3مفاتيح وجاني الرزق من الله
السلام عليكم ورحمة الله وبركاته 0نقلت لكم قصة أحد العضوات في منتدى أخر
وهي صاحبة القصة أسأل الله أن يوفقها في حياتهاويرزقها من فضله لاتنسوها من دعواتكم
قولوا ماشاء الله ولا حول ولا قوة الا بالله ..
خواتي انا وحده منكم ومشاكلي ماهي غير عن مشاكلكم .. وسبق ان فتحت قلبي لكم بموضوع .. اذكره لكم باختصار .. انه يا بنات من قبيله ماتزوج الا من نفس القبيله وطبعا للضروف اني عايشة برى المملكة صار الموضوع شبه صعب ومستحيل .. والديره الي انه عايشة فيها فتنها واجد .. ورب البيت كل الي حولي يكلمون وعلى علاقات .. يعني صاحباتي من اكثر من 7 سنين اقرب الناس لي يكلمون بنات الجيران زميلاتي في الجامعه ..والقهر اني كنت اشوف صحباتي وربي حتى الي تدرس قرآن تكلم !!؟! وانا كنت من حالهم .. مع الخيل يا شقرى ..لحد مايأست وكرهت نفسي زادت المعاصي وربي ساتر علي .. قلت يا شقآووي لي متى ؟ ! عرفتو الجو الي كنت عايشة فيه ؟! جات فترة ضاقت فيني الدنيا وقلت ربي التوبه .. وطرحت مشكلتي عندكم ونصحوني اخوات لي في الله ما نسيتهم من الدعاء وقالو لي اتركيهم عنك هالبنات .. وحاولت اتركهم وبالفعل ابتعدت عنهم .. كنت اشكي لرفيقتي من مركز تحفيظ القرآن وربي يابنات انها استغلتني يوم درت اني عايشة بحريه بدون قيود وطلبت مني اشتري لحبيبها هديه ؟! كنت اشكي لبنت عمتي ملتزمة وحتى الاغاني ماتسمعها .. كان ردها علي بالعكس لازم تجربين وتكلمين وتطلعين معاه بس بشرط تلبسين غطا ولا يعرفك ؟! وماتركبين معه بنفس السياره ؟!
كان تأثيرهم جدا سلبي علي .. خصوصا وانه تايبة وهم يجون يقولون لي وش قالو لهم اخوياهم وحبايبهم وش جابو لهم من هدايا وهالشي كان يضعفني مررره ..
بشهر رمضان الكريم .. تركت كل هالمعاصي وخليت رفيقي القرآن اتدبر معانيه
مرت علي هذي الآية وانه اقرى القرآن :
وَلا تَمُدَّنَّ عَيْنَيْكَ إِلَى مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ وَرِزْقُ رَبِّكَ خَيْرٌ وَأَبْقَى
سبحان الله استوقفتني هالاية كثييييييييييييير ..
يابنات .. الاحساس الي تمرون فيه من نقص لأن صاحباتكم تزوجو ولا اغتنو .. ولا زي حالتي كذا فتن من حولي كثير .. صحباتي يعيشون احلى جو غرام وحب ورومنسيه .. كنت انقهرررر للحياة الي عايشينها لا وربي مهوب حسد بس وش ينقصني انه ليه ما عندي الي يحبني والي يتزوجني زيها .. وانا احسن من فلانه وفلانه الي تكلم ؟!!
لابد هالافكار جاتكم زيي واعوذ بالله من ابليس .. يوز بني ادم الا انه يعصي ربه .. كثير قاومت الفتن الي حولي ورب البيت بنات لو تشوفون حالي عندي من الحرية ممكن اسوي اي شي لو ابغى واكلم واطلع واعيش حالي حالهم .. بس ربي وعدني ..
وَرِزْقُ رَبِّكَ خَيْرٌ وَأَبْقَى..
صحيح هم عايشين حياتهم والي تكلم والي انخطبت والي والي .. بس لازم مانمد عيوننا للي عندهم ونقول ياريت حالي زيهم ووش ناقصني انا .. تذكروا ان الله قد يكون ابتلاهم ويمتحنهم .. وانتي في غنى عن هذي الفتن فتنت الدين والصحبة الصالحة الي فتن بها الله اصحاب الكهف .. هذي الفتن الي انه عشتها .. واسال ربي يعيني وينصرني عليها ..
