شعر / جدعان عواد السعيد رحمة ألله عليه

[حواء غرابيل]

مساااااكم طيب وأيامكم فرح 🌹

يابوي في صدري هواجيس وهمـوم

واللي بـرك للحمـل لازم يشيله

قدلي شهرماذاقت عيوني النوم

ياكود غفوة ذيب في كل ليلـه

ادور الراحه عسى خير مقسوم

وشلون صارت راحتي مستحيله

يابوي وانت اسمك مقدر ومحشوم

وان تاهت اقدامي تراك الدليلـه

تعبـت وانـا قبّـل جبـاه وخشـوم

واجامل اللي مانفعنـي حصيلـه

صارت حياة الناس من يفرق السوم

واللي ما معه فلوس ياعزتي لـه

قلّوا هل الناموس ذبّاحـة الكوم

وكثروا مزودة الهـروج القليلـه

وزادوا هل النمّات طرادة اللـوم

هذا تحكي فيه وهـذاك تحكـي لـه

وشفنا شيوخ الاسم من غير مرسـوم

اهل البشوت اللي كممها طويله

لو انها بالسيـف ومناطح القوم

ومداحم الفرسـان يـوم الدبيـلـه

في ذمتي ان تشوف شجعان ورخوم

وتشوف بعض الناس يومـي شليلـه

لكنهـا شيخـة دنانـيـر وخـتـوم

وشيخ الدراهم فوق شيخ القبيله

وانا اعرف ان الناس معطى ومحروم

واللي كتبـه الله لعبـده يجيـلـه

لكن مهمـا عـاش لابـد لـه يـوم

يحط وسط الحفره المستطيلـه

وانا لانـي ظالـم ولاني بمظلوم

لكن علي حمـول بقعـا ثقيـلـه

آجابـه الدنيـا ولانــي بمـلـزوم

اطرد ورى برقٍ سرى فالمخيله

والله ماغبط الا كريـمٍ له عزوم

المـال عنـده والنشـامـا تجيـلـه

وفي مجلسه ذا داخل وذا يبي يقـوم

وكـلٍ عقـب كرامتـه يدّعـي لـه

هذي هي الغايـه لكـن والله علـوم

ماكل غايـه يوجـد لهـا وسيلـه

والله ما يشحنّي راع الكبـر والـزوم

وراع الجميل اللي يمنّ بجميلـه

الطيب يتعب كل قرمٍ وشغموم

ومايكسبـه راع اليمين البخيـلـه

ورفيقي اللي مانفعني ولا يوم

اخير مـن رفقته شـوف الحليلـه

ورفيقي اللي فالشدايد معي دوم

نـذرٍِ علـي انـي مـادور بديـلـه

ودمــــتم بِـــود ...