الأهلي يجيب نقطة ويآخذ الدوري ... وإنت هذا موقفك ... إيش راح تسوي ... بكل أمانة؟؟؟

[الاهلي الراقي]

يامجانين كيفكم ... إن شالله كلكم بخير مع الأجواء الحلوة هذي...

يمكن موضوعي هذا غريب شوية ... بس تهمني ردودكم فيه وبكل أمانة ...

تخيلوا لو الأهلي لاعب في آخر جولة في الدوري ... ونقطة واحدة فقط هي التي تقف ما بينه وبين الدوري ...

وإنت يالمشجع الأهلاوي المتيم بحب الأهلي ربنا قدر عليك وكنت لاعب مهاجم بالفريق الخصم .... والنتيجة تعادل (يعني في صالح الأهلي) ... والحكم أشار إلى 4 دقائق وقت بدل ضائع .... وفي الدقيقة الرابعة من الضائع جات في رجولك هجمة قدام المعيوف (انفراد صريح) يعني تحط الكورة داخل المرمى ... معناته مافي دوري ... والجمهور كلو واقف يطالع في الحكم يبغى بس يسمع صافرة الظفر بالدوري .. طبعا إنت أهلاوي ومتخيل كيف راح يكون الجو العام وقتها ...

طيب بكل أمانة .... راح تسجل ... ولا ممكن تضيعها بطريقة إحترافية معينة .... ؟؟؟؟

هل ممكن تضحي بحب الأهلي من أجل سمعتك كلاعب وتسجل ... أم تضحي بسمعتك من أجل حبك للأهلي وتضيع الكورة؟؟؟

أنا سألت نفسي هذا السؤال ... وبكل أمانة مالقيت جواب صريح ... لأنه ماأعرف وقتها لو كنت بالفعل مهاجم في الخصم ... وكنت عايش هذيك اللحظة ومني شايف غير الشباك قدامي... إيش راح أسوي ((لأنو أتوقع لو ضيعت الكورة قصدا راح يكون حرام شرعا)) ... صح؟

الله ينصرنا قدام الإتفاق ...
في أمان الله