ياليت برد الليل يطفي.....

[سعيدعبدالله ال حسين]

ياليت برد الليل يطفي سعيره =وياليت لي في مرقب الهم مرباع
بقصد براس الريع وانثر عبيره=وابكي زمان من يدي ياهلي ضاع
الله على ذيك الليالي العسيره=وعلى زمان حل بي كله اوجاع
ومن شافني قال حاله خطيره=مادام يبكي والبكى صج الاسماع
على حبيب زود القلب حيره=روح وجرعني عذابه بالانواع
ولاهقيت انه بيقسى وينسى عشيره=وشريت قربه بالغلا يوم هو باع
عقبه جفيت النوم عيني سهيره=وعسفت مهرة صاحبي ميرماطاع
واصبحت صقارغدى منه طيره=راح وترك راعيه مع ربط وقناع
ادوج كني فاقــــد اهل وديره=بمركب ضياع ماعلى متنه شراع
والوقت ياكم لم شـــره وخـــيره=والكل له ميزه والكل منا له طباع
واللي عشق ينظر بعينه مصيره=حكايات من عشاق مع حب وخداع
يومي عرفت ان المحبه مريره=وداريت سري خوفي تحاكيه الاسماع
كني برمضا القيض حامي هجيره=والامثل هايم رقى رووس الارماع
والاكاني بلد مخلوع منه اميره=والاكاني فقير مــا لقى زاد لاجاع

وسلااااااااامتكم

[نياف العتيبي]

سعيد عبدالله


صح لسااانك


ولاهنتتتتتتتتتتتتتتتتتتتت ت


مع ان القصيده فيها ابيات تحتاج اعادة نظر


من حيث الوزن وكذلك المعنى


اتمنى لك التوفيق


وسوف انقلها لقسم شعراء المستقبل حتى تعدل مافيها من عيوب

مع ان اغلب ابياتها قمه من حيث وزنها ومعناها


ولاهقيت انه بيقسى وينسى عشيـره
وشريت قربه بالغلا يوم هـو بـاع

الناااااايف

[زهرة الخزاما]

سعيد لا هنت
قصيده رائعه بكل المقاييس
من حيث المعاني المترابطه والقافيه والوزن
وروعة السرد


دمت بكل خير وابداع
والي الافضل

[sadeem_911]

والله إنها رائعه صح لسانك أخوي تسلم والله , ونتمنى منك المزيد 000

دمــــــــــــــت بــــــــــــــود


سديــــــــــــم

[نياف العتيبي]

اخوي عبدالله

هذي قصيدتك وسوف ابين الخلل اللي فيها ..


ياليت بـرد الليـل يطفـي سعيـره
وياليت لي في مرقب الهـم مربـاع

بيت سليم ..

بقصد براس الريع وانثـر عبيـره
وابكي زمان من يدي ياهلي ضـاع

زمان لابد تكون مكسوره بتنوين مثل زمان ٍ حتى لايثقل البيت

الله علـى ذيـك الليالـي العسيـره
وعلى زمان حل بـي كلـه اوجـاع

زمان برضه تبي تنوين زمان ٍ

ومن شافنـي قـال حالـه خطيـره مكسور

مادام يبكي والبكى صـج الاسمـاع

علـى حبيـب زود القلـب حيـره
روح وجرعنـي عذابـه بالانـواع

حبيب لابد تنوين حبيب ٍ

ولاهقيت انه بيقسى وينسى عشيـره .. مكسوووور

وشريت قربه بالغلا يوم هـو بـاع



عقبه جفيت النـوم عينـي سهيـره
وعسفت مهرة صاحبي ميرماطـاع

بيت سليم

واصبحت صقارغدى منـه طيـره
راح وترك راعيه مع ربط وقنـاع

صقار .. تحتاج تشديد وتنوين صقّار ٍ

ادوج كنـي فاقـد اهـل وديــره ثقل في البيت واقرب للكسر

بمركب ضياع ماعلى متنه شـراع


والوقت ياكـم لـم شـره وخيـره
والكل له ميزه والكل منا له طبـاع مكسور


واللي عشق ينظر بعينـه مصيـره
حكايات من عشاق مع حب وخـداع

يومي عرفـت ان المحبـه مريـره
وداريت سري خوفي تحاكيه الاسماع

مكسووووووور


كني برمضا القيض حامي هجيـره
والامثل هايم رقى رووس الارمـاع
والاكاني بلد مخلـوع منـه اميـره
والاكاني فقير ما لقـى زاد لاجـاع

مكسووووووره الشطرين ..


انا قلت ياعبدالله اعد ترتيبها وعدل كسورها واعيدها لك

والان بينت لك الكسور اللي فيها

اتمنى تكون اقتنعت واشوف الاجمل منك


النااااايف

[ناصرالعجمي]

صح لساانك اخوي سعيد ال حسين ولا هنت كفيت ووفيت يالغالي ولقد ابدعت في وصف المشاعر

وتقبل تحياتي
اخوك
ناصر العجمي

[سعيدعبدالله ال حسين]

الاخ نياف
اشكرك على مرورك ونقلك للقصيده
وتعديلك الذي لاارى له اي اساس سوى تبرير لنقلك
والكسور اللي تقول تمعن فيها زين
انااتقبل النقد ولكن اذا كان النقد صحيح
تحياتي

[خــــالـــــد]

سعيد آل حسين
http://www.sfsaleh.com/vb/attachment.php?attachmentid=21450&d=1150313192
صح لسانك يا سعيد

وبيض الله وجهك

قصيدة جميلة .. من وجهة نظري !

وكلماتك رائعة والمعاني أروع

صحيح لديك بعض الأبيات مكسورة ..

لكن يا أخ نياف " التنوين " لا يعتبر كسر في الكتابة .. !! لأن البعض يسقط منه سهواً


ادوج كنـي فاقـد اهـل وديــره
مافيه ثقل ..
لكن لو سمعتها منه أكيد بتسمع التنوين في ( أهلٍ )


وشكراً للجميع
http://www.sfsaleh.com/vb/attachment.php?attachmentid=21451&d=1150313192

[سعيدعبدالله ال حسين]

سعيد آل حسين
http://www.sfsaleh.com/vb/attachment.php?attachmentid=21450&d=1150313192
صح لسانك يا سعيد

وبيض الله وجهك

قصيدة جميلة .. من وجهة نظري !

وكلماتك رائعة والمعاني أروع

صحيح لديك بعض الأبيات مكسورة ..

لكن يا أخ نياف " التنوين " لا يعتبر كسر في الكتابة .. !! لأن البعض يسقط منه سهواً


مافيه ثقل ..
لكن لو سمعتها منه أكيد بتسمع التنوين في ( أهلٍ )


وشكراً للجميع
http://www.sfsaleh.com/vb/attachment.php?attachmentid=21451&d=1150313192

الاخ العزيز خالد
اشكرك لمتابعة الموضوع واهتماك بارك الله فيك
تحياتي لك

[جريح الوقت]

صح يانياف ..التنوين مو كسر..
ماشاء الله عليكـ خويلد..!!

صح لسانكـ ياسعيد..
بس اللي تحت إسمكـ شنو.!!!!؟؟!