هباهيب الرياح الموسميه ماتهز طويق........( اسامه سعد )

[هداج تيماء]

السلام عليكم ورحمة الله وبركاته

الاخ القدير اسامه سعد


استلم لا هنت




يا أساامه شب نارك لاتغيب = الذيابه درهمت حول الشعيب
نعرف المفتي ومعروف الخطيب = واصعب اللحظات لحظات الوداع





سلام الله سلاماً شوفته تجلى العنا والضيق = تحيه من بساتين الخزاما شكــّلت باقه
هباهيب الرياح الموسميه ماتهز طويق=ولا تقدر تعدّى لا قفلت الباب والطاقه

[سعد البراق]

طيب طيب


ما نغيب وبالمواقف حاضرين = والرجال اهل المعرفه عارفين
اهل خيرً واهل تقوى واهل دين = واصعب اللحظات لحظات الوداع


هلا يامرحبا ترحيبةً تغني عن التعليق = ليا من البيوت الوافيه جاتلك منساقه
تهرج ياعميلي والمعاني دققت تدقيق = على راسك يهبن الهبوب وحملن اطباقه

[هداج تيماء]

استلم لا هنت




مجلس النواب لاحل الشيوخ =مالهم غير المطوعه والرضوخ
تصدر الفتوى من اصحاب الشموخ= واصعب اللحظات لحظات الوداع




يدوم الك البقا يا صقر حلق فالسما تحليق = وبعض الروس جابواله هل التكتيك حلاقه
انا ودي احوّل بعض خلق الله على التحقيق = واخاف اللجنه اللي فالمحاكم تقطع ارزاقه

[سعد البراق]

هــيـــــــــه

خــــــــــــــــــلـوهـا


دام مانته شيخ ولانته مستشار = مالك ومال الفتاوي والقرار
استرح وارتاح والدعوى تدار = واصعب اللحظات لحظات الوداع


ولا وآ راسك الي كبروه الناس بالتصفيق = تحسبنك ملكت الذود وانته ما معك ناقه
على وضحى النقى نمشي ولا اقبل هرجة التلفيق = ومن له دعوةً ضدي يجيني يكشف اوراقه

[ربح السبيعي]

الله الله


هداج تيماء واسامه سعد


شعار عمالقه ومبدعين


لاهنتو على هالمحاوره الراقيه


متابع للنهايه

[هداج تيماء]

الله الله


هاستلم لا هنت




كيف تنفي شي ثابت فالاصول = انشد العرّاف واصحاب العقول
لا تصير من الغضب رجلً جهول = واصعب اللحظات لحظات الوداع






نصيب الليث واضح ما طمع في لقمة البطريق = وعمر اهل الغنى والفضل ماتشكي من الفاقه
والا يالمزنه اللي قطر ماها مايبل الريق =ترى صدام من كثر المعاند ضيّع عراقه

[هداج تيماء]

مشرفنا العزيز


ربح السبيعي


هلااااااااااااااااااااا ومرحباااااااااااااااااااا ا


شهاده غالية من انسان له ثقله ووزنه


متابعتك تشرفنا


ولاهنت

[ناصر الجهني]

الله الله

أسجل إعجابي بقلم الشاعرين




ذهب
من
هنا
وهو يسجل إعجابه بالمحاورة

[اسامي]

ياوجه الله ... هداج تيما وابو سعد







هداج

وطبعاً مايحتاج .. شهادتي فيك مجروحه


ابداع متجدد من شاعريتك الفذه


صح لسانك ولاهنت يالجزل



ابو سعد

وانت بعد شهادتي فيك مجروحه


مبدع مبدع يالذيب



متااابعين .. ودايم ننتظركم يالثنين



دمتم بخير

[ناصــــر الغيثــــاني]

هــداج تيماء ,, صح لسانك وعلى شانك ,, مبـدا كايف ,, وموضوع رائع




تقبل تحيات أخـــوك ,, جسّـــــــــاس

[ناصــــر الغيثــــاني]

الشــــاعر العمــــلاق أســــــــامة ,, صــح لســــــانك على هالردود القـــوية والمعـــاني المدروسـة !!

شــــاعر بمعنى الكـــلمــة ولاتــجزيك حـــروف (( الكي بــورد )) حقــك اللي تستــاهله .




وأنــــا في صفــك من غيــر مهــونة لأخي العزيز هـــــداج .


