إنَّما أمرُهُ إذا أرادَ شيئًا أن يقولَ لَهُ كُنْ فَيَكون
السلام عليكم يا بنات
انا كنت من رواد هذا القسم من اول ماتزوجت وانا ادخل واقرا مواضيعكم
مر على زواجي جريب 4 سنوات
من اول ما تزوجت انا وزوجي ننطر بيبي يملي حياتنا
ويكمل محبتنا
دايما كنا نتخيل اشكال عيالنا
اهو يقول بياخذون خشمي وانا اقوله بياخذون حلات عيوني
وهو يقول انا بدلعهم اخر دلع وانا ارد عليه اقوله لا راح تخربهم
شهر بعد شهر من تزوجت وانا كل ما تأخرت دورتي اقول يمكن حامل
وسبحان الله من النفسية اقعد ارجع وجبدي تقلب وراسي يفتر
وريلي يشتط ويشتريلي تحليل منزلي ويطلع ماكو شي
وكان الشعور عادي اي شالمشكلة يمكن الشهر الي بعده احمل
مرت سنة
اهني قلت ليش ما اراجع واشوف يمكن محتاجة حبة ولا ابرة تساعد
وبصراحة كنت حاطة في بالي ان احسن شي اخذ ابر واحمل بتوأم
صج كنت ياهل وحسبالي كل شي بكيفي
المهم اعرف وحدة تشتغل بالصباح وقالتلي عندهم خوش دكتور
قلتلها اوكي ماعندي مانع اراجع الصباح
كنت اقول لنفسي الحكومة متكفلة بعلاجي وبأدويتي
ليش اروح خاص وليش المخاسير
المهم رحت الصباح
وشفت الوضع الخايس اجانب وهنود وخيسة ولوية ولوعة جبد والسسترات نفسية خايسة
جنج ماخذة معاشها
المهم دخلت عالدكتور وسجلي جم تحليل اسويهم
الدكتور كان صغير مو كبير
ويحسيته يتمصلح يسألني وين اشتغل واذا عندي واسطة
المهم قالي لازم فحص سريري
انا اهني طقتني البوهة شنو يعني فحص سريري
قالي لازم هالفحص موش عايزة تحملي ؟ يلا روحي عالسرير
بقلبي اقول اشلون هذا ريال شنو بيسوي فيني
والسستر تقولي انا راح اكون معاج لاتخافين
المهم رحت وانسدحت
ولا تقولي شيل ملابس شيل
لحظة ياجماعة شنو شيل
جان تقول لازم لازم
المهم فصخت ملابسي الي تحت ورفعت قميصي فوق
ويالي الدكتور وانا مغمضة عيني من الخوف
قعد يفحص صدري وانا اغمض عيوني حيل وماسكة بالسرير
وبعدين قعد يفحصني من تحت
طبعا انا اهني مت
تمنيت الأرض تنشق وتبلعني
حزتها ماشفته يفحصني كنت اشوقه يغتصبني
المهم لبست هدومي اخذت اوراق تحاليلي وطلعت ركض عالحمام ارجع وابجي
هههههههه ورحت الريسبشن اسألهم عن الدكتور قلتلهم متزوج؟
قولولي لا
يامصيبتييييييي
قلت تووووبة تووووبة اروحله خلاص لازم ينسى ويهي
عطيتهم التحاليل وقلتلهم ابي موعد عند دكتورة
ويوم صار حزة موعدي رحت عشان اشوف التحاليل
ولا الدكتورة مو موجودة
ومافي إلا دكتور بس اشوه دكتور ثاني
المهم دخلت عنده وليتني مادخلت
انا توني صغيرة وتوه سنة مرت على زواجي
يشوف التحاليل بنظارته وبكل برود يثولي عندك عقم مبدئي @@
لحظة شنو عقم مبدئي
انتي ماتقدرين تحملين إلا بالعلاج لان ماعندج تبويض
وزجج عنده ضعف بالحيوانات
انا اهني انهرت
وطلعت من عنده ودشيت عند الدكتور الثاني عطيته تحاليلي
قلتله دكتور انا عندي عقم؟
قالي ليه ليه من آلك هالكلام لا يا ماما هو الهرمون نسبته نازلة بس في تبويض لكن ضعيف
وقلتله وزوجي اشفيه
قالي النسبة كويسة مش كبيرة اوي بس مش نازلة معدلها جدا طبيعي
