ناصر القزلان .. وش حدّك على بعض العلوم ؟؟

[برج المملكه]

استلم و كل عام وانت بخير


طاروق للاستفاده



يا ناصر القزلان وش حدّك على بعض العلوم=مالك و مال الضيق يا ناصر و عند الله سعه
ماهي غريبه لو تخلون العوايد و السلوم=من يوم كلٍ صار في بيته جهاز و مطبعه

[ناصر القزلان]

هلا والله بهالصوت .. الساعة المباركة يالبرج .. استلم والك البقا..


شفت القمر طالع ولكن حال من دونه غيوم = الصوت الاول فاتني والصوت الاخر فرقعه
ان جيت اطالع نجمتي غابت عن العين النجوم= ياصاحب الطاروق لاتدخل بنا فالمعمعه

[برج المملكه]

الله يسلمك ويبارك في عمرك ياناصر

تفضل طال عمرك




نور القمر بادي و يطلع كل ليل و كل يوم=لكنّ يا لقزلان هوّد و اسمع العلم اسمعه
ان كان حظك ياوسيع العرف عيّا لا يقوم=خله ودوّر غيره مع الناس لا تقعد معه

[ناصر القزلان]

تسلم والله .. سجل عندكـــ ..


الحظ من رب السماء مقسوم مالك به لزوم = وان طاح برج المملكة من عاد يقدر يرفعه
مدري تبيها باللحم والا تبيها بالهدوم = وان كانها بالقرقعه كلن يعرف القرقعه

[منيرة الحربي]

ناصر القزلان عاش والله ناصر مافيها كلام انا معك وفي صفك



وحيلك في برج




الله الله



الليل الليل



ومتابعين لشعار

[منيرة الحربي]

البرج العالي عشت والله شاعر مايحتاج



ولو نضلمك اخذنا ذنوبك بس الضليمه حرام




وناويلك على نيه يابرج




والليل الليل ياشعرنا

[ناصر القزلان]

هلا وغلا بالاميرة ..

وافية يابنت السنافي .. قول وفعل .. انا اشهد اني تنشطت وقام يرقص شيطاني يوم شفت اسمكــ ..

عساك بالوجود دايم .. لاخلا ولا عدم .. الصف عامر بوجودكـــ ..


.. الليل يالبرج ..

[برج المملكه]

الله الله استلم :)



الموتر القربوع يوم انّه عطا خط الجموم=يدبي على حيده و تاطاه المواتر مسرعه
تبا الصراحه والله انك عاد معطى و محروم=علاك تصنيفات حشّاش الزّقاره في اصبعه

[ناصر القزلان]

ياسلام ياسلام سلم .. خذها وانا فليحان ..




بعض المواتر واطيه ماتحتمل شوك الحزوم = والقار مطلب كامري سواقها له لعلعه
يوم السوالف طولت حطيت في مخباك ثوم = الثوم هذا تطبخه والا تصد وتبلعه

[ملحق المخلين]

ياسلام ياسلام



برج المملكه


صح لسااااانك

طاروق يشرح البال


ناصر

صح لساااانك

ومتابعين واصلو

[منيرة الحربي]

ايه ناصر القزلان ياعلك تسلم والله انك تاج راسي على برج حيلك



ههههههههههههههههههههههههه ههه


وانت يابرج ترسنا مخابيك ثوم ههههههههه



لاتعودها شفني وعلمك



الله الله



الليل الليل

[برج المملكه]

طيب طيب طيب وكفو يافليحان ههههه

عندك :)



ارتاح يا لقزلان عنها في مكانك و مخدوم=كم واحدٍ قدّام برج المملكه صفّ اربعه
ان كان تبغى العلم خير الله على خيرك يدوم=الحر يشهر فوق و الارنب تصومع صومعه

[ناصر القزلان]

ملحق المخلين ..

ياهلا وغلا .. نورت الموقع كله ..

==================================


بنت الامراء ..

سنايدي والله وتاج راسي ..

دامك معي ماعلي خلاف ..

