هداج تيماء .. زميلي في الوظيفه ..!!

[برج المملكه]

السلام عليكم ,,

هداج تيماء استلم وامنعنا من السلاح


ازهموا هدّاج تيما زميلي في الوظيفه=ودّي اخذ معه واعطيه من باب الزماله
لو دريت عن الخبر كان قطّعت الصحيفه=واختلفت مع الاداره و قدّمت استقاله

[ملحق المخلين]

أسجل الحضوررر




وأتابع بعد قولت صح لساااانك ملايييييييييين





<<<<<<< يحتري رد هداج على شاااان يجي في صفه





لاتفوتكم هالمحاوره يامتذوقين الشعر

[برج المملكه]

8
8
8
8


مرحبا ملايين وانا مانيب مخليك فيها بس اصبر عليّ خل هداج وصفه ههههههه


هلا و رحب ياملحق المخلين ..

[هداج تيماء]

وعليكم السلام ورحمة الله وبركاته

وحياك الله يابرج المملكه واستلم <<< وترى الاسلحة مع المحور

^
^
^
^
^
^
^


عدّ يالبرج المسمى على الروس المنيفه=والسحاب اللي لمحته توكد من خياله
من تضجر من ربيع الزمن يلقى خريفه=والجمل زومان لو غاب من ياقف بداله.
.
.
.
.
.
.

[هداج تيماء]

ملحق المخلين

حضورك حضور السعد

ارحب ارحب تراحيب المطر شرفنا توجدك

وتسرنا متابعتك والصف وراعيه يفخرون بك يالقرم

[ملحق المخلين]

برج

ازهموا هدّاج تيما زميلي في الوظيفـه
ودّي اخذ معه واعطيه من باب الزماله
لو دريت عن الخبر كان قطّعت الصحيفه
واختلفت مع الاداره و قدّمت استقالـه




هداج



عدّ يالبرج المسمى على الروس المنيفه
والسحاب اللي لمحته توكد من خيالـه
من تضجر من ربيع الزمن يلقى خريفه
والجمل زومان لو غاب من ياقف بداله



تصميم وزخرفه وإبداع


متابع

[ربح السبيعي]

ياسلام على الابداع



صح لسانك يابرج على البدايه القويه



وصح لسان هداج تيماء على الرد الوافي



واصلو وانا متابع للفايده

[برج المملكه]

طيب طيب

استلم .. والله يخارجنا


شفت برّاق السحابه ولا اعجبني رفيفه=وكل راعي ذود مثلي بذوده ما عناله
الجمل زومان شال الثقيله و الخفيفه=وانت ياهدّاج عدّ ٍ طويلات ٍ حباله

[برج المملكه]

ملحق المخلين .. و ربح السبيعي


حياكم الله وجودكم شرف ومتابعتكم تزيدنا لاعدمناكم


هلا ومرحبا

[اسامي]

الله الله الله


برج المملكه


وهداج تيماء


وليله غيييير


اجتماع مغلق ومناقشه تحت طاولة العمل


متابعين لكم ياعمالقه


ولازلنا نتعلم منكم


واصلوا لاهنتوااااا

[هداج تيماء]

الله الله

هاستلم

^
^
^
^
^
^


لا تخاشر بارد الحيل في كسرة رغيفه=لقمته ما اظن تكفيه وتكفّي عياله
علمّ القاضي يفسر حلومه للخليفه =لا يسريها بعد جات في نص الرساله

.
.
.
.
.
.

[ابن نميش]

ههههههههههههههههههههه

يالربع هي فوضه ؟




























مشرفين يلعبون مع بعض











وموضوعي حاطه امس ومطنشينه









هههههههههه


صح السنتكم

أنا اللي مع اهل العرف و الشعر و الابداع
إليّ منزلـه تشهـد عليهـا مواضيعـي
عليّه طرت من عقب ماذعـذع الذعـذاع
وقلت اختصرهـا فـي مربّـع تواقيعـي


ول ول ول

عرك الله

ههههههههه

يا سلام يابرج

صح لسانك انت كيف

طرت علاك توقيعي

ياخي عطنا من قصيدك

انت مجزل فعلا


واصلو

[هداج تيماء]

ملحق المخلين

هلا وغلا

والابداع هو حضورك المشرف

لاعدمناك تقبل الشكر

ربح السبيعي

مرااااااحب

وصح بدنك وصح كلك على هذا التوجد المشرف

ومتابعتك تسرنااا

والفائدة لنا بالتأكيد في تواجدك بيننا


اسامي ( القائد الاول في الخطوط الامامية ضد المحور )

هلااااا والله وسهلااا

تواجدك فخر لنا ومصدر سرور

وكلامك المتواضع لا يزيدك الا رفعة

الله لايهينك وتقبل شكري

[هداج تيماء]

ابن نميش

مرحباااا مليااار

عز الله انك تضفي على المحاورة جو

من المرح والفكاهه التي تعطيها طابع اخوي

وحماسي في نفس الوقت

الله لايهينك على هذا التواجد المشرف

وصح بدنك

وبالنسبه لموضوعك يا اخي لا تستغرب ان ما احد رد

انت مروع الناس اولاً جايب لحن قديم وعسر هههه

وتقول يضيع ابها الشواوي << وهجت العالم ههههه

[ابن نميش]

ههههههههههههههه

والله ما فيه شواويه

كلكم اهل اباعر مار ردو

واشكرك على الاطراء

صراحه عرقتي بشت على الكي بورد ( هلي بغيت اجيب المطمه) يعرفها بعيد

هههههههههه

ياخي وش الاخلاق سلف ربعك

هههههههههههههههههه

الله يسلمك ياهداج وانت تعرف رايي فيك وفي البرج

والله يخلي للرجال ارجالها

[برج المملكه]

عندك عندك .. :)



خلّها بيني و بينك نباها بالنصيفه=لاتروح بعيد كل المقاضي في البقاله
الدريول و المعاون على ددسن نظيفه=يدرجون الارض كلّه من اسباب البطاله

[برج المملكه]

هلا و مرحبا

اسامي

ولازلنا نتعلم منكم <<<< يعجبني تواضعك ولو كان في الحقيقه انه ماهوب تواضع بل اعتراف .. :)

لكن هلا يامرحبا وياحرّي يافرقاك .. :11ight:



ابن نميش .. هلا و مرحبا


بصراحه انا حضرت لكن كان حضوري بعد ردك الثاني يوم انك سريت ؟ واحرمت عمرك من اللعب ومن اللي يبا يلعب معك

وبيتينك راحت هباء ً منثورا من ردك الثاني لو انك سلمت من ردك كان يمديك تلعب لهالحين .. :)

مار انت تبا لك مطر في شرقه ههههههههه

[ابن نميش]

عساها ماتثني من بيوت بس...

حبكت يعني

ياما غدا على الحاج

ولاحركت شعره ولاطلعت شيب

لاكن حسب قولك اللعب معك مكسب

ولا كان راحت عجه وزوابع لانك مالك حل الا العجاج

وعلى طاري العجاج اليوم يقول استغاثو المسلمين

والله الفاضي ابن نميش

هههههههههههههه

فالرس جاهم عجه عانها مقنتيه الله لايورينا قوته

يبون مطر وجاهم عجه يالله اني في حجاك

ياكريم

[هداج تيماء]

الله الله

هاستلم

^
^
^
^
^
^





الزناتي كان غازي على ديرة حليفه=بعد شافه حط نفسه يبا ديرة خواله
والدريول لا نوى ينسجم شغل لطيفه=وان نهوه الناس عنها يحط البرتقاله



وتراني فالصفحة رقم واحد من اليوم انتظر الرد وتوي انتبهت

[برج المملكه]

عندك عندك ..

:)


انت يا هدّاج ما شفت ملفي و ابن ريفه=فاتك الموضوع كلّه و قفّلنا مجاله
انصدمت و صدمتي فيك يالصاحب عنيفه=كيف يذبحك الضما و الرشا فوق المحاله

[لطّام]

ياسلاام ياسلاام




متابعين للفائده

[برج المملكه]

لطام




مرحبا بمتابعتك وتواجدك

[العسجديه]

برج المملكه و هداج تيما

موعد مع عمالقه الشعر والابداع ابقاكم الله ذخر لهذا المنتدى

صحت قلوبكم

متابعه للاستفاده

لكم احترامي

[هداج تيماء]

هادوووك

^
^
^
^
^
^




وش نسوي فيك يا راعي العين الكفيفه=ما تشوف وتجحد اهل الوفا واهل الجماله
قايد الحمله سرى بك على متنه بكيفه= ما نواك الا بشرع الوفا من طيب فاله
..
.
.
.
.
.
.

[هداج تيماء]

لطام

اهلا وسهلا وتسعدنا متابعتك


العسجدية

مرحبا وشكراً على التواجد ولاهنتي

[برج المملكه]

عندك .. :)



الشريف اللي تلوّى على حبل الشريفه=ما طرى لك يا ابيض الوجه موضوع ٍ طرى له
درهمت بك في السعه و انطلق حبل العسيفه=مانت داري في جنوب البلد و الا شماله

[برج المملكه]

العسجديه


شاعرتنا الاولى ..


حيّاك وحيّ مرورك وحضورك الرائع بروعتك ..


دمتي بهذا الجمال

[هداج تيماء]

ها دووك

^
^
^
^
^
^
^
^


ما يضر الفارس اللي معه درعه وسيفه= لو يقابل عشر من برج وامثاله لحاله
يا سحابً لاح في سكتي برّاق صيفه= يغري العربان لو ماه مايملى البياله
.
.
.
.
.
.
.
وصح لساااااانك مراراً وتكراراً يالبرج وقد تشرفت كثيراً بمجاراتك

والله لايهينك الختام عندك ترى النوم سلطان والالتزامات تحكم الانسان

تقبل شكري وتقديري

[برج المملكه]

ههههههههههههههههه

الله الله الله

وكفو و الله يا هداج ..

وعز الله انك على اسمك وماجيتك الا خابرك ..

صح لسانك وسلم راسك .. يازميلي في الوظيفه .. :)

تصبح على خير و اسمح لي وتراك مسموح ..

برج المملكه

[سعودعبدالله]

الله الله الله



صحت قلوووووووووووبكم ولاهنتوووووو على هالبداع الغير مستغرب


واسف على عدم تواجدي اثناء هطول البداع وخيرها بغيرها ان شاء الله


لكم كل التقدير

[هداج تيماء]

برج المملكه

صح بدنك وفي نفس الوقت صح لسانك

ولاهنت على المجاملااااات الاخوية

ومسموح دنيا وآخره بس على ايش

ما حصل قصور ياذيبان

وتمون حتى ولو حصل



الرائع /سعود عبد الله

بلا شك افتقدناك

وليتك حاضر اقل شي تفرق بيننا

ولكن من حضر ماغاب

مرحبا تراحيب المطر

صح بدنك وصح كلك

والله لا يهينك على مرورك المشرف