الى الادارة ضروري مناقشة المدرب بالأخطاء الفنية المهمة

[عميد اتحادي]

السلام عليكم ورحمة الله وبركاته

مبروك علينا جميعا الثلاث نقاط

احب اتكلم عن عدة نقاط فالمباراة أمس أمام التعاون ,وفي هالموضوع اتمنى احد يشاركني ويتفضل علي بما يراه من اخطاء لكي تتم مناقشة المدرب من قبل لجنة الاشراف على كرة القدم وتناقش المدرب بما هو مناسب ونتفادى هالاخطاء ومستوى الفريق يرتقي للأفضل (وحتى لو الادارة شايفة الاخطاء لكن نحن كجمهور لازم نبدي رأينا)

فالبداية احب افكر الجميع بأن الاتحاد ماهو متعود يلعب مع الاندية الصغيرة بالمنظر الي امس

امس تهديدات التعاون على المرمى اتوقع اكثر من عشرة وهذا ماكنا متعودين عليه!!

اتكلم عن النقاط الايجابية الي شفتها:
الشوط الأول كان الفريق جيد احيان قليلة وأيضا فالشوط الثاني بعد نزول فهد المولد وخاصتا بعد نزول الشاب الصاعد جمال باجندوح يضغط عالخصم على طول مايعطيه مجال ويقطع الكورة وهذا ماكانو المحاور يعملوه,,واتوقع له مستقبل كبير اذا انتبه لنفسه وركز في تطوير مهاراته وبنيته الجسمانية الجيدة ,, وباسم المنتشري بداية المباراة كان جيد نوعا ما لكن في الشوط الثاني الضعف اللياقي كان واضح,,والحمدلله من فترة ما كان عندنا لاعب يسجل من كرات ثابتة والآن عندنا ليوناردو ماشاء الله سجل هدف صاروخي ولا احلى وغير كذا يتميز بالتمريرات السهلة والجيدة,,وكمان احمد الفريدي ساهم فالهدف الأول بشكل كبير مرر تمريرة ذكية لعبدالمطلب الطريدي,,ومحمد حيدر جيد من ناحية قطع الكور ,,ومهارة وماتضيع منه الكورة بسهولة يقاتل عالكورة لكن يعيبه اللمسة الأخيرة



نجي عند الأهم السلبيات نقول الصراحة ولا احد يزعل لازم تتعدل هالأخطاء مانبغى نكون متعصيبين عشان فزنا وفوز بصعوبة يجب على لجنة الاشراف على كرة القدم فالنادي انها مناقشة المدرب فووووررا ولا ينتظرو مباراة الاهلي وبعدها يطيح الفاس عالراس وياقلب لاتحزن .
صراحة المدرب عليه علامة استفهااااااااااام التعاون بيهاجم والكورة تمر من الوسط بكل سهولة كانه الوسط شفاف وماسوا شي يتفرج ,, خاصتا المحاور,,وأيضا الدفاع غير متجانس والظهير عبدالمطلب الطريدي دفاعيا ماشفناه يتقدم ولما تصير هجمة للتعاون مانحصل احد يضغط على لاعبي التعاون الا باسم من الجهة اليمنى والظهير مختفيييي!!! .
والتعاون ضغط علينا إلا ان جات اصابة لي ليوناردو وغيره يعني بدون الاصابة ما كان خرج وبعدها تعدل الفريق شوي.
قبل ما يلعب ليوناردو وتحديدا في مباراتي الشباب ومباراة العروبة ما كانت الهجمات تجي عالاتحاد يهالطريقة شوفو من مباراة الفتح من أول ما بدأ يلعب ليوناردو البرازيلي فالمحور والضغط من الخصم علينا بشكل مخيف وليوناردو مايساند فالضغط على لاعبي الخصم ما اقول انه مررة مايساند بس يساند لكن بشكل ضعيف وغير مؤثر كإنه ماله نفس يدافع واشوف من وجهة نظري ان ليوناردو يكون وسط مهاجم او امام اثنين محاور في نص الملعب لأن عنده التمريرات جيدة وجيد في لعب الكرات الثابتة نحتاجه هجوميا اشوف يكون المحور فيه محمد ابو سبعان (اذا رجع من الاصابة بإذن الله) وجنبه سعود كريري او معن الخضري ,,ابو سبعان الاساسي, لأن كريري ماهو زي اول وخلونا واقعيين مستواه واضح من مباراة امس ومباراة الهلال (اتمنى يرجع مستواه زي اول), واذا مستوى واحد منهم (كريري او معن المهم يكون جنب ابو سبعان) انخفض او اللياقة ضعفت يخرجه المدرب ويدخل الثاني الي هو معن او كريري او ايضاٌ جمال باجندوح ,,
وياريت لو يكون مختار فلاتة المهاجم الأساسي,,لأنه قناص وماعنده تفاهم تمركزه دايما صحيح.

الدفاع لازم يتجانس ويتطور من ناحية مصيدة التسلل مهمة ومن ناحية مراقبة المهاجمين من قلوب الدفاع وايضا الاظهرة وخصوصا الجهة اليمنى سواءا الطريدي او شراحيلي مافيه تغطية لأجنحة الخصم.

اتمنى كتابة الموضوع هذا مايروح بلا فائدة ماكتبت هالموضوع الا قهر من الي شفناه امس

وأتمنى أيضا اشوف مواضيع فيها الأخطاء الفنية في كل مباراة.

وبالتوفيق للجميع ولاتحادنا الي نتمنى نشوف مستواه عالي

والصلاة والسلام على رسول الله