العسجديه .. الليل دوبه

[ملحق المخلين]

:11ccer:




يالعسجديه ..الليل دوبه..هاتي سمان الهرج دام السوق غالي=سويت قافي..ثم جيت عاني ..وأنا أدري أن الشعر تنهل من بحوره

حسنه بسيه..ياللي محسوبه..اللول والمرجان من مالك ومالي=للعج سافي..وأكسب رهاني..مالك ومال اللي سراء عقب المشوره


.


.

[اسامي]

الله الله الله


ياولد ياولد

ملحق المخلين


بدع مجنون وقاف مجنون وطرق مجنون وانت مجنون


صح لسااااانك


وانا في صف العسجديه من الحين ومعي بلكّه



ننتظر شاعرة غرابيل

[ملحق المخلين]

أسامي


صح بدنك وإعجابك محل إهتمامي لأنك شاعراً منشق..


(نزل البلكه يا أسامي ) أزيلك

[بعيد المراميس]

ياسلامنيشن على الطاروق هذا

ملحق المخلين لاتهدد اسامي تراني اجزع فيه

وبأنتظار العسجديه ومتابع وعيوني تزالم :)

[ملحق المخلين]

بعيد ياهلا ويامرحبا



ومتابع وعيوني تزالم <<< آفا أنا ماسويت البيوت غار خابرِ بكره ماعندك دوام.



<<<<<<<< تسذوب يبا يزين العلاقه

[العسجديه]

ماهيب ليه00 لوقلت توبه00 احسب حسابك كان تبغاها نزالي×××شاعر خرافي00 والعلم هاني00 لو طول المشوار بين لي قصوره
بالعنجهيه00 منته بصوبه00 وش جاب قاع الارض يمك يالطوالي×××جعله عوافي00 لو ماعناني00حاله مع الايام في لفه ودوره

[برج المملكه]

الله الله الله
الله الله
الله

/
/

حقيقه طرق مجنون من مجنون فعلاً

ورد اكثر جنون من شاعرتنا شاعرة غرابيل

الصف بكل ماوتيت من قوه مع العسجديه

وملحق المخلين يلد عينه في بلكة اسامي لاتجيه بلكه مايدري منين هي جايته :)

واصلوووووووووو

[العسجديه]

اسامي

حي حضورك الي انا اتشرف به قبل الصف ومادام انت بصفي قل يارحمان يارحيم على ملحق ههههههههه

بعيد المراميس

متابعه شاعر بحجمك تهمني كثير ..شاكره مرورك

دمتم بخير

[العسجديه]

برج المملكه

اسعدتني بمرورك واذهلتني بتواضعك وقوفك بصفي لابالله ماعاد يبي لها كلام

انت واسامي بصفي ليلك لليل ياملحق هههههههههههههه

[بعيد المراميس]

الله الله

ياسلامنيشن يالعسجديه

رد ميه الميه


ولحن ميه ميه

برايفت العسجديه

الليل ياملحق ومدام الربع مع السجديه حطني على جنبك والمخرج ملي

[ملحق المخلين]

عندتس


ماقلت شيه.. عود عقوبه..في كل قاف تدوره لو ماطرالي=يابنت خافي..جور الزماني..الأرض ياللي ماتعرف الأرض كوره

روحه وجيه.. فيها صعوبه..ياللي تجود فالرموث امن الحبالي=سهم المصافي..له سعر ثاني..من يشري بغالي وهالسوق بحدوره


.

.

[ملحق المخلين]

ياهلا يابرج ويامرحبا


(أنتبه من بلكة أسامي تراء عيونه صفق ..)



بعيد ياهلا




حياك ربي رجحت الكفه يابو جسار

[ربح السبيعي]

صح لسانك ياملحق المخلين على هالطرق الطيب



وصح لسان العسجديه



وانا في صفك ياملحق المخلين

[العسجديه]

ها دووك

ماشفت زيه 00 ضيع دروبه00 مع مهمي ٍ يختلط مره بحالي××× لو مايشافي00 نطق لساني00 يثبت ويثبت حجته عن قول زوره
دره نقيه00 سبك ا بعذوبه00 واعزتي لك لاجنيه ولاريالي××× جاك اعترافي 00 وانا مكاني00 انته وش انته غير قيفان معثوره

[العسجديه]

ربح السبيعي

صح بدنك اسعدني مرورك

دمت بخير

[اسامي]

ياوجه الله




ماشفت زيه 00 ضيع دروبه00 مع مهمي ٍ يختلط مره بحالي= لو مايشافي00 نطق لساني00 يثبت ويثبت حجته عن قول زوره
دره نقيه00 سبك ا بعذوبه00 واعزتي لك لاجنيه ولاريالي=جاك اعترافي 00 وانا مكاني00 انته وش انته غير قيفان معثوره

ايييييييه اييييييييه


ليلك اورااانبي ياملحق


صح لسااانك ياشاعرة غرابيل .... مبدعه مبدعه مبدعه



اديلوووووو






.