آآآآآه عالصباح وعلى دكاترتهم الدايخين الي مايعرفون يتكلمون مثل الاوادم
المهم عطوني كلوميد
وانا حدي مستانسة
هياااا هالشهر راح احمل لا وبتوووم بعد
اخذت الكلوميد ورحت مراجعتي جان يقولولي الكلوميد سبب جيس ماي على المبايض ومايبين حجم البويضات
لحظة شنو جيس ليش واشحقه
وبهالشهر نزلت الدورة
اخذت تحاليلي كلها رحت لدكتورة عالية الفضلي
هالدكتوووورة طق طق عليها
وزززززحمة
لا ودايما تتأخر على مواعيدها بساعتين ثلاث
وماتعطيج حقج تدخل اربع حالات باربع غلر وتدخل كل دقيقة عند وحدة تسويلها شي
قلتلها دكتورة صارلي سنة ونص ماحملت
شافت تحاليلي
جان تقولي لازم عملية منظار 600 دينار عشان افحص رحمج
بل على طول دشت بالاعمليات
المهم عطتني كلوميد وقلتلها سببتلي جيس ماي وقالت عادي وبنفس الشهر نزلت الدورة
وعطتني موعد للعملية بس كشت فيها وخفت
راجعت دكتورة بالبراء سوتلي تلقيح صناعي مرتين وفشلت
قالولي عن دكتور بالجهرا
وقلت مو مشكلة اروح الجهرا واتعنا مو مشكلة
الله يعافيه زوجي ماقصر وايد تعب معاي
اتصلت عبى مستشفى العرف وقالولي الدكتور مواعيده بعسدة راح نحطلج موعد بعد شهرين
قلت مو مشكلة انطر
بعد شهرين شافني الدكتور منصور العرف
دكتور فااااهم في شغله وعارف شنو يسوي شاطر حيل وحاط ورا مكتبه برواز كبير كله صور يهال الي ولدهم ماشاءالله
ومكتبه متروس دروع شكر
عالجت عنده مدة طويلة وكان كل شي اوكي لكن الله ماكتب الحمل
سويت عندهم اشعة الصبغة وقولوا مافتحت الانابيب مسكرة
قالولي لازم نتأكد بعملية
سويت منظار والحمدالله كانوا مفتوحين
وسألتهم ليش بالصبغة مسكرين ثولولي لانج تتألمين وشادة على نفسج فتسكروا
والحمدالله طلع ماكو شي بالرحم ولا بالانابيب
سوالي تلقيح اربع مرات ولكن ربي ماكتب
وسوالي طفل انبوب وهم ربي ماكتب
والحمدالله عبى كل حال
بس اكثر شي يخلي الخاطر مكسور
لما اروح مع ريلي احلل ويطلع سلبي
اهني يعم الصمت لعدة ساعات اثنينا نبلم ونتنح
وانقول كتبة الله وراضين فيها
طبعا امي مابقى وحدة عيوز شعبية ماودتني لها
لا وبعد تاخذ اغلى من الدكاترة
دشيت على وحدة مصت مني 70 دينار على نتفة زيت زيتون دهنتني فيه وشوية لهوم واعشاب
وغيره وغيره من الحريم الي يألفون
رحم مقلوب
سدد
ضعف
ومسوية روحها حكيمة الحكما
واهي كل وحدة تدش عليها تقول نفس الكلام
المهم تعبت من الأبر
تعبت من العلاج
تعبت من الابر التفجيرسة
تعبت من السونار الداخلي
تعبت من نهب الفلوس
تعبت انتظار المواعيد
تعبت وتعبت
من العلاج يا بنات زدت 30 كيييييلو
30 ماي وشحم وكل شي من الكلوميد والابر والهرمونات والكورتيزون
صرت عبارة عن كرة اتدربح ما امشي
المهم قالولي يمكن اذا ضعفتي تحملين
وشديت على عمري وضعفت وصرت سمبتيكة
بس ماحملت
قالولي انتي وايد تقكرين عشام جذي ماحملتي
قلت انا ما افكر وايد بس العمر يمشي اذا في علاج ليش ما اروح اعالج
اتفقت انا وزوجي تراجع عند د منصور العرف شهر 1
عشان اسوي ترجيع أجنة لأن عندي أجنه مجمدة
وقلت اوكي شهر 1 ان شاءالله