لعيونكـــ ابشري بسعدكـــ ..

[أحمد السكران]

اقسم بالله مميزين



واصلوا الله يرحم والدينكم



وانا كل شوي بصف واحد منكم

[برج المملكه]

ملحق المخلين

هلا ياصديقي الشرس :11ctor:

شرفتنا لا عدمتك و حضورك غالي علينا .. :)

بنت الامراء

شرفتينا ولا هنتي على تواجدك

احمد السكران

مرحبا و مسهلا وجودك مكسب

لاهنت

[ناصر القزلان]

هههههههههههههههه .. ياحليلكـــ يالبرج .. أرنب ؟؟؟

طيب .. استلم ..


البارحه في مرقدي ياشينها بعض الحلوم = لي جابها ابليس العور لعل ربي يقطعه
شاهدت برج المملكة عليه طياره تحوم = ياليت كبتنها نزل والا يطلعني معه

[عبدالله بن راجس]

ياسلام ياسلام



برج المملكه


صح لسااااانك

طاروق يشرح البال


ناصر

صح لساااانك

ومتابعين واصلو


انتم مبدعين وكلنا جمهور لكم

[محمد الدهمشي]

برج المملكه اعتقد من اسمك غني عن التعريف شاعرولاعب وقناص ورسام وخطاط
ناصرالقزلان ابداع الى مالا نهايه واتمنى ان تزودنا في قصيدتك اللي بالتوقيع ان كانت اطول وماقلتها الا اكيدمعاشك اكثرمن مليون

[ناصر القزلان]

أبو هادي ..

وش هالساعة المباركه ..

حضورك شرف ياطويل العمر ..

هلا وغلا ..

[ناصر القزلان]

ياحليلك يابو راشد ..

والله ان حضورك شرف يابعدي ..

تكفا عطني ربعهم ولا عاد تشوفني أوطوط عندكم ..

منك لباب السماء .. آآآآآآآآآآآآآآآآآآآآآآآآم ين ..

نورتنا يالغالي ..

[برج المملكه]

عندك عندك :)



الذيب ما يرقد و انا خابرك دايم فيك نوم=رح ارقد الله لا يهينك و العلوم مسنّعه
اليا طلعت اطلع سوات الحر في عال الرجوم=ترى محد ينظر بعينه تحت غير الامّعه

[العسجديه]

برج المملكه

الابداع جزء من تكوينك فلا غرابه ان نراك دائما محلق في سماء الابداع
صح لسانك حتى ترضى

ناصر القزلان

صح لسانك ولاهنت يالجزل

دمتم بخير

[ناصر القزلان]

الله الله.. كفو يابعدي .. دار الفلك .. استلم




أبك انت رايح وش تبي واقف على سير القدوم = ياشين جهال العرب لو تنصحه ماتقنعه
واكبدي اللي من غثا بعض الجهل صارت لهوم = أقول ذا خط الحسا يقول خط المجمعه

[برج المملكه]

عبدالله بن راجس

مرحبا تراحيب الحيا شرفتنا حضورك الكريم لاعدمتك

ابو راشد

حياك الله شرفتنا يا معزب الضيفان

العسجديه

حضورك دائماً جميل ولا يشابهه حضور

دمتي بخير

[عبدالله بن راجس]

تبقون جميع وبيض الله وجيهكم يامبدعين




ناصر يا انت خطير




أبك انت رايح وش تبي واقف على سير القدوم
ياشين جهال العرب لو تنصحه ماتقنعه
واكبدي اللي من غثا بعض الجهل صارت لهوم
أقول ذا خط الحسا يقول خط المجمعه

[ناصر القزلان]

دحيم الدجه ..

والله انك دجه صدق ..

ليه ماتمسك الصف .. أبك اقرب ماعليك الا العافيه ..

[مرزوق الغنامي]

برج المملكه



وناصر القزلان





صحت قلوووووبكم






واصلوووووووووووووووو





متابعين لكم

[ناصر القزلان]

هلا بك يامرزوق ..