[العسجديه]

اسامي

الابداع حضورك لاعدمتك>>> بتنهار من طرق ملحق الي طول طريق الحجاز

ولا اوصيك اهجده هجاد رقود لين ينسى طروقه هههههههههههههههه


دمت رائع كما عهدتك

[سـعـد الحويماني]

متابع

[ملحق المخلين]

هاااتس



بأرضِ خليه..مير أبشروبه..دامه على سطح البسيطه مانبالي=العد صافي..يوم تحداني..ماني وكيلِ له ولالي في غروره

باقي بليه .. ويشق ثوبه..وأنا من البدعه وانا أغني لحالي=قلت متعافي.. وأثره يعاني..ياللي تبا القبله وناحرت لشروره


.


.

[ملحق المخلين]

ربح هلا وغلا



حياك والله متابعتك شرف


وشرفت الصف وراعيه....





أسامي

7
7
....................

...................



سعد حياك

متابعتك شرف يالغالي

[العسجديه]

دووووووووك

مقلع طميه00 لوغررو به00 واعزتي كان الفخر يومه يلالي00 الكيل هافي00 عشره ثماني 00 كف الكريم تمد مدات مخبوره
جال الركيه 00 ماغثربو به00 شنته تقرع والرشا فوق المحالي00 عذب القوافي00 خذها ضماني00ا شعيل يهدر عقب مادقيت زوره

[العسجديه]

سعد لاهنت على المرور والمتابعه

[اسامي]

مقلع طميه00 لوغررو به00 واعزتي كان الفخر يومه يلالي= الكيل هافي00 عشره ثماني 00 كف الكريم تمد مدات مخبوره
جال الركيه 00 ماغثربو به00 شنته تقرع والرشا فوق المحالي= عذب القوافي00 خذها ضماني00ا شعيل يهدر عقب مادقيت زوره


الله الله

ياسلام



العسجديه تبيني اهجده على الهجاد اللي هو فيه


تراني مسلم وارحم اخوي المسلم



خلي في قلبتس رحمه



.

[ملحق المخلين]

أنا رحت أصلي معليش أن تأخرت.




هاااتس


نسمع دويه..مازاح طوبه..أنتي يبالك ترجماني ياحلالي=قلنا ياكافي..وين المعاني ..قالت ياوجه الخير ماهي بالضروره
العامريه..فيها عروبه..لكَن فيها علةٍ وسط الطحالي=والكيّ شافي..للي عصاني..حتى تعرف اللي كتبته في سطوره

.


.

[ملحق المخلين]

أسامي الله يدبل تسبدك


هالحين أنت مصدق أن فيه صفوف يومنك تسحب البيوت معك في كل مشاركه :11bomb:

[العسجديه]

تقبل الله

ودوووووووك

عليه ديه00 لو حاولوبه00 ماسدها لوباع بيته والعيالي×××× بانت خوافي00 قاصي وداني00 هرجه يبين حالته فيها خطوره
كيه بكيه 00لو عزروبه00 ترى الجروح قصاص من رب الجلالي×××× كانه سنافي00 رفيع شاني00 يعرف بان الجزل من عندي عبوره

[ملحق المخلين]

هاااتس



هاذي قويه..ماسندوبه..ماتاصل التهمه لبو زيد الهلالي=من حج طافي..رسم البياني ..شرح مفصل فأول الأبيات صوره
ماهي لضيه..ولا رطوبه..النار من عندتس مثل برد الشمالي=لو أختلافي..عند الحصاني..ماقلت طف النور لا يعميك نوره

.


.

[العسجديه]

ملحق صح لسانك مدد بلاعدد ابدعت يالجزل واستفدت منك واستمتعت طرق لاول مره العبه اتمنى تسامح اذا
فيه قصور وان وفقت فأنما هو بفضل الله ثم بفضل ابداعك وطيب سريرتك

لك كل التقدير والاحترام

[اسامي]

ملحق المخلين


صح لسانك ولاهنت



العسجديه

صح لسانك ولاهنتي


مبديعن وامتعتونااا الله لايهينكم

[ملحق المخلين]

العسجديه


صح لساااانتس


وسلمتي على المجاراه , وبعيده عنك القصور . .


وماتحتاجين لشهادت أحد.. شاعره بمعنى الكلمة


لكِ الشكر ..



................

<<<<<<< فرحان أسامي هرجني مثل العرب :11ap:


صح بدنك ومشكور على الكلمات الغريبه منك .. :wink:

[سـعـد الحويماني]

حقيقه ابدعتوا


صحت السنتكم جميع


اخوكم

[سعد البراق]

محاوره قمه ورائعه

بين

شاعر قوي وبنفس الوقت معقد ومجنون هههههه


و


شاعره غرابيل الاولى بلا منافس


استمتعنا بابياتكم الجزله والله يعطيكم العافيه

[حاكم الشور]

ملحق المخلين


بيض الله وجهك

ومبدع دائمآ

طاروق من نوع آخر

( ومعنى ) ايضآ جيد جدآ

مع ابداع مقابل

من العسجديه


صحت السنتكم مره آخرى

[صادق الإحساس]

شاعره غرابيل الاولى بلا منافس



هااااااااااااااا


هنا بيت القصيد فعلا !!!!!!!!!!!!!!!!!