شهر 12
كنت بالدوام اسولف مع البنات
ووحدة منهم قالتلي نذري
قلتلها شنو يعني انذر ماعرف
قلتي نذري انج تتصدقين او تسوين عمل خيري بنية الحمال وان شاءالله ربي يستجيب نذرج
ونذرت يابنات بينس وبين ربي انتي اسوي عمل فلاني بنية الحمل
وسويته
بعدها بجم يوم حلمت اني رايحة سوريا
ورايحة مخيم لاجئين كله يهال ايتام
وقالولي اخذيلج طفل ترا أيتام ومالهم أحد
قعدت من النوم وعلى طول كلمت امي
قلتلها يما انا حلمت هالحلم لازم اروح سوريا اتبنى ياهل
يمكن في ياهل محتاجني هناك
قالتلي صعبة حييل بس معنى حلمج انج تكفلين يتيم هناك وتساعدينه
وفعلا كفلت
بعدها حلمت اني بمحل مترووووس تراجي ماركات
وقالي راعي المحل اختاري الي تبينه
وحط جدامي تراجس وااايد وانا مستانسة كل شوي انقيلي ترجية واخر شي اخذتلي تراجي عجبتني
ماهتميت للحلم
قعدت من النوم رحت الحمام وانتوا بكرامة ولا نازلة عليي شوي
يعني لقيت على ملابسي افراز لون بني خفيف على وردي
طلعت من الحمام وحطيت فوطة صحية ورحت دوامي
ومانزلت ليلحين بس احس بعوارها يروح ويرجع
وطلبتلي اكب من كفتيرية الدوام كانت خوووش حلومة
رجعت البيت وجبدي تلوع ورحت رجعت الأكل
واتحلطم على ريلي واقوله راح اشتكي عالكفتيريا صار فيني تسمم
جبدي تلوع كله من الحبوم الظاهر محزر مادري مخمر
المهم كنت حدي يوعانة حطينا الغدا ابي اكل احط اللقمة في حلجي اعلجها وماني قادرة ابلعها
وابلعها واعفس ويهي احس طعم الكل يلوع الجبد
اقوله الدياي زفر
يقولي مافي شي الاكل
واروح اركض الحمام ارجعه كله
واتحلطم عالكافتيريا مالت ابدوام
انا اعلمهم هالوصخين
ماتسوى علي حلومة اكلتها وتسممت
بعدها بجم يوم رحت طلعت مع امي
وقعدت اسولف وياها عن حالتي
جان تقولي متى اخر دورة ياتج
قلتلها ياتني قبل 45 يوم بس يما عادي الشهر الي طاف تأخرت جذي
قلتلها بس نزلت علي شوي ووقفت
الظاهر هرموناتي معتفسة هالجم شهر دورتي صايرة خرطي
قعدت معاها بكافيه وطلبتلي اكل
حطوه جدامي واطالعه بعيني اقول حق امي ريحة البطاط محزرة يمااا
تقولي ماكو ريحة اشفيج
واحط البطاطة بحلجي اعلج اعلج فيها واطلعها بكلنكس ماقدرت ابلعها
وانادي القرسون تعال بدل الاكل فيه طعم دهن قديم
وبدله مسكين يابلي طلب يديد
حطه جدامي بس شميت الريحة جبدي قلبت جان اقول حق امي بروح صيدلية بوت بشتري كريم انتي اكلي
ومشيت الصيدلية ابي كريم حماية
وانا بالصيدلية امشي ولا تحليل حمل مكتوب عليه 1.750د ك
قلتلها تحليلكم حيل رخيص
جان تقولي مسوين عروض اخذي تحليلين 1.750
قلتلها والله بلاش انا التحليل الي اخذه كل مرة من الصيدلية 6 دنانير
المهم اخذتهم ودعستهم بجنطتي
وافتريت الافنيو كله مع امي
رجعت البيت بغير ملابسي
وكنت حدي محصورة وانتو بكرامة
ركضت الحمام جان اتذكر التحليل المنزلي
رجعت لبست ملابسي واركض عالجنطة
حطيت التحليل وقعدت انطر
اول مرة استخدمة يعني مو نفس الي قبل استخدمتهم بس خطين
لا في علامة + و -
المهم طليت فيه ولا العلامتين طالعين لكن بخط خفيييييييف وخط واحد من الزائد غامج
