عنايــــتي بشعري ! تعااالو
السلام عليكم حبيباتي
:eh_s(7):
حبيت افيدكم بتجربتي للعنايه بالشعر
بس بالاول هالتجربه لصاحبات الشعر الكيرلي او الجاف والي مايطول والي يبيله عنايه خاصه
وثانيآ تحملوا قرقتي P:
طبعآ انا شعري كيرلي وبرته ناعمه بس الي صج ذبحه كثرة الصبغ من عمري 14 وجذي وانا اصبغ وامي ماكانت تحب الصبغ بس الحنه وماتسوي وشعري كان طووووويل وايد بس من كثرة الصبغ والسشوار انتهى جد نعمه من الله وماحافظت عليها بالعكس بهذلته وقلت عاد مو مشكله رحت لدكتوره لو تعرفون كميه الحبوب والشامبوهات العلاجيه الي وصفتها لي وفوق كل هذا قالتلي شعرج لازم ينقص طوله هذا على مافي ماله لزوم !
انا استانست عالقص قلت يلا تغيير لووك وامي مسكينه تبجي وتقول لو مخليته علي والله مايصير فيه جذي طبعآ كانت تحني شعري وتحطله بهالزيوت وكله ضفاير وعلى ايدها شعري طال
ورحت مثل الخبله انطر بالصالون وامي تقول يلا بيتأخرون ماله لزوم قومي وانا اقووول لالالا بقصه احسن تغيير وعشان اعتني فيه
وانا قاعده تحت ايد الحلوه قلت لها ابي تقصرين شوي شعري لين الارداف كان وعلى قولتهم بخيل ما يطول غصب
والصدددمه يوم خلصت التفت ولا لقيتها حاشته حسبي الله على ابليسها ووصل لين جتفي او تحته بنتفه اول شي ما علقت لانه شكلي تغيير :eh_s(2):
ما خذيت ساعتين الا وانا بس ابجييي ابي شعررري ردوو شعري وامي تقول احسن تستاهلين
ومن يومها وانا شعري ما يطول لين صار عمري 18 حزتها خلصت سن المراهقه وكبرت شوي وقمت اهتم مثل باجي البنات بشعري عدل قمت ادور بالنت واشوف ماسكات واجرب ومافي فايده :eh_s(2):
لين رحت مره مصر ولقيت بمحل اسمه امتنان زيت الجرجير وطبعآ وصفاتهم كله اهمه يسوونها قالي ينبت الشعري ويخفف الصلاع ومن هالسوالف قلت يلا شورانا
وخذيت بعد زيت الجوجوبا تميت عليهم فتره وانا احط بهالزيوت واسوي حمام زيت وجد يا بنات شعري ولله الحمد فادت معاه هالزيوت وطااال ما صدقت من الفرحه حتى رفيجاتي لاحظوا هالشي
بس طبعآ مو شرط الا نستخدم من هالماركه لانه انا بعد موكل يوم بنزل مصر :D يعني تقدورن تاخذونهم من العطار تسئلون عن زيت الجرجير
وبالنسبه حق وبرته الي تعبانه لاني ما وقفت صبغ ولا شسوار
قلت ثاني شي بسويه عقب الزيوت بوقف صبغ نهائيآ وسشوار مو لازم كل يوم او يومين مثلآ اذا بغيت بسوي مره بالشعر واذا اعتنيت بشعري ليش ماتم على شعري الطبيعي بدال السشوار !
والشعر الطبيعي لونه يكون احلى مو لازم اجهد شعري بهالاصباغ على الاقل لازم عشان اعالج شعري !
ووقفتهم ولله الحمد والشكر
وثالث شي يا بنات الشعر يحتاج ولو مره بالاسبوع حمام زيت او حمام كريم وبخار للشعر طبعآ انا مو ملتزمه بهالشي بس لمن اسويه احس الشعره خقت عالبخار ههههههه وصارت حلوه
يعني اسوي كل ماتذكرت مثلآ كل اسبوعين او بالشهر مره
رابع شي استخدم سيروم كريستال وايد حلو وارتاح عليه شعري وصارت فيه لمعه شوي يرطب الشعر
وفي سيروم لوريال الصغير لونه برتقالي واااايد حلو يرطب الشعر يخليه حرير هذا ما استغنى عنه واذا الشعر منتفش يهدي
واستخدم بعد بديل الزيت بانتين جربت الي ضد التساقط خله شعري يهبببل بالكيرلي تكرمون اول ما اخلص سبوح احط منه شوي على شعري ولمن ينشف يصير وايد حلو كيرلي يهبل
خامس شي والي عرفته من الدكتوره والنت عامة التغذيه قالتلي الدكتوره شلون تبين شعرج صحي وانتي ماتهتمين بغذائج ! خلي ماك وهارديز يطولون شعرج :krkrkr:
قالت كثري خضروات وفواكه واكلي خوخ وكثرت من الخوخ فعلآ ولاحظت تغيير قل التساقط ( لان انا شعري كان يطيح الخصله بكبرها بعيد الشر عن القاريين ) واكلي بيض وشربي حليب قلت لها دم ضروووسي البيض ماحبه جان تزفني قالت مووو شرط تاكلينه بس اكلي شي من مكوناته البيض مثلآ الكيك الي تسوينه في البيت من مكوناته البيض اكليه ! قلت اوكى
وجربت وفعلآ التغذيه كانت لها دور وايد حلو لشعري ومو بس جذي حتى بشرتي واظافري كانت تتكسر بسهوله والحمدلله الحين احسن بوااااااايد
واخر شي اسويه والي اهو مهم جدآآآ يا بنات الاستغفااااار
انا قريت عن وايد بنات استغفروا بنية ان الشعر يطول او يخف التساقط و الصلاع استغربت اول شي وبعدين قلت اجرب شبخسر انا جذي جذي استغفر وان مافاد ع الاقل اكسب حسنات من الاستغفار وتنغفر ذنوبي !
وقمت استغفر بنية انه شعري يطول وترد له صحته والحمدلله والشكر لله النتيجه مرضيه
نصيحه مني لكم يا بنات وقفوا الصبغ ترى والله يخرب الشعر ما شفتوا حالة شعري شلون كانت وبفضل الله الحمدلله ردت صحته
وان ماتبون تمنعون حاولوا تقللون قد ما تقدرون والسشوار بعد اذا شعرج طبيعته حلوه سواء كان ناعم او كيرلي وما يحتاج قللي قدر الامكان :eh_s(4):
واعتذر على قرقتي واتمنى إني فدتكم ودعواتكم لي :eh_s(8):
