مانسو

أشوف مانسو صاير لقمة سائغة للمنتقدين..
طبعاً من حقهم وحق أي واحد يدلي برأيه..
أنا مانيب من اللي يقولون اسكتوا المدرب أبخص والا لا تحطمون اللاعبين ومن هالكلام.
أيش اللي اسكتوا؟! خلو العالم تقول رأيها وافقناه والا عارضناه..
واللاعب الناعم اللي بيتحطم من حكي الجماهير هذا لازم يدور شي ثاني يسويه..
الرياضات كلها ميادين يسلط فيها الضوء والنقد على اللاعبين.. والمحترف الحقيقي ما يتأثر!

ما علينا.. نرجع لمانسو

اللي يقول كبير.. يا جماعة 33 سنة معناها اللاعب خلاص ما منه فود؟؟
شكل ما احد علم ويليهامسون ولا كماتشو!

اللي يقول زايد وزنه.. هذا صحيح.. لكن تراه جاي للنصر وهو قبلها بأيام لاعب أساسي في مباريات رسمية لفريقه!
يعني فريقه الأصلي ما شاف فيه عيب.
في المباريات الودية اللي لعبها النصر كان له حطات حلوة وتغيير في مسار اللعب.
الأثر الوحيد لزيادة وزنه هو انه صار أحياناً يلعب على الواقف.
تذكرون يوسف خميس؟
تذكرون طارق التايب؟
تذكرون حسين زميجاني؟
كان أغلب لعبهم على الواقف. لكن مهارتهم الذهنية ورؤيتهم للملعب تغير مسار اللعب!

لا تقلقون كثير يا شباب.. مانسو لاعب جيد ومناسب جداً.. وأهم من كذا انه يلعب في الخانة اللي لنا سنين نطالب فيها..

الشي الوحيد اللي أخاف منه هو عدم راحته في البلد أو تأخر رواتبه ومن هالكلام..