تقبل تحيـــات أخـــــوك ومحبــك جســـــــاس

[سعد البراق]

خــــــــــــــــــــــــ ــلــــــــوهــا


الاصول الثابته الها جذوع = مانت جذعً لا حشا ضمن الفروع
والله اني ما احتسيتك بالدروع = واصعب اللحظات لحظات الوداع


حشرت الضب بالدخان في جحره بقى التغريق = نبا نركي علاه الماء يالين يسدد انفاقه
سوالفكم تجي وتروح لا شاهد ولا تصديق = سوالف ليل يمحاها بيان الصبح واشراقه

[هداج تيماء]

استلم يابوسعد لاهنت



يا عميل الخير ياراع العزوم = شايفن جعبتك مافيها سهوم
باركً مبراك ماتقدر تقوم = واصعب اللحظات لحظات الوداع



سوالفنا لها مضمون واللي نام كيف يفيق = رسمنا له طريق وضيعه وانحاست اخلاقه
تخير فالجنوب وسكة التغريب والتشريق = شمالك بحر.... كم ؟ضاعت سفينه داخل اعماقه

[هداج تيماء]

ناصر الرفاعي

يالله حيه مرااااااااااااحب شرفتنا بمرورك

مشكوووووووور والله لا يهينك

ذهب من هنا وهو يشكر الرفاعي على وجوده هنا




اسامي

مرحبا مليااااااااااااااااااار اشهد ان مرورك شرف يا ذيبان

والابداع انت منبعه واستاذ فيه

صح بدنك وعساك سالم وغانم

وكل ماترونه هنا هو بعض مما لديكم

شاكر وجودك هنا وشرفتنا طال عمرك يا راع البرتكانه



الاخ الفاضل / جساس هلاااااااااا وغلاااااااااااا


حياك الله وصح بدنك والرائع وجودك


شاكر تواجدك وشرفنا مرورك

[سعد البراق]

استلم لا هنت


كان تبغاها مثل حرب البسوس = انت لقمه بين نابي والضروس
سابقلك درس باقيلك دروس = واصعب اللحظات لحظات الوداع


تورد لك بضايع ما لها في سوقنا تسويق = تغر الي بها جاهل لها لمعه وبراقه
دروبي ما تحملها ولو تمشي وراي اتضيق = انا خابرك ياهداج ينقص جسمكم طاقه

[ابن دخيل الله]

هداج



ماشاء الله على هالابداع

=============================


اســــــــــــــــــــامه سعد


والله العظيم انك مبدع ايما ابداع


الله لايضــرك


وتراني في صفك لين تموت او اموت او ينتهي عصر الكمبيوتر

ونتفرق شذر مذر


لكما التحيه\ ابن دخيل الله

[سعد البراق]

اخي الفاضل / ربح السبيعي

نتشرف بمتابعتك

===
اخي الفاضل / ناصر الرفاعي

يسعدني مرورك وتعليقك

===
اخي الفاضل / اسامي

صح بدنك يا ولد العم

===
اخي الفاضل / جساس

صح بدنك يالغالي ويشرفني انك بصفي ، من لقاها غيري قائد صفي شاعر كبير بحجم جساس
===
اخي الفاضل / ابن دخيل الله

شهاده اعتز بها وانشاء الله ان عصر الكمبيوتر ما ينقطع علشان نتواصل مع الرجال امثالك
===

[هداج تيماء]

استلم لا هنت



انت لك يومين يالطيب تهوش= رابطينك بالسلاسل وسط حوش
ما تحصل عيش لا جوك الوحوش = واصعب اللحظات لحظات الوداع





بضايعكم من التيوان لو نسقتها تنسيق = مدحها اللي يشوف الشكل والمضمون ما ذاقه
والا يالموتر اللي ماقدر يطلع من التشريق= نشب فالضلع والسواق قامت ترتعد ساقه

[هداج تيماء]

ابن دخيل الله


ماشاء الله على هذا المرور الرائع


وحياااااااك الله

[العسجديه]

هداج تيماء
الرقم الصعب في عالم الشعر تكتب ابدااااع واجزم اننا لم نرى الا القليل
من مالديك
جزل. متمكن. مبدع . تجبر من قرأ لك على متابعتك
الله لايضرك

اسامه سعد
شاعر جزل ومبدع

صحت قلوبكم

متاابعه

لكم احترامي وتقديري

[صادق الإحساس]

العملاق الكبير / أسامة سعد


أجزم أن الحرف الذهبي لم ولن يكون إلاّ لمثلك
شاعر ومتمكن وحاكم و تتحكم لا أقول في :ـ
صياغة أبيات الشعر فقط
بل حتى في الأسلوب الذي
تتعاطى معه وبه في شعرك

حقا ...
لو كان للشعر ربا لكنت أنت له إلهاً
ولو كان للشعر حاكما لأصبحت أنت عليه ملكا
ولو كان للشعر فيه أن يتكبر أو يتجبر لحق لك
أن تركله بقدمك


أشعرك بإعجابي الشديد
والكبير لشاعر بكبر هامتك



الشاعر / هداج تيماء

شاعر ما فيها كلام


صحت
القلوب
والألسن


وعاشت
الرؤوس
والأعمار



متابع لكما بكل عناية وحرص وتقدير
ومشجعا لأسامة سعد بكل فخر وشموخ
ومحترما لهداج تيماء ويستحق ذلك




لكما
ود و ورد



صادق الإحساس


.

