من طق باب الناس ينطق بابه (صوت وصدى)

السلام عليكم ورحمة الله وبركاته

هذه القصيده وصلت لشاعرنا عن طريق الواتس اب
يقول الرجال:

من لا سعى للمرجله في شبابه .. اليا كبر يتعب وهو مالقيها

ومن لا يقاسم فالطعام الذيابه.. يموت جوع ولقمته مشتهيها

ومن طق باب الناس ينطق بابه.. ويذكرونه في علومٍ نسيها

ومن لايفقد كل جابه وجابه.. لا جاته الزلات يصبر عليها

ومن لا يثمن فالمجالس جوابه.. الطيبه يبطي وهو يحتريها

واللي يضيع فالملاقا ركابه..يجلس ويتركها لمن يمتطيها

ومن لا يصد القوم ماينغزى به.. والنايفات يموت ما يعتليها

واللي يسولف في ظهور القرابه..اخير منه اللي تحني يديها

واللي يقيل في بيوت الخرابه.. لو تطرده منها يروح ويجيها

وان مات والا عاش محدٍ درابه..يجهل علوم الطيب لو يدعيها

ومن لا يهاب الناس محدٍ يهابه.. ويرضى بها من هو لغيره رضيها


واللي يحسب الرزق يؤخذ نهابه..اليا انهبوه القوم لا يرتجيها

ومن لا يفصل فوق جسمه ثيابه.. ياشين لبستها بعد يشتريها

والفعل يفرق والملامح تشابه.. والا المواقف غير من يحتميها

واللي كلامه سيف صدره نصابه..وقدام ينطق كلمته يحتسيها

وكلن تسجل سيرته في كتابه..اما لها والا تسجل عليها


اما مجاراة شاعرنا

يقول فيها :

جاء للمجارى في القصيد استجابه... وجزل الفرايد والسمان احتويها

وعلى الكلام الجزل جات الأجابه.. واقولها ..واطولها..واحتميها

الشعر هاجوس المعاني سرى به.. يبغى الجزاله والجزاله تبيها

يكشف عن الوضع الغريب!! الغرابه.. والكايده قلب الفتى يهتويها

والصاحب اللي طاب حضرت جنابه.. اهل الحميه والسلوم انتقيها

اللي تعز ان جات وقت الحرابه.. يبداء على الفزعه ولا ينتهيها

سيف"ليا جردتبه عن جرابه.. اهل القشر لاقبلت ينتصيها

وخاو الذي يدمح خطاه بصوابه..لايبدي الزله ولا يرتضيها

واللي ليا من غاب تفقد غيابه.. له رفقتاً بالطيبه يبتديها

واللي سوات الداب والسم نابه... ابعد ولا تمشي دروبا"مشيها

ناس تجيب لك القهر والكئابه... الله .. يامنا..ولا..يبتليها

والشعر غبه والهواجيس غابه... والجزل في الابيات منها وفيها


وسلامتكم

شعر سطام بن فهيد