تبقى وتدوم يالغالي ..

حضوركـــ زين الملعب ..

صح بدنكــ ..

[ناصر القزلان]

الهمام يالبرج .. عطنا اللي عندك .. نبي نتصالح ونقلب الاسطوانه على الوجه الثاني .. ونكملها بكره..

[برج المملكه]

ترى النهايه عندك

و صح لسانك شرفتني بقبولك الدعوه لاعدمتك



ماني مجنّب عنك لين تحج لله و تصوم=ابليس و الله ما يعيّن خير رجل ٍ يتبعه
مانيب الومك والاوادم فيّ ما تلحقك لوم=من لا يعرف الحرّ الاشقر يشتويه ابرقعه

[أبوعبدالرحمن]

لا تتصالحون ابد

خلوكم على هالوزنية

امتعتونا بحق

لله دركم وصحت قلوووبكم

[برج المملكه]

عبدالله بن راجس


وجهك ابيض يا عبدالله شرفتنا للمره الثانيه هلا و مرحبا :)


مرزوق الغنامي


مرحبا مليوووون شرفتنا طال عمرك


حضورك مكسب لاعدمتك ..


ناصر القزلان ..


ودي والله اكمل معك لكن ماعندي فرصه غير هالليله وبكره متوجه لاداء فريضة الحج ان شاء الله

لكن سامحني واسامحك :)

[فايز ماجد]

الشاعر المبدع

برج المملكة

الشاعر المبدع

ناصر القزلان

حقيقة

اني أستمتعت بالمحاورة الجميلة والراقية هنا

الله يعطيكم العافية

ابدعتوا

وماقصرتوا

[ناصر القزلان]

أنا اللي طلت الشرف ياطويل الذراع ..

آسف .. الاتصال مهوب اللي .. لكن خذ وكملها بعدين ..



يابرج وشلون الهوى مدري صبا والا سموم = شوف السفينه بالبحر تدري وش اللي يدفعه ؟
افهم كلامي وانتبه لعل تفداك الرخوم = وش هقوتك عند الرحا طحين والا جعجعه

[ناصر القزلان]

ترجع بالسلامة غانم ..

حج مبرور وسعي مشكور .. ولا تنسانا من الدعوات ..

كل عام وانت بخير .. والبيتين احفظهم لين ترد بالسلامه ..

========================================

ابو عبدالرحمن ..

تشرفنا بحضورك ومتابعتك ..

نوركـــ كافي ياسعد ..

========================

الغالي .. فايز ماجد ..

حلت البركه بوجودكــــ ..

الف هلا ومرحبا ..

====================

تحياتي لكل الحاضرين من الاعضاء والزائرين ..
كل عام والجميع بالف خير ..

[برج المملكه]

فايز ماجد

شكراً لحضورك الكريم ومتابعتك تسرنا

لاهنت ..

ناصر القزلان

يفداك اللاش و الله يعطيك العافيه

سلمت و صح لسانك و بيض الله وجهك واعذرني على القصور لاعدمتك

وتصبح على خير

[بعيد المراميس]

ياسلام ابوكم الليل هذا منذو متى :)

ناصر القزلان صح لسانك اي والله

برج في صفك ياصديزي وياليل ياعين عليك

[بعيد المراميس]

هاصحت السنتكم يالثنين وبعدين عطونا خبر انها مباشره :(

[برج المملكه]

ارحب يابعيدوووه


هي جت بظروفها طال عمرك


صح بدنك و كلك يا حبيب تسبدي :)


هلا و مية مرحبا

[ناصر القزلان]

حيا الله أبو جسار ..

لو حضرت حضرت البركه لكن ..

خيرها بغيرها ..


تحيا وتبقى ..

تحياتي ..

[قرررقشه]

يجيك في تالي الزمن من كل مقرود اعلووم *** ياكثر هرجه مير اعرفه قرقعه في قرقعه

يبرق ويرعد والسما صافي ولا فيها غيووم *** يجيب هرج اهل الكويت هو ماتعدا المجمعه