يابـــــــــــــرد

[الاسهم السعودية]

يا برد .. لا تبحث خفايا التناهيت
ما عاد باقي من جروحي خفايا

ايه ارتعش من لفحتك لا تماديت
حاسب عليك الله وش ذا السوايا

ليتك قبل تقبل علي الجوف سميت
تستوجع جروح السنين الضمايا

تصحى معي الاشواق وتبات وابيت
لها مع المسرى علوم وخبايا

مرت علي وجوه عالم ولا ريت
مثله حلا خلقه وطبع وسجايا

للورد في خده عروق ومنابيت
ولموت في عينه احياض ومنايا

في ذمتي مانسى غلا من تفديت
الين تنسى البدو حب المطايا

اللي غرامه ينعش الروح لا ابطيت
اقلها شي ٍ يـشــد النوايا

لاجابني دربي على شارع البيت
غدت محاني الجوف منه شظايا

معي معي من وين ماصد واقضيت
كن الاماكن من طيوفه مرايا

روحت بافكاري بعيد وتعنيت
رديت خاسر من جيوشي سرايا

يابرد خاف الله ويش انت سويت
نبشت ذكرى قد لها في الحنايا

بدفى لو البس لي من البرد جاكيت
لكن وش يدفي الجروح العرايا