قلت بهذا وسوف أقول وأكرر أن
شاعرة غرابيل الأولى وبدون شك
وبدون أي منافسة تذكر هي :::ـ



العسجدية



ومن لم يقتنع فليأتينا من يحاورها من
الشاعرات في هذا المنتدى شاعرات ::ـ

الفتل والنقض

وليس شاعرات من تجلس شهر أو نحوه
في بناء القصيدة وربما ... يعدل في
أبياتها المكسرة أحد المعدلين الأخيار

أمر مؤلم حقا أن ترى تحت معرف هذه الشاعرة المبدعة
مسمى ( نجم مشارك ) وكأنها حصلت على هذا المسمى
من خلال عدد المشاركات بينما ترى من هي أقل منها
بمراحل مسميات ( شاعرة !!!!!! )

ما لم ... ينشر العدل في فضاء الشعر ويظهر ميزان
الحق في ساحات الأدب فسوف نقول ونتكلم بكل أمانة




بربي :زعلان:

حينما أرى شاعرة مبدعة تقارع أفضل الشعراء في غرابيل
بجزالة شعرها وبقوة وتماسك وترابط أبياتها وبقمة أخلاقها
وعمق أبياتها والصور الإبداعية فيها ثم ترى نسيان أو تناسي
وضع على الأقل مسمى ( شاعرة ) تحت معرفها بل أن الإنصاف
كل الإنصاف أن يكتب تحت معرفها ::ـ


شاعرة المحاورة الأولى




والله :زعلان:

أنه يغيظني كل هذا التمييز وعدم الإنصاف في حق
هذه المبدعة لكن أصحاب ( الشعر الحقيقيين ) يعلمون
ما لهذه الشاعرة من شأن وسوف ينصفونها مع كل
بيت سوف تكتبه هذه الشاعرة المبدعة حقا !!


أقول وسوف أقول
ورزقي على الله


لكل صوت حق
ود و ورد


صادق الإحساس

[صادق الإحساس]

الشاعر المميز / ملحق المخلين

الشاعرة المبدعة / العسجدية



محاورة رائعة
بروعة شعرائها




صحت الألسن
وصحت القلوب




لكما
ود و ورد




صادق الإحساس

[العسجديه]

اسامي
صح بدنك يعجز للسان عن شكرك على متابعتك00 حضور مميز اضفى جو رائع على المحاوره

سعد الحويماني
صح بدنك والابداع يكمن في متابعتك

أسامه سعد

اخجلتني بكرم اخلاقك شهادتك وسام وان كنت تراني شاعره غرابيل الاولى فأنا تلميذه نهلت هذا الفن منكم

مرورك واطراءك محل تقديري


حاكم الشور

صح بدنك يالجزل لاهنت على المرور

صادق الاحساس
صاحب القلم الراقي صح بدنك وشاكره لك احساسك مرور مميز وعطر طوقتني بعبارات الثناء والمديح
ضاعفت مسئوليتي ان ابقى بالمستوى الذي يشرفني ويجعلني استحق ماقلت

اخي صادق الاحساس لاتنظر الى الالقاب فهي لاتعني لي شي فلو نظرت للشعرمن منظار كم لقب احصل عليه فالشعر بريء مني ويعلم الله أن ماقلته ليس غرور او تعالي ولكن اعتبرها قناعه000

واشهد بالله ان هذا المنتدى لم يبخس حقي بل اعطاني الكثير يكفيني احتكاكي بعمالقه غرابيل ولاستفاده منهم والذين اعتبرهم بعد الله سبحانه سبب لصقل موهبتي00

اخي00شعورك مصدر فخر واعتزاز مجرد شهادتك لي تكفيني لا احتاج القاب
فهل لقب شاعره غفر لمن كان معرف لها تحت اسمها؟
انا لا احتاج لمعرف لانه يفترض ان تعرفني ردودي وابياتي واخلاقي قبل هذا وذاك

مع تسجيل اعجابي بشاعرات مبدعات هنا في غرابيل ولا اريد ان اعدد اسماء خوف ٍ من ان تخونني الذاكره واغفل احداهن

همسه لك00 ياصاحب القلم الراقي اتمنى ان ارى نقدك لي واتقبله برحابه صدر لانه لايوجد شخص كامل فالكمال لله وحده

اشكرك من الاعماق

واشكر جميع من عطر صفحتي بالمرور حتى لو لم يكتب رد والشكر موصول لاخي (ملحق المخلين )على ابداعه الذي كان له انعكاس واضح على مستواي في هذه المحاوره

دمتم بخير

[ملحق المخلين]

سعد الحويماني


حياك ونشكر لك متابعتك



أسامه سعد


حياك والله وسلمت ( معقد ومجنون مره وحده )ههههههههه



حاكم الشور

ياهلا والله بأخوي يعلم الله أن مرورك يعني لي الشي الكثير..




صادق الأحساس


صح بدنك

ولك الشكر والتحيه على مرورك المميز