موقف صارلي بالجمعية لو كنتوا مكاني !

. تعالوا شوفوا الموقف اللي صارلي اليوم بالجمعية !
بنات اليوم كنت حيل مضايقة و رحت الجمعية المهم اول ما صفطت سيارتي ونزلت ولا أشوف وحدة بايدها ملابس ومصلات ومعاها بنتها تحوس بمصافط الجمعية تبيع مسكتني وقالتلي الله يخليكي انا وبنتي محتاجين والمؤجر بيطردنا اذا ما دفعنا 120 دينار هالشهر مادري ليش كسرت خاطري حسيتها صادقة مع اني ما أعطي وجه عادة
وشوفوا الحوار اللي صار
قتلها بجم القطعة الوحدة
قالتلي: ب5
قتلها : انا مابي بس بعطيج 5
قالتلي لا والله ابيعج
قتلها لا مابي (وصج اذا خذيتة راح يطيح بجبدي)
المهم قالتلي انتي شكلج طيبة وبنت حلال ساعديني وقعدت تدعيلي
مادري ليش حسيتها صادقة جان اعطيها10 ( ادري مو من صجي 😁
جان تزيييد وتستعطفني وتدعيلي قالتلي الله يخليكي عطيني زيادة انا محتاجة ترضين انقط انا وبنتي بالشارع
قتلها :ما عندي وصج ما كان عندي بالبوك غير خمسة وبروح الجمعية
قالتلي : بالله عليكي الله يخليكي ويحفظلك اهلك وحبايبك وتقعد تدعيلي و تحلف والله والله اني بنقط بالشارع ولولا الحاجة ما طلبت من احد
اسحبيييلي من البنك ابي 10 زيادة
انا : نعم 😳
جان أقولها انا طالبة مو موظفة وما عندي
جان تزيييد وتعلق
قتلها : دوري احد ثاني شمعنة انا ! وعطيتج ما في غيري
جان تقولي : لا انتي غير مبين عليك طيبة وتخافي الله ادري ما راح تخليني
طبعا انا بس جذي بفتك : اي اي انشاء الله بس ما عندي
جان تقول :انا واقفة عند سيارتك ناطرتك
جان اروح انحاش وادخل الجمعية وأي شنو لزقة😳
بعدين شريت الأغراض بالكي نت ورديت
ولا الاقيها عند سيارتي بالرصيف
اول ما شافتني قامت وقالتلي والله يا بنتي طول ما انا قاعدة ادعيلك
الله يخليكي بدي 10 زيادة قتلها ماكو ما عندي روحي بيت الزكاة
جان تقول رحت شهرين دفعولي وهذا الشهر ماراح يدفعوا لي
قتلها :ما عندي 10
قالت انزين 5 اي شي
وتقعد تدعيلي وحسيت عينها تدمع جان أعطيها 5
وقتلها عاد انتي صادقة ولا لا الله اعلم وبس
مادري بنات احس عطيتها ويه
ومن جهة ثانية أقول حرام يمكن صج
أنتوا شرايكم
على فكرة انا اول مرة اسويها😣 بس قلت لو صج محتاجة وتقعد تدعيلي فهذا شي زين وبنفس الوقت احس غلط