طيب وش الحل ياربي .. تعبت من هالاحساس تعبت اقارن نفسي باللي حولي ..
قال تعالى :
{فَاصْبِرْ إِنَّ وَعْدَ اللَّهِ حَقٌّ وَاسْتَغْفِرْ لِذَنبِكَ وَسَبِّحْ بِحَمْدِ رَبِّكَ بِالْعَشِيِّ وَالْإِبْكَارِ}
سبحانك ربي الحل عنده بهذي السهوله .. وانا صار لي من قبل رمضان اشكي لكم وصدعت روسكم والحل بسيط :
ثلاث مفاتيح :
المفتاح الاول :
اصبر .. لان ربي وعدني بان وعده حق ومن غير الله اثق وآمن به بانه وحده القادر والرازق اذ قال بان وعده حق .. خلاص هالشي يكفيني عن اي وعود وعن اي ضنون وشكوك .. والفتن الي حولي ان صبرت ربي بيعوضني عنها خير .. انا مجرد في امتحان واختبار وان صبرت نلت اجر الصبر ويكافني ربي ووعدني بانه راح يرضيني ..
المفتاح الثاني:
الاستغفار .. بنات الاستغفار ثم الاسغفار ثم الاستغفار من الذنوب التي قد تحجب الدعاء استغفرو يابنات استغفرو لذنوبكم استغفرو بنية وبتركيز .. مهوب تستغفرون وتتذكرون فلم ومسلسل وانتو تستغفرون .. استغفروا بنية التوبه .. لاتخلون كذبة تمنع عنكم الرزق من الله ولا تخلون غيبة او نميمة او مسلسل هابط او اغنية تافهه تحرمكم احلى رزق .. فان وعد الله حق ..
المفتاح الثالث
التسبيح وحمد الله : قبل طلوع الشمس وقبل غروبها .. فهي افضل الاوقات لله سبحانه وتعالى .. التسبيح له فضله عند الله : التسبيح هو تنزيه الله سبحانه وتعالى عن كل شي .. كافي يابنات ان كل شي يسبح بحمد لله اكثرو من التسبيح وحمد الله في جميع الاوقات وبالاخص قبل طلوع الشمس وقبل غروبها
قال تعالى :
فَاصْبِرْ عَلَى مَا يَقُولُونَ وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ غُرُوبِهَا وَمِنْ آنَاء اللَّيْلِ فَسَبِّحْ وَأَطْرَافَ النَّهَارِ لَعَلَّكَ تَرْضَى
الوعد عند ربي راح يرضيني بس اصبر واستغفر واسبح واحمده في كل الاوقات ..
وبهذي المفاتيح الثلاث ..
داومت عليها يابنات وكنت اتمنى شي واحد من رب العالمين ان الله يبعدني عن هذي الفتن ويرزقني الزوج الصالح عاجل غير اجل .. ورب البيت اني كنت نايمة وانه حاسة بضيق وغم اتمنى ربي يرزقني عاجل غير اجل سبحت بحمده واستغفرته ونمت بدمعتي وكلي امل بالله وثقه .. الا وامي تصحيني من نومي .. جاني خطيب ... ومن نفس القبيلة وبالديره الي اتمناها .. صحتني ورب البيت تقولي يالله بسرعه البسي وتعالي خلهم يشوفونك ؟! يابنات وربي انصدمت ماكنت مستوعبه .. ربي يتمم على خير يارب ويكتب لي الي اتمناه اتمنى منكم الدعوة لي بالتوفيق ربي يستر علي ويرزقني من غير حساب لاني تركت المعاصي لوجهه الكريم وآمنت بان الذي عنده خير وابقى .. ادعوولي خواتي
وآسفه على الاطاله .. اوصيكم بالمفاتيح الثلاث ربي يرزق كل وحده فيكم الي تتمناه وزود ياااااااااااااا رب ونفرح فيكم وحده وحده وربي يرزقنا السعاده الدااايمه يارب
سبحانك ربي .. لك الحمد .. تمم لي على خير يارب
