تجربتي بالتلقيح الصناعي

السلام عليكم

ربي يرزق كل وحده بالضى الصالح باتم صحه وعافيه

وايد ترددت قبل لا اكتب موضوعي

بس قلت لازم افيد خواتي مثل ما استفيد منهم

بقولكم سالفتي من البدايه

انا ولله الحمد حملت على اول ولد طبيعي بدون اي تدخل طبي واستخدمت المانع الطبيعي لمده سنه لاني وايد اسمع انه الحبوب لها اضرار بالمستقبل

المهم بعد ما كمل ولدي سنه و 3 شهور قررت احمل ومن هاليوم ابتدت معاناتي

من هالشهر ودورتي معتفسه من شهر 12-2010

طبعا على بالي حامل لما تاخرت وحللت ماكو حمل وابتدا مشواري مع الحبوب اللي تنزل الدوره

صارت دورتي ما تنزل الا بالحبوب

سويت تحليل ماكان مبين انه في شي بالهرمونات

ثاني مره سويته طلع عندي هرمون الحليب ضارب بالعلالي

خذيت الحبوب مالت الهرمون ومافاد كانت تنزل الدوره هالشهر واللي وراه لازم حبوب

مالكم بالطويله بشهر 5-2012 صدري كان يعورني وانتفخ حيل حيل لدرجه كنت اشوفه بمستوى حنجي

بدون تفكير خذيت حبوب الهرمون ونطرتها تنزل ولا انزلت

جان اسوي تحليل دم علشان بدخل على دكتورتي وطلعت حامل وللاسف حملي ما اكتمل طلع مافيه نبض بالاسبوع الخامس واقف النمو اللهم لا اعتراض

انصحتني دكتورتي بالتلقيح الصناعي وزوجي كان حيل معارض

المهم

صادفت وحده ربي يجزيها الف خير انصحتني اني اسوي تلقيح صناعي لانها جربت الانابيب ولا نفع وبالتلقيح ضبط معاها وقالت دام اموري تمام فاكيد راح احمل لانها اهي مافيها شي بس زوجها عنده ضعف

قعدت اقلبها بمخي وولدي كان يسالني كل ليله ليش ماعندي اخوان وهالكلمه خلتني خلاص اتحرك كلمته عورت قلبي

طبعا زوجي حيل معارض ويقول الحمدلله ولد وكافي

قلتله ربنا يقول اسعى يا عبدي وانا بسعى معاك خلنا نسعى للعلاج وربنا معانا

المهم خذيت عنوان دكتورتها وللامانه الدكتوره مو معروفه رحت لها قلتلها ابي تلقيح لا تقولين علاج قالت اوكي وسوت لي التحليل وكتبت لي الابر المنشطه مع التفجير

زوجي يابهم من دوامه يعني وفرنا مبلغ الابر اللي بتكون تقريبا 100 دينار

والدكتوره نزلت لي الدوره وبلشت الابر واللي يقولون تعور بقولهم ماتعور صغيره حدها وفي جم مره رفيجتي غزتني اياها ومره زوجي

كانت ابرتين نجمعهم بابره وحده

رحت لها سابع يوم وكانت البيوضات تمام وعطتني ابره التفجير وثاني يوم سوينا التحليل حق زوجي وخذينا العينه ورحنا لها وسويت التلقيح ونمت عندها بالعياده ساعه تقريبا وبعدين طلعت

قالت خلال الايام اليايه كثروا جماع ومن لويه ولدي ماصار شي الا ثالث يوم ورابع يوم

وتبون الصج كنت حاطه في بالي انه ماراح احمل بس لله الحمد حملت

----------------

نيي حق الاسعار

عن نفسي ميزانيتي ماكانت تمام فعلشان جذي ما كنت بسوي التلقيح بس سعرها حده زين

يعني لو نحسبها مع الابر والعمليه والعينه كله ما يطلع 220 الى 250 دينار

واللي كنت اراجع عندها كانت قايله عمليتها 120 دينار بدون الابر والعينه

-------------

انا قلتلكم سالفتي لاني ابيكم ما تفقدون الامل بالله سبحانه وكل تاخيره فيها حكمه اكيد

وهذي سالفتي كلها وربي يتمم علي ويزرق كل وحده بالضنى اللي يملى حظنها وتفرح فيه

----------------

الدكتوره اسمها حنان ابو غيظ ومو عارفه اذا اقدر احط رقمها ولا لا واذا يصير بحطه بالرد بعدين

مكانها الفنار كلينيك بالسالميه

==============

سبحان الله وبحمده سبحان الله العظيم :yaaaaaarb: