الحجاج كم هير لاعلمك الله لعبها

[بعيد المراميس]

استلم يالحجاج:11bomb:


ابا اسمي الليله وابا اذكي الحجاج=وابا اقطعه واحفظه في وسط ثلاجه
مدامه مهوب أسامي ولاهو بهداج= اجل ذبحته عندي تراها ولا حاجه

[سامي العتيبي]

استلم يالحجاج:11bomb:


ابا اسمي الليله وابا اذكي الحجاج=وابا اقطعه واحفظه في وسط ثلاجه
مدامه مهوب أسامي ولاهو بهداج= اجل ذبحته عندي تراها ولا حاجه



الله الله الله




الليل الليل


صح لساااانك يا بعيد المراميس وننتظر الحجاااج واصلوو وا صلووو



تحيااااااااااتي

[السـلطان]

لاهنتوا


ومتابع لين تنتهي الذكااااااه



ثم ربي وربكم الله

[بعيد المراميس]

صح بدنك ياسامي العتيبي ولاهنت ياولد العم

وخلك قريب يهمنا حظورك يالقرم

[سامي العتيبي]

معك وفي صفك يا زعم وشد حيلك ولا تكلف

[ملحق المخلين]

صح لساااانك يالبيطار




وعاين في مدرب الصف تراه أنا



متابع للجزاله



وننتضر الحجاج

[بعيد المراميس]

هلا وغلا يالسلطان

مرحبآ الف اي والله

ويكفينا تشريفك الله لايهينك

والذبحه الظاهر انه انا اللي بروح فيها لاكن خلك قريب وان شفتني رحت فيها افزع لي :)

[بعيد المراميس]

سنايدي ياسامي لاعدمتك اي والله


يامرحبآ ياملحق المخلين الحي يحييك والميت يزيدك غبن


مدامكم معي هاوكلوا الله ذكيته مافيها ههههههههههه

[هداج تيماء]

ابا اسمي الليله وابا اذكي الحجاج
وابا اقطعه واحفظه في وسط ثلاجه
مدامه مهوب أسامي ولاهو بهداج
اجل ذبحته عندي تراها ولا حاجه



اعط القوس باريها هذا المثل الذي يقال عندما

يبدع القاف بعيد المراميس

صح لساااااااانك يابو جسار

بسم الله والله واكبر وخلها على القبله

ولا يهون اخونا الحجاج ننتظره

ومتابعين للفائدة

[ربح السبيعي]

صح لسانك يابوجسار على البدايه الرائعه



وننتضر الحجاج

[لطّام]

هذا والله المبدا التسايف http://www.roro44.com/smilies/happy/014.gif


مير تباني اعلمك الصف حاامي والداب الداب :)







http://www.roro44.com/smilies/happy/051.gif


http://www.roro44.com/smilies/happy/055.gif << تعين قايد الصف تسيف يومي بشماغه :)





اللليل الليل يا الحجاج وانا والله اني يوم قريت الموضوع احسبنّكم بتطقونها اربعه


ابك تسيف لاعلمك الله لعبها :هاها:

[حاكم الشور]

صح لسانك والله يابعيد

الله يستر العود معصب

وجايبٍ مبداء حرابي

نبا نشوف النقض عاد

متابع بشده

وماسك الصف

[برج المملكه]

بعيد المراميس

و

الحجاج


سوف تكون محاوره رائعه بكل المقاييس وانا ضد الحجاج ويابعيد المراميس اذا ذكيته عطني كبده وقلبه والضلعه وقصب الصلاخ عطه سعود ههههههههه


واصلوااا و تراني في صفك يابعيد المراميس جهرى و العين ترى

لكم احترامي وسلامي

[الحجّاج]

مرحباء يابو جسار



واستلم



ياليتك تخفض الصوت وتخلي الازعاج=وتقفل على باب النشايب بمزلاجه
لونك تبا المخراج ما حاصلٍ مخراج=ولاعاد تلقا مخرجك وانت محتاجه

[الحجّاج]

سامي العتيبي

مرحبا بك مرتين على ردود الثنين اللي واحد زين وواحد شين


السلطان

حياك الله و ماسمعت بالمثل اللي يقول ( لاشفت ضول الناس حذرا تعسه ) !!!

ملحق المخلين

هلا و مرحبا شرفتنا لاعدمتك

هداج تيماء //// ياشيخ ياكبر الخطا منك كبراه // لاصرت امير ومن قبيله و شايب هههههههه

حياك حياك

ربح السبيعي هلا و مرحبا شرفتنا

لطّام

ارحب ارحب و تعال قابل قابل خل عنك بعيد وخوصته اللي ماتذكي حتى الجربوع خلني انا ههههههههه

حاكم الشور

على اسمك وياهلابك وعساني نقضت البيت و طرحت العمود هههههههه

برج المملكه

هههههههه انت اخذن قلبي مبطي لاتطلب ابو جسار ولاشي اللي تباه قد اخذته مبطي

هلا ومرحبا بالجميع نك نك

اخوكم الحجاج

[العسجديه]

بعيد المراميس والحجاج

ابداع وجزاله لاتستغرب من اهلها

صحت قلوبكم

متابعه


دمتم بخير

[اسامي]

الله الله الله


ياسلام ياسلام


مبدا بعيدي اجرامي

ورد حجاجي شرس


محاوره من بدايتها تبشر بحرب طاحنه


بعيد المراميس صح لسانك يا رائع

الحجاج صح لسانك يا مميز


متابعين للحرب لاهنتواااا واصلوا

[سامي العتيبي]

((سامي العتيبي

مرحبا بك مرتين على ردود الثنين اللي واحد زين وواحد شين ))



الله يهديك يالحجاج ما يجي الشين من عندي ....



واصلووو وعسااكم على القوه ...


ننتظر ردك يا بعيد المراميس ولا ترد السكين ........

[الصقر البرازي]

الحجاج


الست القائل


ارى رؤسا قد اينعت وحان قطافها واني لقاطفها



دونك الروس حلقها وانا امسكها لك واحد واحد بس لاتذبحني معهم تراني خويك هههههههه




سرى سرى والعين ترى

[محمد الجبريني]

الحجاج هذا تقول انه انا هو فيه حجاج ولا اخذ سيفي وابااارز على الريح ماخذ حذررره
من القوم هههههههههههههه لا اشوي العلم ماهو في سنعي الله الله بعيد + الحجاج = نتيجه مايحتاااج وجزززله متااابع
قلب وقالبً لله دركم

واصلو ومادام فيها ذبح اوطبخ وصلخ وتقطيع ماني مبعد ننتضر النتايج

تحياااتي

[هداج تيماء]

ياليتك تخفض الصوت وتخلي الازعاج
وتقفل على باب النشايـب بمزلاجـه
لونك تبا المخراج ما حاصلٍ مخـراج
ولاعاد تلقا مخرجك وانـت محتاجـه

اشهد انك جزل ومن اول ابيات وضعتها في هذا المنتدى

يالحجاج صح لساااانك والجمل لا طاح كثرت سكاكينه

وانت جمل وان شاء الله ماتطيح ههههه

(ياشيخ ياكبر الخطا منك كبراه // لاصرت امير ومن قبيله و شايب )

ورد على بيتك استلم

ياذيب ياللي هيض القلب بعواه = يشكي من الدنيا كثير المصايب
وش جاه منّا ياهل العرف وش جاه = يبشر بنا في سلم والا حرايب
خلوّه يثبت عند الاخيار دعواه = والاّ يجنّب عن دروب النشايب

ههههههههه

الحجاج صح لسانك مرار وهذه فقط مجاراه لك وسلمت ودمت

[ملحق المخلين]

صح لساااانك يالحجاج


بيوت جزله



مار يبا يجي بعيد لي والله ماكن ربي خلقها .

<<<<<<<< ماسكن الصف ماتعب

الليل

[بعيد المراميس]

الله الله

استلم


تسلف من التاجر وتسترفد المحتاج= وعينك ترف ان شفت من يعقد حجاجه
مريّح مرِيح القلب نومك على ديباج=وكم من كريمٍ راح فيها ليا الصاجه

[بعيد المراميس]

هداج تيما: يامرحبآ ومسهلا اي والله وعلى القبله والا اذكيه شرق ماعليك اهم شي تكون حاضر الذكاه والضاهر انها تتعود فيانا ههههه
ربح البيعي: مرحبآ ياربح تراحيب المطر اي والله واهم شي حظورك يالقرم
لطام: ارحب ارحب يالطام حظورك مكسب ولو تبينا نقللبها اربعه قلبناها بس تكون موجود انت. لاعدمت حظورك
حاكم الشور:انت وراك اشغلتني العود العود وانا اصغر منكم كلكم صغرت عيونكم :)<------ من قلب هههههه
برج المملكه:ههههههههههههههههه� �ههههه ابك تسيف قصب الصلاخ يهيب تبي العلم انت تفاهم مع احشاء الدابه هذا وسو اللي تبي ههههه
العسجديه :شاعرتنا الاولى صح بدنك وشاكر لك مرورك الكريم وشهاده نعتز بها :)
اسامي: مرحبآ كثر غلاك وبس خلاص
الصقر البرازي: مرحبآ عدد مواطيك ولاهنت على الحظور
محمد الجبريني: مرحبآ يالقرم حظورك له طابع خاص لاخليت منك ومن حظورك
ملحق المخلين: ياهلا ياهلا والف هلا ولاتسدك يالقرم بس خلك قريب الدعوا فيها رد شرس وانا ضعيفون مالي اخوان كبار :(

[سامي العتيبي]

الله الله

استلم


تسلف من التاجر وتسترفد المحتاج= وعينك ترف ان شفت من يعقد حجاجه
مريّح مرِيح القلب نومك على ديباج=وكم من كريمٍ راح فيها ليا الصاجه

الله الله الله



يا سلام يا سلام



واصلوا وأبدعوا لا هنتوا


تحيااااتي

[أمل عبدالعزيز]

,
,
,
صحت قلوبكم
محاورة روعة
من شعراء رااائعين
مبدعين بصدق.
.
.

[الحجّاج]

استلم استلم







تقوله وانا خابرك تبسط مع الافواج=على قلة التقدير والشيمه تواجه
الا ياحليل الذبذبه جت من الابراج=حديث البخاري وابومسلم وبن ماجه

[الحجّاج]

العسجديه


شرفتينا بحظورك

وياهلا ومرحبا يالشاعره

ولا خلا ولاعدم

[الحجّاج]

اسامي

ياهلاااااا ويامرحبااااااا


وجودك في المتصفح فخر


وحبلي خشمك ويكفي بس متابعتك


ولاخلا ولا عدم من هالحظووور المميز


يالشاعر وتراها هواين ابشرك :)

[الحجّاج]

سامي العتيبي

ياهلا ومرحبا ......

واخذ راحتك وسوولف على ماتبى

اهم شي هيض عن خاطرك

واخوووك اخووو

[الحجّاج]

الصقر البرازي:

ياهلا ومرحبااااااااااااا وغلاااااااااااااا


وحي والله هالاسم وحظوووورك مشرف يالبراااازي


ومايحتاج انت تعرف كل شي عن سيرتي

وازهل وترا التسبووود الك والقلوووووب لخووووك


ولا خلا ولا عدم وخلك متابع لخووووك

[الحجّاج]

محمد الجبريني:


ياهلا والله ومرحباااا


والله يحييك


وعن قولة هو فيه حجاااج ايو ااالله فيه حجاااااااج


ابشر بعزك وخلك متابع لا عدمتك

[الحجّاج]

هداج تيما

هلا والله وغلا وارحب يالامير

وترا البيت اللي انا قلته مقول بس حبيت اداعبك

ولا جاء منك خطا الا ياربي انتسان الذكاه

والذكااااه منك انت وبعيد شرف

لا خلا ولا عدم معي والا مع ابوجساااار كلنا واحد والله واحد

[الحجّاج]

ملحق المخلين

صح بدنك

وهذا رايك في بعيد ...وبعيد شااااعر كفووو

تقبل تحياتي

[الحجّاج]

أمل عبدالعزيز:

ياهلا والله

وشرفتينا بحظوووورك

ولاخلا ولاعدم

[سعودعبدالله]

الله الله



صح لسانك يابوجساار يارااائع


الحجاج... صح صح صح كلك يالذيب




سعود في صفك يابو راكان=وبعيد تكفى صرم ضلوعه





الليل واصلوووووو

[الحجّاج]

صح قلبك ياسعوووووود



وبعيد ابا حطه على النيشان=ولايزعجك ياسعود موضوعه

ياحي والله هالصف اللي انت فيه اي والله

وخلك ماسكن الصف وخفف زحمة المعجبين):

[مرزوق الغنامي]

حاول تفجّر به كما البركان=بعيد طايش طاير ٍ شوعه


الله الله يالحجاج و يا بعيد


محاوره قويه ومن بدايتها مشعلله


واصلوا وانا في صف الحجاج جهرا و العين ترى

[الحجّاج]

>>>>>>>>>يالدابه احشائك في خطر


ياهلابك يامرزووق

ومرحبااااااااااااااا والله وغلا يامرزوووووق

والساعه البرتسه اللي انت جيت فيها

تقبل تحياتي

[برج المملكه]

الله الله الله

بعيد المراميس .. و الحجاج ..

وما زالت الجزاله مستمرّه بين الطرفين ..

واصلواا

[بعيد المراميس]

حيالله من حظر معنا واحد واحد

وصحت السنت شعارنا

واستلم ياحجاج


وانا خابرن مجلسك مع لابسات التاج=وراع الوفا منهجك ماهوب منهاجه
تعلقت في مزمومٍ املس من العاج=وقلبك صخيف وفيه سجه ودولاجه

[الحجّاج]

برج المملكه:ههههههههههههههههه� �ههههه ابك تسيف قصب الصلاخ يهيب تبي العلم انت تفاهم مع احشاء الدابه هذا وسو اللي تبي ههههه


يازقنك يالمشرف النشيط عزالله انك مظبوط وتستاهل يابرج المنصب اللي انت فيه

وغرابيل اذا كان الردووود فيها حكر لحد عن احد فأنا اتعذرك من اليوم ومن غرابيل

وتقبل تحياتي

[برج المملكه]

اخي و عزيزي الحجاج


غرابيل ليست ملك لالي ولا لأي احد من المشرفين ..

واذا قصدك رد زعم اللي انت ناسخه فوق .. فهذا اسلوبه مع من يعزّه وانت تبخصه اكثر مني ..

اهم شي تواجدك بيننا .. ولا يكون خاطرك الا طيّب .. و الكلمه اللي شلتها انت تعلم ان الكلمه تسيء لك قبل ان تسيء لبعيد المراميس ..

وحياك الله في اي وقت اخ عزيز وشاعر نعتز به

اخوك برج المملكه

[بعيد المراميس]

اخي العزيز

الحجاج اذا ردي ازعجك انا آسف

وفعلآ لانك عزيز وغالي حبيت امزح معك ولو مالي معرفه معك مامزحت معك

على العموم المحل محلك وغرابيل ماهي لاملكي ولاملك اخوي برج كلنا اعضاء هنا

وصح لسانك على المحاوره اللي اسعدتني فعلآ :) بغض النظر عن الكلمه اللي حذفها برج وماله حق يحذفها الا لين اطلع عليها مع اني ماراح ازعل من اي كلمه بتقولها لاني عارف صفاء نيتك


تحياتي

[برج المملكه]

بغض النظر عن الكلمه اللي حذفها برج وماله حق يحذفها الا لين اطلع عليها مع اني ماراح ازعل من اي كلمه بتقولها لاني عارف صفاء نيتك


تحياتي

اذا كان ليس لي حق في ازالة مايشوب هذا المنتدى فلماذا الاشراف اذا ً ؟

عموما ً ..

ليس لي الحق فعلا ً ان يبقى اي رد خارج حدود الادب والمسموح به ثانيه واحده ..!!

و اذا كان بينكم مزح فأرجوا ان يكون بحدود المسموح به .. !!

تحياتي

[الحجّاج]

لا يابعيد اخذ ردها

واستلم استلم


انا شوف ساع انه وجب للّسقيم اعلاج=يشم الثرى وسهيل من فوقه العاجه
يشيلون فوقه خرج والخرج فوق اخراج=ياليته يعدل قافه ابرك من ازعاجه




ولّونك تباها للسنه الجايه يابعيد ماعندي مشكله