المساعد الشخصي الرقمي

مشاهدة النسخة كاملة : من يعرف هذه القصيده


محمد الدهمشي
14-09-2006, 07:41 AM
يقال ان احد مشائخ شمر اللذين كانو يسكنون في الغزاله قرب حائل ثم هاجر بسبب الفقر الى العراق واستوطن في منطقه يقال لها نقرة ايوب ثم اتته قصيده من عجوزفي الغزاله تنخاه بان يرجع الى ديرته لان الاجناب ولوها فتضايق هذا الشيخ من نخوة العجوز وقال للذي بجنبه

وش هقوتك مداد من نقرة ايوب = العصر مايمسي حوال الغزاله
فوق اشقرن طلق الذراعين مرعوب=اسرع من الشيهان معلف عياله
فقال الرجل اللي بجنبه وين انت والغزاله والناس لقت الخيرهنيا00فوضع الشيج يده على خده ومات بنفس اللحظه من القهر


من يعرف فيكم قصيدة العجوز اللي نخت الشيخ وجنت عليه 000 وله الشكر الجزيل
بعيد المراميس
16-09-2006, 08:39 PM
اخوي ابو راشد

حاولت اجيب قصيدة المرأه كامله لاكن هذا اللي حصلته وان شاء الله يفي بالغرض

و الشيخ هو : الشيخ فايز بن هذيل العمودي من شيوخ العمود من شمر

وهي تنخى بن هذيل تقول:



قالت وحيشه يامـلا ليـه ماشيـب=وغرس الجدود اللي غدا وقت الافلاح
ياغيبة بـن هذيـل ياغيبـة الذيـب=شفنا النكاير والنكـد عقـب مـاراح
ياراكبٍ حمـرا تجيبـه تحاضيـب=تومي يديهـا بالخـلا تقـل زنـاح
حمرا هميمه من خيـار المناجيـب=اكواعها عن لمسـة الـزور طفـاح
حمرا ليا نيشت بـروس العراقيـب=اسرع من الشيهان لاشـاف ملـواح
ركابها من عزوتـي منقـع الطيـب=ضد الحريب ان صاح بالنزل صياح
واربع ليالي صدق ماهـي تكاذيـب=تلفي على بن هذيل كساب الامـداح
قل ديرتك سقف ولتهـا الاجانيـب=يروح عليها من الشعب كل مصلاح
جانا ظعنهم مـع دبشهـم جناديـب=وصار الخطر منهم علينا بـالارواح
عجل علينـا ياحصـان الاطاليـب=لك هدةٍ تاخذ مـع الخيـل مسـراح



والمعذره على القصور يابو راشد ان كان باقي من القصيده شي او حصل فيها خطأ لغوي
محمد الدهمشي
16-09-2006, 09:02 PM
الله يعطيك العافيه يابو جسار والله انك جبت اللي عجزوا الشيبان يجيبونه وانا كل شايبن اسأله يستحي يقول اني ماعرف ويعطيني ابيات من راسه مالها شغل بالسالفه

يعطيك العافيه وشكرا 000



اخوك مديرالتربيه والتعليم في وزارة غرابيل//ابوراشد
ابن دخيل الله
16-09-2006, 10:31 PM
ابو راشد


انا سمعت القصيده كامله في شريط شعبى يباع بالتسجيلات


بلسان راويه شمري من اهل حايل


لكن للاسف والله نسيت اسم الشريط


لكن وعد اذا لقيته اخبرك



لك التحيه\ ابن دخيل الله
الدندووووونه
17-09-2006, 06:03 PM
بصراحه بنتظار القصيده كامله....



الشيخ مات من القهر..... لأنه ماقدر يسوي للعجوز شي....


وألحين لوالوحده تنخى بتموت محدٍ درى عنها....

خلوها على الله....

ودمــــــــــتم


الدندوووووونه
بـنـت الـشـيـوخ
18-09-2006, 10:07 AM
ابشر
نسأل ونردعليكـ

اذا لقيناها
فتى الباطن
12-12-2006, 01:01 AM
الله يعطيك العافيه انا اشهد انك بعيد المراميس ابعدت وجبت العلم( قصيدة اللي نخت راعي غزاله) نبي هده من هداتك يالذيب وتجيب لنا باقي قصيدة راعي غزاله