ومسكت الورقة اقولب فيها يمين يسار مافهمت بس جنه هالعلامة صوب الحجي الي يقول فيها اني حامل
وقعدت اتحلطم النصااااابين بايعين لي تحليل فاسد الظاهر منتهية صلاحيته
واجيك عالتاريخ الانتهاء مالقيته
وارد اتحلطم اي ولا اشحقة بايعين تحليلين بهالسعر
اكيد بيفتكون من بضاعتهم الخربانة
وطالع التحليل الثاني قلت اكيد هذا نفسه بوطقه
واروح افتحه واجربه ويطلعلي - +
اممممممم
واتحلطم انا لو ماخذة بو 6 دنانير اشرفلي من هالتحليل حتى الخطوط تطلعلي لونها خفيف ماعرف صجه من جذبه
هالبوت النصابين
ههههههههههه وااااي بنات مت ضحك على نفسي لما اتذكر هالمواقف واشلون كلللش مو مستوعبة واجذب الي اشوفه
اتصلت على ريلي وقلتله شوف انا بقولك شي وانت كيفك
لنا شريت تحليل حمل رخيص بس الظاهر خربان
وطلعلي ان في حمل
وقلت اروح احلل دم احسن
كنت اتكلم بكل برود لان تحليل الدم صار مايونس اروح مستانسة وارجع خايبة
المهم سكره مني ولا عشر دقايق عند الباب قالي يلا صعدي
رحنا مختبر قريب علينا
وقلت حق ريلي لاتتأمل وايد خلك عادي
واهو ساكت يطالعني بعينة
قلتله يعني عادي ترا احنا متعودين على هالنتيجة كل مرة فلاتعيش دور الوناسة وايد وتشتط عشان لا يضيق خلقك
المهم نزلت وخذوا دمي وكان زحمة وقالي نطروا نص ساعة
اهي نص ساعة بنات
بس الثانية تمر عن نص ساعة
ما تمشي كلش
انا مابقى دعاء مابقى اية مابقى استغفار
لين طلع لنا المصري مال التحاليل وماسك ورقة
وقال حق ريلي
تيخىثن ثمبتيا يكبتتب مينبتي بوسيتيف
قلتله ها شنو مافهمت ولا كلمة
قالي
تقهيا يمبنبىي ينينيىي ميتيى عيادة الحمل والولادة
قلت حق ريلي هذا شيقول كلامة خربوطة مو واضح شنو حمل وولادة مافهمت
جان يقول يا مدااام انتي حامل ح ا ا ا م ل
وراح
وعم الصمت لثواني اطالع ريلي ويطالعني
جان ألمه بدون شعوور وابجي وابجي واهو لامني حيييل
قلتله مو مصدقة صج انا حامل؟
شنو يعني داخل بطني في بيبي؟
جان استوعب ان في ناس يوم وخرت عنه اطلع دار مدارس ولا مافي ولا قطو
وين اختفوا الناس مادري بس المهم الكل مشا وماحسيت فيهم من النطرة
طول السيارة اضحك اضحك مثل المينونة وابجي
وريلي ويها يكسر الخاطر
نفس الياهل الي فسه بجية وموقادر يبجي سرحااان وساكت
يقولي احس جنه حلم جنه خيال
انا راح اصير ابو؟
انا لي رجعت من الدوام وفتحت الباب في ياهل يركض عشان يلمني؟
راح اصير ابو؟
راي ايلنا ياهل يكسر اغراض البيت ونركض وراه؟
يا الله يا الله
كل شي اسويه احسه شوي بحق ربي
الصلاة الدعاء الصدقات احسها شوي
ربي انعم علينا بنعمة عظيمة كنا ننطرها سنين
من غير علاج
من غير ابر
من غير مراجعات
من غير تحاليل
من غير فلوس
من غير سونار
الله بس قال كن فيكون
كن فيكون يا بنات
لاتفقدين الامل
ربي ماينسى احد
ربي يبيج تصبرين
يختبر ايمانج
يختبر صبرج
مو الدكتور الي بيحملج
ولا الادوية
ولا المراجعات
بس لما الله يقول كن
الحمدالله والشكر
سامحوني عالاطالة خواتي♡
واذا في بدليات لأني اكتب لكم من موبايلي
