البدايه لظروف نقل الشقه وتجهيزات ولويه .. حاولنا في نهاية هالسنة ولكن للأسف بدون اي فايده كنت احس بأعراض واستانس وريلي يستانس معاي واخر شي انكسرررررر من قلب واكره ساعة الدوره واليوم اللي يت فيه (استغفرالله) استمرينا على هالحال مده طويله .. كرهت نفسي وكرهت ريلي ... وصرت حساسه حيل. وطبعا الكلام اللي ايي من حمولتي قصه ثااااااااااااانيه ثانيه ... نغزات وتحرش وحنه وانتي وانتي ولو هذا وهذاك واللي ازوجوا بعدكم ياهم الثاني وكيت وكيت وانا حيل اكتئبت قمت اكل وزاد وزني حيييييييييييييييييييل ! استسلمت وخلاص حطيت ببالي اني ماييب عيال وقمت المح حق زوجي ان مابي اظلمك معاي ! تخيلوا لي هالدرجه ..

في سنة 2013 وعقب المحاولات اليائسة قررت اني اروح حق دكتوره معروفه بتأخر الانجاب امرأه مؤمنه تخاف الله وخلوقه واللي تبي اسمها و ارقام عيادتها عالخاص لان راح انعرف جذي من اهلي اللي هني ههههه ..

المهم طول هالمده كنت اراجع عندها مع ريلي سوينا تحاليل وريلي طلع عنده تكتل بالحيوانات المنويه يعني ما ينتقلون بسرعه وشي جدااااااااااا طبيعي شويه مقويات غذائية وبس .. انا على عكس ذلك التكيس والغده .. حاولت طول هالفتره تسنع لي اياها و تحن علي ان انزل وزني لان هذا شي ضروري وكانت تقولي والله لو تنزلين زون ما تحتاجيني ولا تحتاجين علاج.. لان هرموناتج بتتسنع التكيس راح يختفي والدوره بتتعدل والمبايض تتنشط. حاولت انزل وزني للاسف بس قدرت على 5 كيلوات .. المهم طول هالفتره ماكان في شي جدي بخصوص الحمل ولا يابت طاريه غير تشجيع ان انزل وزني .. ريلي زهق وعصب قال نقط فلوس عالفاضي بس مراجعات وماكو شي لازم نكلمها خلاص عاد !!

يه اليوم اللي كلمنا فيه الدكتوره وقلنالها احنا مستعدين .. قالت اكيد ماتبين تنزلين وزن بعد؟ قلت لها توكلنا على الله نبي نحمل شنو كانت الخطوات ؟؟ :

1- قالت تعاليلي ثاني او ثالث يوم من الدوره
2- ييت لها بثاني يوم الدوره وسوت لي سونار تشوف شلون شكل المبيض واذا فيه بويضات ومن هالكلام
3- بعد السونار عطتني (كلوميد) قالت استمر عليه لمدة 5 ايام مع ابر Puregon اعتقد كانوا 2 او 3 ابر .. قالت مابي ابلش معاج بشي قوي هذا شي خفيف عشان نشوف التبويض شلون يصير معاج + عطتني دوا نسيت اسمه بصراحه بس اللي تكون الحبوب نص بيض ونص دعم .. وقالت اخذ بس البيض عدد 7 او 8 نسيت
4- بعد هالابر والحبوب رحتلها ... سوينا سونار والحمدلله بين معاي بويضتين بحجم متوسط
5- عطتني بنفس الموعد ابر تفجيرية قالت لي اخذيهم باجر الساعه 6 (ركزوا على عالنقطه) وكان يوم الاربعا
6- قالت بعد الابره امتنعوا عن الجماع يوم وبلشوا يومين ورا بعض يعني يا الخميس من بعد الساعه ست و طالع او الجمعه والسبت .

قالت لي نقطه مهمه جدا ان بدون توتر بدون تفكير ومو بسرعه بسرعه .. ريلاكس وبالهداوه .. انا وقتها مافكرت وخليت كل شي على ربي...

قالت لي بعد تاريخ معين سوي تحليل دم .. عاد انا الله خير كودت بهالتحاليل ملوت البول ... جربت مره قبل التاريخ اللي قالت لي عنه طلع سالب سالب.. يوم قربت من يوم التاريخ قبلها بيومين جذي حللت بالبيت وطلع + !!!!!!!!!!! تعرفون انا ماكنت مهيئة نفسي اني احمل نهائياً من كثر ما فقد الامل استغفرالله .. دقيت على اختي رطنت بلغه ما افهمها من الوناسه مادري شقلت !!! وقلت حق امي و تشققت قامت تبجي !! -صار ثاني يوم بتاريخ 7-1-2014 حللت دم مع نسبة الهرمون طلع 380 او شي جذي وقالولي مبروك ...

شوفوا.. علاج بسيط وجرعه ابسط! ماحطت لي علاج اقوى قالت (خنجرب) ويوم قلتلها انصدمت ماتوقعت ... توقعت ان برجع ونزيد الجرعه الف الحمدلله يارب...

حبيباتي يا بنات .. الله سبحانه مايضيع صبر... الله سبحانه مأخرج والله خيره .. صارت لنا ضروف الله يعلم فيها .. نقلنا اكثر من شقه وانطردنا... ربي ماكان يبيني اتمرمط وانا حامل.. كل تأخيره فيها شي من الله سبحانه .. حبيت اشجعكم واخليكم تعيشون قصتي عشان ما تيأسون ..


والحمدلله على كل شي.. اللي يبي اي سؤال اي استفسار حياكم الله :eh_s(7):