.,: تصفية الحساب :,.
.,: تصفية الحساب :,.
يا الله عفوك يوم تصفيـة الحسـاب
يومٍ حصاد لما زرعنـا فـي السنيـن
يوم الحشر قرب ولا معنـا زهـاب
اليوم في الدنيـا وبكـره راحليـن
نجمع ذنوب ونرتجي عفـو وثـواب
وعلى نصر ربـي لنـا مستعجليـن
تدرون ليه آمالنا كنهـا سـراب ؟
تدرون ليه النصر سيـف الأوليـن؟
الأوليـن أعمالهـم وفـق الكتـاب
قاموا عليه وباعـوا الدنيـا بديـن
وحنا غفلنا بين مـا لـذ وطـاب
والنصر سيف مـا يسلـه غافليـن
نصبح على شوف انتهاكات وخراب
ونمسي على دمـع وتنهـات ونيـن
بصدورنا شي تذوب إلـه الهضـاب
وأفعالنا والواقـع ريـاح وطحيـن
وعلى العيون من الفتن مثل الضبـاب
ماعاد ندري من يسار ومـن يميـن
ما للضعيف إلا الدعا لو مـا يجـاب
ما غيره إلا الشوف مكتوف اليديـن
يالله زلزل تحـت الأعـداء التـراب
والطف بنا واحقن دمـاء المسلميـن