[سعد البراق]

هيه

خلــــــــــــــــوهـــــ ا


مانت رابطني وانا من روس روق = خل خشم السالفه يافلان فوق
قبل لا نلزمك في بعض الحقوق = واصعب اللحظات لحظات الوداع


نغزك ابليس يا هداج ثم علقتكم تعليق = ولا ينفعك لو انك تمنى البيت ورواقه
قطعت الدرب كله ما لمحت بدربي الا عريق = تعديته و خليته خلافي وابرك فراقه

[سعد البراق]

اخي الفاضل / صادق الاحساس

صح بدنك واشكرك على هذه الكلمات ويشرفني متابعتك يالغالي وتشجيعك يزيدني قوه

مع العلم اني لا اعتبر نفسي من كبراء الشعراء ولكن من اوسطهم

=======

اختي الفاضله /العسجديه

صح بدنك

[هداج تيماء]

هاستلم لا هنت


روق راعين المواقف يسلمون = يرجح الميزان ساعة يحضرون
وانت مهما كان عندي ماتهون = واصعب اللحظات لحظات الوداع





تقوله والمقاله ياعميلي صعبة التطبيق = يعرفون العرب سرحان واللي يبست ارياقه
جيوش المسلمين اجتاحت الرومان والأغريق =غزوهم بالخيول اللي نهار الكون سبّاقة


الاخ الفاضل والشاعر القدير / اسامه سعد

شرفني كثيراً ان العب معك واستمتعت بهذا الطاروق معك

الله يعطيك العافية على هذا المستوى وهذه الجزالة

ولا تحتاج تزكيه مني فقد شهد لك الجميع

تقبل مني فائق التقدير والاحترام

والخاتمة عندك يابوسعد

اخوك / هداج تيماء

[هداج تيماء]

العسجديه / شيخة شاعرات غرابيل


هلاااااااااااااااااااا ومرحباااااااااااااااااااا ااا

نورتي الصفحه بحضورك الله يعطيتس العافية


متابعتس تشرفني وحضورتس يسعدني

والابداع انتي من اهله

ولك مني جزيل الشكر وفائق التقدير


على ما سطرته يداك هنا

[هداج تيماء]

صادق الاحساس


يا هلاااااااااا فيك كاتب رائع ما شاء الله عليك



صح بدنك ولاهنت

[سعد البراق]

استلم لا هنت


دام ياهداج تبغون الختام = والله ونعمين ما فيكم كلام
والوعد بالعيد لانهينا الصيام = واصعب اللحظات لحظات الوداع


شهد لك واحدً معروف بالتطبيل والتوهيق = وقال انك عرفت جلال كل العلم ودقاقه
انا خابرك شاعر تعرف التجميع و التفريق =و لكن لا تسابقنا معك ما عندك لياقه

اخي الفاضل / هداج تيماء المحترم
السلام عليكم ورحمة الله وبركاته :

مع اني ما اعرفك الا بهالمنتدى ولا اعرف حتى اسمك الحقيقي
ولكن
يعلم الله اني احبك في الله ويشهد الله على ذلك
والي يقرى المحاورات الي جرت بيني وبينك في هالمنتدى
يقول هذولا اكيد بينهم مشاكل ولكن لعل اساليبنا تتشاهبه من حيث حب الهجوم
وانا تراي ما احب المحاورة البارده الي كلها مجامل
واعشق المحاورة النارية بشرط ان لا تخرج عن حدود الادب ولا تخالف الدين الاسلامي

اشكرك اخي الفاضل على سعة صدرك والى لقاءً ناري آخر ولكن بعد شهر الصيام ان كانا من اهل الدنياء
والسلام عليكم ورحمة الله وبركاته

[هداج تيماء]

الاخ العزيز / اسامه سعد

وعليكم السلام ورحمة الله وبركاته

احبك الله الذي احببتنا فيه

وانا ايضاً اكن لك المودة في الله والتقدير وفائق الاحترام


ونعم انا معك يمكن اللي يقرأ لنا يقول هؤلاء اعداء

ولكن نحن اخوان اولاً ثم زملاء كاعضاء

في هذا المنتدى العريق وما بيننا الا المحبة والاحترام

والعلوم الغانمة

ومبروك عليك شهر رمضان اعاننا الله واياكم على صيامه وقيامه

وتقبل الله منا ومنك صالح الاعمال


اخي اسامه تقبل مني الشكر الجزيل والاحترام الوافي لشخصكم

على ماسطرته يداك هنا من كلام لايصدر الا من انسان نبيل

والسلام

اخوك هداج تيماء